Amăng mơmot hrơi kŏm, sang jơnum ană plơi ƀon Dak N’Drung, să Đức An, tơring čar lâm Đồng ok or jua čing hơgor. 25 čô hơmâo ƀing kơhnăk pơtô brơi atông čing, pơtô djă tơlŏ atông, truh kơ atông hiưm mơ̆ng djơ̆ jua ñu. Mơ̆ng rim wơ̆t hrăm, jua čing mơñi mơak tui laih. Amai Thị Hợi hok mơak lăi:“Hlâo či hrăm, kâo pơmin atông čing tơnap biă. Samơ̆ mut hrăm giong, kâo lăng ƀu tơnap đơi lơi. Truh ră anai, kâo thâo atông 3 tơlơi čing amuñ. Mơak biă yua pô ta thâo atông laih. Kâo gir hrăm dong mơn đah mơ̆ng djă pioh gru grua hiam mơ̆ng ơi yă đưm”.

Anih pơtô atông čing hnăng blung hơmâo gong gai să Đức An hăng sang bruă gru grua tơring čar Lâm Đồng djru brơi. Tơdơi kơ pơđut tal hrăm, adơi amai ăt prăp rơmet nao pơtŏp hrăm dong mơn ƀơi sang gru grua plơi pla Dăk N’Dủng. Rim wơ̆t hrơi kŏm, adơi amai ngă giong bruă, glăi mơ̆ng hmua, giong anun gơñu nao pơtŏp hrăm, pơtô brơi ƀing gŏp kiăng atông djơ̆ yŭ, jua čing. Hơdôm mông hrăm anun ngă brơi jua čing jê̆ giăm, mut tơma amăng tơlơi hơdip ană plơi. Yă Điểu Thị Huế - Kơ-iăng khua ping gah, Khua jơnum min djŏp djuai ania mơnuih mơnam ƀon Dăk N’Drung brơi thâo:“Tơhrơi, adơi amai nao pơ hmua, bơwih bơwang amăng sang anŏ. Truh mơmot gơñu pơƀut pơ sang gru grua plơi pla či hrăm atông čing. Hlơi hlơi leng kơ mơak soh yơh. Yua hơmâo tơlơi gum djru, lăng ba mơ̆ng Gơnong bruă, Sang bruă Gru grua, neh met wa dưi djă pioh, răk lui, pơtrut tui anŏ yom gru grua mơ̆ng djuai ania pô”.

Hăng ƀing kơhnăk, bruă pơtô atông čing ƀu djơ̆ pơtô atông đôč ôh, anun lĕ pơtô glăi abih bang tơlơi hơdip, djru brơi hlăk ai thâo hluh, hơdor djŏp tơlơi čing arăng atông amăng hrơi mông hơget thơ, mơ̆ng anun pơ-ư pơ-ang ngă tui amăng tơlơi hơdip plơi pla. Mơ̆ng rim wơ̆t pơtŏp hrăm, amai Thị Dryan čang rơmang hơmâo lu dong hlăk ai hor hrăm atông čing:“Să Đức An djru brơi plơi gơmơi pok anih pơtô hrăm atông čing, kiăng ƀing hlăk ai hlơi thơ hor lĕ dưi hrăm. Mơ̆ng anih pơtô anai, gơmơi čang rơmang pơtô glăi tơlơi čing đưm kơ hlăk ai, ană tơčô mô yâo, kiăng gơñu huăi wơr ôh gru grua yom mơ̆ng ơi yă đưm”.

 Kiăng pơsur mơnuih kơhnăk gru đưm pơtô glăi anŏ yom gru ama grua amĭ kơ ană tơčô mô yâo, tơdơi kơ pơmut hrŏm să, Jơnum min mơnuih ƀon sang să Đức An ngă Hră pơtrun djru prăk rim blan kơ dua čô mơnuih kơhnăk Nghệ nhân Ưu tú mơ̆ng ƀon Dăk N’Drung. Amăng anun, Nghệ nhân Ưu tú Thị Phyơn, pô ngă Akŏ grup adoh suang ƀon Dak N’Drung, hơmâo djru ba rơbêh 3 klăk prăk rim blan. Hăng ñu, anai jing tơlơi yom biă mă, pơsur pran jua ñu răk lui gru grua djuai ania M’nông:“Kâo mơak biă laih anun bơni kơ Ping gah, Kơnuk kơna hơmâo djru brơi rơbêh 3 klăk prăk sa blan. Prăk anai pơsur pran jua kiăng kâo gir răk pioh gru grua đưm. Kâo ăt pơtô brơi dong mơn kơ ƀing hlăk ai, ană tơčô, kiăng ba grup čing đah kơmơi hơmâo lu mơnuih hloh, rơgơi hloh, kiăng ană tơčô tŏ tui djă pioh gru grua hiam mơ̆ng ơi yă đưm”.

Mơ̆ng anŏ yom hơmâo djă pioh, să Đức An glăk či akŏ pơjing anih čuă ngui amăng plơi, ƀơi ƀon Dăk N’Drung. Ƀing tuai dưi sem lăng, pel ĕp, hmư̆ čing, bruă ngă yang, ngui ngor, mơñam mrai hăng mơnong ƀong huă djuai ania M’nông hai. Amăng anun, sang gru grua plơi pla jing anih pơdă djŏp gơnam yua mơ̆ng đưm, pơƀuh gru grua hiam mơ̆ng plơi pla, hăng djŏp bruă ngui ngor gru grua đưm, čơkă tuai. Yă Thị Rơi, Khua ping gah ƀon Dak N’Drung, lăi:“Bruă iâu pơthưr adơi amai, hlăk ai tơdăm dra hrăm atông čing ƀu kơnong djă pioh gru grua đưm đôč ôh, ăt ngă kjăp tui tơlơi khăp ƀu-eng tơdruă. Să man pơdong sang gru grua phrâo kơ ană plơi, kiăng ană plơi jơnum, pơtŏp hrăm. Gơmơi čang rơmang ba hơdôm djuai goong brô̆, gơnam yua đưm pơdă pơ anai, kiăng ană tơčô mô yâo thâo hluh hloh kơ gru grua djuai ania ta”.

Tơngan bil, hơtôh abih yua ngă hmua pla pơjing, samơ̆ ƀing đah kơmơi djuai ania M’nông ƀơi ƀon Dak N’Drung glăk djă pioh yŭ čing, bơngăt čing plơi pla. Apui ƀơi sang gru grua plơi ăt jă na nao rim wơ̆t hrơi kŏm, jua čing ăt dŏ mơñi na nao, ba gru grua plơi pla hmư̆ hing ataih hloh, hrŏm hăng tơlơi đĭ kyar mơ̆ng plơi pla Đức An, Lâm Đồng./.