Rim hrơi tui anun soh, yă dôn Trần Thị Lan, 90 thun, ƀơi Xóm Bến, să Ô Loan, tơring čar Dak Lăk ăt dŏ pơtŏ apui ƀơi tơpur sang ñu mơn, či tơnă asơi hơbai añam kơ ñu hăng rơkơi ñu thun anai 95 thun laih. Sang apui anet đôč, tơpur ñu hơmâo tơlŏ kan pơsơi, gai tơkep kram (gai duih), hơdôm boh rơ-i tap gŏ, đing ayup apui sô kơnô laih, gai tơkung rơ-i, pioh gơnam ƀong huă, hrŏm hăng hơdôm boh gŏ tlôn ñu hơdăng gŏ soh. Hơdôm mơta gơnam anun ră anai ƀu ƀuh đơi dong tah, samơ̆ pơ anai ăt dŏ hơmâo đôč. Mơ̆ng sang apui anai, asơi huă djơ̆ anŏ ñu braih, ƀơi anŏ ñu braih kơtor, braih luk hơbơi plum, hơbơi čên mơ̆ yă Lan rông 7 čô ană. Hăng yă Lan, anun ƀu kơnong jing sang apui đôč ôh, pơ anun djă pioh rup sang anŏ ñu mơ̆ng thun blan tơnap tap, kơƀah lu mơta:“Kâo tơkeng 7 čô ană, gir čem rông gơñu truh kơ prong. Ră anai sang apui, tơpur anai jing anih gơñu pơwơ̆t glăi, jing tơlơi phiăn, gru grua đưm, sang apui anai kar hăng pran ta mơn, sang ta hnun mơn, sang anŏ hlơi hlơi leng kơ hơmâo soh yơh tơpur pơtŏ djuh, răk pioh truh kơ rơnuk anai”.

Hăng ơi Trần Kim Thiên, mah ƀu pơtŏ apui tơnă asơi hơbai añam rim hrơi kah hăng yă tha ñu ôh, samơ̆ mơ̆ng gai tơkung rơ-i, rơ-i, čơngua, gai duih, đing ayup apui truh kơ rơ-i tap tlôn gŏ...yua ñu pơkra mă soh. Hơdôm mơta gơnam anai kiăo tui rơkơi bơnai ñu mơ̆ng tơdăm dra truh kơ tha rơma tơbuk ƀuk kô̆. Sang apui sô hăng rim gơnam yua, jing kơđŏm pioh lu tơlơi lăp hơdor biă mă kơ dua rơkơi bơnai dŏ hrŏm dua amăng klâo črăn rơnuk thun laih:“Kâo glăi mơñam rơ-i tap tlôn gŏ, krih gai tơkep, dŏ kơ ih ăt dưi mơn. Bơ rơ-i tap gŏ anai ta nao pơ glai, koh kram glăi mơñam, mơ̆ng đưm laih, ơi yă ta ăt yua anŏ anai mơn, ta mơñam ñu wil djơh anai či tap tlôn gŏ hŭi pơ-iă”.

Ƀơi lu plơi pla tơring čar Dak Lăk, rim hrơi mơ̆ng sang apui gah tlôn sang, asăp apui tơpưh nao truh pơ kơnua, hmua đang, phun pơtơi. Hăng sang anŏ ơi Phan Hữu Lộc, plơi Mỹ Phú 1, să Ô Loan ƀudah sang anŏ yă Trần Thị Lịch ƀơi plơi Phú Hữu, să Hòa Thịnh, mơ̆ng gŏ če hơtuk hla kyâo, truh kơ gŏ rơyă tơpung čăo kơ ƀing tơčô ñu, ƀudah asơi añam rim hrơi ăt hơmâo mơ̆ng sang apui anun soh. Sang apui hơmâo răk pioh mơ̆ng rơnuk đưm truh kơ rơnuk anai ăt hơmâo ơi yă amĭ ama djă pioh, mah ană tơčô hyu pơ ataih, ăt hơdor glăi mơn. Ñu jing bơngăt plơi pla, kơđŏm pran jua laih, jing rup juăt ƀuh mơ̆ng sang anŏ. Yă Trần Thị Lịch brơi thâo:“Sang apui anai, tơpur anai yơh rông abih bang sang anŏ gơmơi, tơnă asơi hơbai añam, giong anun ană bă glăi huă hrŏm. Tê̆t hai ƀơi tơpur anai mơn, lơ̆m hrơi blung a blan tê̆t, pơtŏ, sar djuh, ƀudah čuh hơdăng, tơpur anai apui jă rơhĭ na nao mơtăm yơh. Ƀing čơđai lăi nao pơpă tŭ mơn ƀu jơman hăng asơi amĭ tơnă ôh. Mah asơi añam pơ plơi ƀu hơmâo mơnong akan yom kah hăng pơ plơi prong ôh, samơ̆ asơi añam amĭ tơnă hơbai jơman soh, anun yơh nao mă bruă pơ ataih hning glăi kơ amĭ ama pơ sang biă”.

Ayong Phạm Văn Long, khua plơi Mỹ Phú 2, să Ô Loan, brơi thâo, sang anŏ ñu yua apui gas, gŏ apui lơtrik sui laih, tơ tă anai glăk yua apui lơtrik arăng pia bếp từ. Ñu lăi, tơlơi hơdip plih laih, sang apui mơ̆ng rơkơi bơnai hlăk ai jai plih rơnuk phrâo mơn, samơ̆ lơ̆m ƀuh sang apui pơ plơi, ñu kar hăng hơdip glăi thun blan hơmâo amĭ ama ơi yă tơnă hơbai asơi añam, čem rông. Asăp apui ngă ñu hang mơta, yua amăng pran jua hơmâo anŏ hning rơngôt kơ rơnuk đưm:“Đưm adih ơi yă ta tơnă asơi añam hăng apui djuh soh yơh, tơ tă anai hơmâo mơn ƀing ơi yă dŏ hơmâo tơpur pơtŏ apui, tơnă asơi hăng apui djuh soh. Lơ̆m ƀuh sang apui tui anun jing hơdor glăi pơ sang, hơdor kơ đưm adih, hning glăi kơ plơi pla, gru grua Việt Nam ta. Tơpur pơtŏ apui jă ta lăng mơak, mưn pơđao pran jua”.

Hlơi pô ñu tơkeng rai pơ plơi pla, hơdip pơ plơi pla mơ̆ng anet, truh kơ prong nao mă bruă pơ ataih, truh ha hrơi ƀuh glăi asăp apui mơ̆ng sang apui, asăp pưh nao truh pơ phun pơtơi gah tlôn sang, por nao truh kơ kơnua čư̆, ƀudah hrip asăp apui mơ̆ng djuh, mơ̆ng adrăng, tŭ kơ hang mơta, hang mơta ƀu djơ̆ yua asăp ngă ôh, anun lĕ hang mơta yua kơ hning glăi rơnuk đưm. Rup anun, anŏ ƀâo asăp anun mah ƀu djơ̆ mơnong yom, hin ôh, samơ̆ ñu kơđŏm glăi amăng pran jua sui biă, hnun yơh rim čô mơnuih mah nao pơ ataih ăt hơdor glăi mơn./.