Hla tơnung mơda ñu ƀăl ƀăl, lơ̆m ƀong ta rơčăm, hơmâo anŏ ƀlit ƀlit. Hla tơnung juăt pĕ ƀong amăng bơyan phang, lơ̆m phun ñu bluh hla mơda. Djuai ania Êđê juăt pĕ hla mơda či ƀong mơtah, ƀong hrŏm hăng añăm glai pơkŏn, ƀudah tut hăng măm akan, măm hơdang. Hla tơnung mơda juăt hơmâo pơkra añăm luk jriu hăng hra, biă ñu lĕ luk jiu hăng akan, tul hăng akan krô hăng akan hơtuk. Amai H’Lop Niê, dŏ ƀơi ƀuôn Sah B, să Ea Tul, tơring glông Čư̆ Mgar, tơring čar Dak Lăk brơi thâo, hla tơnung mơda ñu ƀăl, hăng hơher mơ̆ng pơhăng eh čim, kiăo tui gru glai rưng Dap Kơdư sit jing tơlơi phara hơjăn mơ̆ng añăm hla tơnung tul hrŏm akan hơtuk: "Añăm ƀong anai jơman biă mă, jơmam biă lơ̆m ƀong hăng asơi pơ-iă. Anai jing añăm akan hơtuk tul hrŏm hla tơnung mơda. Akan ta pĕ hĭ tơlang hăng akŏ ñu, hla tơnung ta pĕ mơ̆ng čroh ia, pơ hmua, giong anun tul hăng hra hrŏm hăng rơsun glai. Añăm ƀong anai hơmâo amăng tơlơi hơdip djuai ania Êđê sui laih”.

Lơ̆m yang hrơi phrâo ƀlĕ, mơnuih djuai ania Êđê prăp lui gơnam či nao pơ hmua. rơngiao kơ hơkă črô̆ ba gơnam bă kleng, ƀu dưi kơƀah ôh añăm ƀong, ƀu hơmâo anŏ yôm hơget ôh samơ̆ ăt djŏp ia ƀăt jơman kơ hrơi ngă bruă. Laih anun hla tơnung tul hăng akan hơtuk jing sa djuai anăm ƀong tui anun. Hla tơnung mơda tul hăng akan hơtuk juăt ƀong hrŏm asơi pơ-iă, ƀong mơtah hai, tui anun jing ngă añăm ƀong jơman hloh. Amai H’Đô Niê dŏ ƀơi Ƀuôn Sah, să Ea Tul, tơring glông Čư̆ M’gar, tơring čar Dak Lăk lăi, bruă pơkra añăm anai huăi tơnap hơget ôh, samơ̆ kiăng jơman lĕ tui hluai kơ tơngan pô pơkra mơn: “Hla tơnung mơda bơyan anai yơh jơman hloh, tơdah hơmâo hơjan ƀu jơman dong tah, hla ñu tha hĭ, ƀu rơčăm, ƀu mơda dong tah. Añăm anai hơmâo mơ̆ng glai klô đôč yơh, phun tơnung ta dưi ba glăi pla pơ sang ƀudah pĕ mơ̆ng hmua, mơ̆ng glai. Bơ akan ăt dưi hyu wah mă pơ čroh hnoh mơn, giong anun ba glăi pơkra mă, ƀudah blơi mă akan hơtuk pơ sang čơ tŭ mơn”.

Akan hơtuk tul hăng hla tơnung jing añăm ƀong hơmâo amăng gru grua djuai ania Êđê, pơƀuh tơlơi thâo rơgơi pơkra añăm ƀong. Añăm anai juăt pioh ƀong huă rim hrơi, ƀudah amăng hrơi ngui ngor prong amăng plơi pla. Biă ñu amăng blan 3, lơ̆m adai kual Dap Kơdư glăk truh bơyan bơnga, añăm anai ƀu kơnong hơmâo anŏ ƀăt jơman mơ̆ng glai đôč ôh ăt pơlir hơbit mơnuih mơnam hăng pơpŭ kơ gơnam ƀong huă mơ̆ng glai klô brơi kơ ană mơnuih ta./.