Sang drông mơng djop djuai ania ƀơi kual Dap kơdư lăi hrŏm hăng mơnuih djuai ania Sêdang hnun mơn, arăng lăng kar hăng anih pơdah gru grua yôm phara mơng kual lŏn anai. Hăng mơnuih djop djuai ania ƀơi kual Dap kơdư, sang drông jing anih ngă yang rơbang, gru grua hăng anai lĕ ƀô̆ mơta kơ plơi pla. Sang drông mơng djuai ania Sêdang lĕ sang prong rơhaih, glông, lăng mơng ataih kar hăng mơta jong pơđuai glăi, pơdong tong krah plơi pla. Ayong A Pháo, Khua apăn akŏ să Đak Ang, tơring glông Ngọc Hồi, tơring čar Kon Tum brơi thâo:

“Sang drông lĕ anih tum pơƀut mơnuih amăng plơi pla, mơng hrơi ngui ngor, ngă yang rơbang pơprong, ană plơi pla lêng kơ tum pơƀut ƀơi sang drông kiăng ngui hrŏm. Sang drông hơmâo abih bang mơnuih amăng plơi pla gum tơngan pơdong, pơpha bruă mă brơi rĭm čô mơnuih, rĭm grup sa bruă. Sang drông đưm hlâo adih pơkra bơbung hăng liang, pơnăng păng kram ale…ră anai yua bơbung tôl yơh”.

Anih arăng juăt pơdong sang drông yua tha plơi ruah hăng juăt lĕ ƀơi lŏn kơdư. Sang drông hơmâo pơdong ƀơi anih dưi lăng ƀuh mơng ataih samơ̆ ăt ƀu dưi pơdong ƀơi akŏ ƀudah tlôn plơi. Bruă pơdong sang drông ăt ngă tui djơ̆ hơdôm tơlơi pơkă mơng mơnuih amăng plơi pla hăng djơ̆ tơlơi mơyang mơn. Tui phiăn juăt, tha plơi amra lăi pơthâo tơlơi pơsit pơdong sang drông brơi abih bang mơnuih amăng plơi pla hlâo kơ ha thun kiăng kơ prap lui gơnam tam, tơdơi anun ngă yang kiăng brơi ană plơi pla pơdong sang. Tha plơi lĕ mơnuih kiăo tui lăng, git gai ană plơi pla kiăng pơhlôm brơi hiam tui gru grua sang hơđăp, pơpha bruă brơi kơ rĭm boh sang anŏ pơgôp hrơi mă bruă, djru gơnam hăng prăk kak.

Sang drông mơng djuai ania Sêdang hơmâo mơng 8 truh pơ 10 tơmeh phun, anet prong tui hluai sang mơn. Hơdôm ƀĕ tơmeh anai hơmâo pơkal nao rai hăng hơdôm ƀĕ kyâo, hơdôm ƀĕ kyâo anai dưm dăp bơkơnar kiăng pơkal kjăp brơi sang. Tơmeh phun pơkal nao rai hăng tơmeh anet ƀiă. Ơi A Phâng, dŏ amăng să Đăk Ang, tơring glông Ngọc Hồi, tơring čar Kon Tum brơi thâo: Hăng mơnuih djuai ania Sêdang, sang drông kiăng glông, hrưn đĭ hăng rơhuông adai, tui anun kah mơng tŭ mă hyuh mơyang mơng rơngĭt adai. Mơnuih djuai ania Sêdang pơmĭn sang drông lĕ anih tô nao rai ană mơnuih hăng rơngĭt adai, anai lĕ anih tơkuh nao rai hăng mơ-it nao tơlơi čang rơmang kơplah wah ană mơnuih hăng yang rơbang:

“Pơdong sang drông ƀơi anai, ƀing gơmơi amra nao trơ̆i kyâo wil, pơprong. Lơm pơkra arăng sang arăng ƀu yua sơđin mơ̆ kơ akă hăng hrĕ. Kơnong tha plơi hăng ƀing mơnuih tha rơma kah thâo bruă pơkra, bruă akă hăng git gai ană tơčô ngă tui. Bruă pơdong sang kơnong đah rơkơi đôč, yua đah rơkơi kah thâo tua hyu. Lơm sang pơdong giong kah truh bruă kơ đah kơmơi anun lĕ nao trơ̆i hla huai, akă jing tơnă kiăng kơ klup bơbung sang. Đưm hlâo arăng pơdong rơbêh 1 blan amra giong sa boh sang drông”.

Rang sang drông mơng djuai ania Sêdang arăng juăt pơkra hăng rơ-o. Hơdôm phun rơ-o arăng koh ba glăi glông bơkơnar hăng sang drông, tơdơi anun arăng blah hĭ dưm ngă rang sang. Pơnăng sang arăng păng hăng ƀia pih, arăng pŏng pơdŏng jum dar sang. Bah amăng sang drông pok tơbiă pơ anăp, anih hơmâo lan sang pơprong. Tơkai rơñan đĭ trun hơmâo pơkra hăng sa ƀĕ kyâo pơprong. Sang drông mơng djuai ania Sêdang hơmâo črăn bơbung phun, hơmâo klŭp hăng liang hăng hla huai arăng dưm trem tui glông, dưm đĭ tui hăng glông hloh. Ơi A Phâng, dŏ amăng să Đăk Ang, tơring glông Ngọc Hồi, tơring čar Kon Tum brơi thâo dong:

“Tơdah plơi pla lu mơnuih amra pơdong sang drông pơprong, bơ ƀiă mơnuih amra pơdong anet đôč. Lơm pơdong sang drông kiăng đing nao bruă pơkra glông hăng rơhaih, tơlơi anai kiăng pơhlôm bơkơnar. Anih yôm hloh lĕ anih ngă yang. Ră anai hơmâo pra yang, đưm hlâo adih lĕ mơñam mă griang dưm ƀơi tơmeh sang drông, mah čuh ƀong hơget thơ ăt dưm nao amăng anun ƀiă, lăng kar hăng pơyơr đĭ yang rơbang”.

Amăng sang drông juăt hơmâo pơdong rup trah hăng tol yol hơdôm rup trah phara anun lĕ rup bơnga pơlang, čim brim, pơdai…Mơnuih djuai ania Sêdang kơnong pik ia kô̆, ia jŭ hăng mriah kiăng kơ pik amăng sang drông. Tơlơi pơmĭn mơng mơnuih djuai ania ƀiă lĕ ia jŭ amra pơkiăo đuăi atâo, ia kô̆ pơdah pran jua akĕ phĭ hăng ia mriah pơdah tơlơi dưi. Amăng rĭm boh sang drông lĕ anih yôm kiăng pơpŭ hơdôm gơnam mơyang, anai lĕ sa ƀĕ thong, sa boh pơtâo, sa ƀĕ tơki kơbao…Amăng sang drông, lu plơi pla hơmâo tol rup, rup truh Khua mir sir Hồ Chí Minh, hla kơ lŏn ia. Ƀu djơ̆ kơnong lĕ tum pơƀut, ngui ngor, sang drông ăt lĕ anih mơnuih djuai ania Sêdang djă pioh, tŏ tui gru grua, tơlơi ngă yang rơbang mơng djuai ania pô. /.