Mông pơplông ngui hơmâo ƀing rơgơi tơnă hơbai hăng ƀing rơguăt bruă gah mơnong ƀong huă mơ̆ng Việt Nam, Thái Lan hăng Malaysia, 3 boh dêh čar hmư̆ hing hloh kơ bruă pla, pơkra sâu riêng. Ƀơi Talkshow, ƀing tơnă hơbai hơmâo pơdah pơƀuh, hơtuk rơyă 7 mơta gơnam ƀong. Hơdôm gơnam ƀong hơmâo mă yua sâu riêng Dak Lăk hơbai tui gru mơnong ƀong huă mơ̆ng 3 boh dêh čar, mơ̆ng añăm ƀong lăng năng blung, añăm ƀong phun truh kơ ƀong tuč rơnuč.

Lu ƀing kơhnâo pơsit, sâu riêng Dak Lăk hơmâo lu tơlơi gêh găl či đĭ kyar pơkra rai gơnam ƀong huă phrâo, djru pơđĭ tui anŏ yom gơnam mơ̆ng hmua lơ̆m pơtruh čơkă tuai hyu ngui hăng hyu sem lăng gru grua. Ơi Lý Kim Long, Kơ-iăng khua Khul mơnuih kơhnâo kơhnăk tơnă hơbai Việt Nam, lăi: “Hrơi anai kâo pơsit pơmut hrŏm hơdang hăng sâu riêng, kâo hlong či ruah hơdang yơh mơnŏng phara hăng juăt hơmâo hloh mơ̆ng Phú Yến hơđăp rơyă hrŏm hăng sâu riêng anai jing boh ƀong hmư̆ hing mơ̆ng Dak Lăk. Ăt kiăng sem lăng hơtuk rơyă sâu riêng anai hăng mơnong akan, pơkra rai anŏ ƀăt jơman bâo mơnâo hling ƀiă kơ ƀing tuai, pơhưč arăng amuaih blơi, pơtrut čơkă tuai hyu ngui mơ̆ng Dak Lăk lăi hơjăn hăng Việt Nam ta lăi hrŏm”.

Tui hăng khul pơphun pơplông ngui, Talkshow ƀu kơnong pơƀuh anŏ hơmâo phrâo amăng bruă pơkra sâu riêng đôč ôh ăt anăp nao akŏ pơjing pơkra gơnam bơwih kơ tuai hmư̆ hing phara hloh mơ̆ng gơnam mơ̆ng hmua. Hơdôm mơta añăm ƀong jơman amra hơmâo sem lăng ten hloh, pơtruh hăng sang mơdrô gơnam ƀong huă pơprong, sang jưh tuai amăng tơring či bơwih brơi ƀing tuai amăng Hrơi ngui sâu riêng Dak Lăk pơphun blan 8 pơ anăp. Ơi Nguyễn Quốc Hiệp, Kơ-iăng khua gơnong bruă gru grua, bơkjăp drơi jăn hăng tuai čuă ngui Dak Lăk brơi thâo: “Ƀing gơmơi iâu ƀing rơgơi tơnă hơbai glăi pơkra añăm ƀong phrâo mơ̆ng dâu riêng đah mơ̆ng sem lăng hăng pơčeh rai gơnam ƀong phrâo laih anun pơđĭ anŏ yom mơ̆ng sâu riêng amăng anih mơdrô dêh čar ăt kah hăng anih mơdrô tač rơngiao, ba glăi anŏ yom hloh dong hăng bruă pơkra sâu riêng mơ̆ng ƀing ta”./.