Mơng mơguah sing bring truh mơmŏt mlăm, mah pơ-iă hang ƀudah rơ-ŏt rơ-ơ̆, jua pôr pơhing mơng čư̆ Hơdrông ăt pôr na nao mơtăm. Ayong Ngô Khổng Tuấn Anh, 1 amăng 4 čô mơnuih mă bruă ƀơi anom bruă gong pôr brơi thâo: mơng hrơi gong pôr anai rŭ mơng plơi prong Pleiku ba nao pơdong ƀơi čư̆ Hơdrông, mơng anai dưi pôr hyu jua pơhiăp hăng pơdah rup ataih mơng 40-50 km, ră anai dưi pok prong mơng 80-100 km, pơhlôm đơ đam tơring čar Gia Lai. Samơ̆ 4 čô mơnuih mă bruă ƀơi anai glăk dŏ mă bruă ataih mơng anih anom pơkŏn.

Tui ayong Ngô Khổng Tuấn Anh, mah giăm jơlan mrô 14 hơmâo lu rơdêh đuăi nao rai hăng ataih mơng plơi prong Pleiku kơnong 14 km, samơ̆ čư̆ Hdrông ăt kret kruai biă mă, djop bơyan kơnong hơmâo pơ-iă, angĭn, hơjan hlim hăng kơthul kơnăm. Mơng tơkai čư̆ nao pơ gong pôr lĕ jơlan čun čoe, glông rơbêh 400 met, bruă nao rai ăt tơnap tap mơn.

“Amăng bơyan hơjan hlim, jơlan đĭ nao čư̆ Hơdrông tơbor, lơm hla kyâo hngo jruh trun rôk jơlan, đĭ rơdêh tơnap tap biă mă. Đĭ rơdêh rơbuh mơ-ai, rôk jơlan heng hŏng, ƀu hơmâo mơnuih găn nao rai. Lơm rơbuh rơdêh ăt gir pơdong laih anun đĭ nao pơ gong pôr brơi djơ̆ mông tui tơlơi pơkă kiăng pơplih mơnuih mă bruă. Tơnap tap tui anun samơ̆ ƀing gơmơi ăt gir run mă bruă”.

Ayong Trần Thiên Thế ăt lĕ mơnuih mă bruă gong pôr anai sui thun ƀơi čư Hơdrông. Ñu brơi thâo, kâo hrŏm hăng adơi ayong pơkŏn juăt hăng tơlơi hơdip ƀơi anih mă bruă pơdong ƀơi gong pôr, hăng hơdôm hrơi ƀong huă tơnă hơbai mă. Hơdôm hrơi hơjan kmlă hăng apui ƀong glai amăng bơyan không phang juăt ƀuh biă mă, yua čư̆ Hơdrông glông kar hăng anih hrĭp mă kmlă hăng jum dar lĕ glai rưng.

“Rĭm thun lêng kơ ƀuh djơ̆ kmlă, đa rơnang, tơdah kơtang răm rai lu biă mă, amăng bơyan không phang juăt ƀuh apui ƀong glai jum dar anai. Tơdah dju djuam duam ruă ăt gir pơplih hrơi mă bruă mơn. Amăng bơyan hơjan kơthel juăt ƀuh răm rai biă mă, lơm anun, tơdah hajăn amra tơnap pơkra ming. Mah ƀu djơ̆ hrơi mă bruă, samơ̆ tơdah răm rai pơpă thơ, adơi ayong lêng kơ lui hĭ abih bruă sang anŏ kiăng đing nao kơ bruă djru nao rai pơkra ming hơdôm anih răm rai”.

Ơi Nguyễn Khắc Quang, Kơ-iăng Khua Gong pơtui jua pơhiăp-pơdah rup tơring čar Gia Lai brơi thâo: djop jơlan hơdră pơdah rup, pơtui jua pơhiăp amăng tơring čar lêng kơ gơnang nao gong pôr čư̆ Hơdrông kiăng kơ ba truh abih bang mơnuih hmư̆. Giăm 1 thun anai, gong pơtui jua pơhiăp-pơdah rup tơring čar Gia Lai hơmâo dong bruă jao phrâo, anun lĕ ba pơtui glông pôr dêh čar VOV1 hăng VOV4, pơhlôm brơi 19 mông rĭm hrơi. Mah ataih mơng anih phun, tơlơi hơdip tơnap tap hăng hơmâo lu tơlơi hŭi rơhyưt, samơ̆ ƀing apăn bruă ƀơi hơdôm anih lêng kơ gir run găn rơgao tơnap tap, pơgiong klă bruă jao.

“Gong pôr pơhing lêng kơ đing nao djop mơta bruă gơnam tam kah hăng pran jua, hơmâo hơdră pơtrut pơsur brơi adơi ayong kiăng hơmâo dong prăk djru mơng gong pôr pơhing. Rơbêh 1 thun anai Gong phun jua pơhiăp dêh čar Việt Nam pơtui glông pôr pơhing VOV4, laih dong lĕ glông pôr pơhing VOV1 dong, kiăng tui tơlơi pơmĭn mơng anom bruă gơmơi ăt hur har biă mă, hok mơ-ak yua hơmâo măi phrâo, klă dong amăng pôr pơhing. Gah Kbang, kual ngă hơkrŭ hmư̆ tong ten biă mă. Mơng anun neh met wa dưi tŭ mă hơdôm bơh tơhnal klă, ngă mơnuih hmư̆ brô̆ ƀơi tơring čar lăi phara hăng kual jum dar hnun mơn”.

Truh mơmŏt mlă, lơm ayuh hyiăng rơ-ŏt rơ-ơ̆ ƀơi kơčong čư̆ Hơdrông, ƀing apăn bruă ƀơi gong pôr mơng Gong pơtui jua pơhiăp hăng pơdah rup tơring čar Gia Lai ăt gir run mă bruă. Ƀing gơñu găn rơgao tơnap tap, mă bruă hơjăn pơgôp ba tơlơi pôr pơhing truh abih bang mơnuih./.