Pơphun atông blung a ƀơi Jơnum ngui hơdôm grup atông čing hlăk ai plơi prong Buôn Ma Thuột tal sa, grup Buôn Ky, phường Thành Nhất pioh glăi lu tơlơi lăp hơdor hăng ƀing tuai nao lăng. Hơdôm tơlơi atông, ayun suang mơ̆ng grup hơmâo lu hnưr thun phara atông mơ-ak biă mă, atông kơjăp yŭ, hăng tơngan suang rơmuăn hiam, tơkai hơyak hrŏm hrŏm, djŏp pô lêng kơ bơni soh kơ tơlơi pơtŏp hrăm mơ̆ng grup. Ră ruai kơ bruă prăp rơmet nao pơplông, adơi H’Wanna K’tul, mơnuih amăng grup čing Buôn Ky, phường Thành Nhất brơi thâo:

“Ƀing gơmơi hơmâo hrăm 3 hrơi, rim wơ̆t hrăm 2 mông, rim mông hơmâo pơtŏp 3 wơ̆t. Ƀing gơmơi khŏm nao djơ̆ mông či pơtŏp, laih dong amăng grup khŏm hơmâo tơlơi pơmin djơ̆ hrŏm. Tơdah phara lĕ ƀing gơmơi ƀu thâo pơtŏp ôh”.

Y Diệp Êñuôl jing mơnuih aset thun hloh amăng grup pơplông mơ̆ng ƀuôn Ky, nao pơplông 3 tơlơi atông, amăng anun hơmâo tơlơi atông đing t’rưng “Cô gái vót chông”. Glăk 10 thun đôč, samơ̆ Y Diệp thâo ngui lu djuai gong brô̆ laih kah hăng đing t’rưng, hơgor, čing kram. Y Diệp lăi, yua dah ama ñu thâo pơkra hăng sĭ mơdrô djuai goong brô̆ anun jing mơ̆ng anet ñu hơmâo pel, pĕ ngui lu djuai goong phara, laih anun ñu lăng hor biă, amuaih hrăm pĕ hăng pĕ brơi arăng hmư̆.

“Kâo hor biă pĕ atông biă, ama kâo pơtô brơi kâo 4 thun laih, kâo hrăm djŏp djuai goong brô̆ djuai ƀiă. Tal anai nao jơnum pơplông kâo mơ-ak biă, hơmâo bưp ƀing gơyut gơyâo pơ anai, lăng ƀing gơyut atông mơ-ak, ƀing ayong atông čing atông hơgor mơ-ak mơn”.

Tal blung a hơmâo pơphun, Jơnum ngui hơdôm grup atông čing hlăk ai plơi prong Buôn Ma Thuột pơhưč hơmâo 14 grup, 60 tơlơi atông kah hăng atông hơjăn, pĕ atông lu mơnuih, adoh tơlơi adoh đưm, suang. Hơdôm grup ba pơƀuh tơlơi tơlơi pĕ atông mơ-ak, djă gru phara mơ̆ng djuai ania Êđê hăng Mường. Tui hăng tơlơi pơtŏng lăng mơ̆ng anom pơphun pơplông, hơdôm grup hơmâo pơƀuh tơlơi atông mơ-ak hloh, rơguăt biă. Hơdôm tơlơi ayun suang hơmâo prăp rơmet klă mơn, pơƀuh gru grua ayun suang mơ̆ng djuai ania Êđê. Nghệ sĩ Linh Nga Niê Kđăm, Khua grup pơtŏng lăng tơlơi jơnum ngui anai lăi:

“Hơmâo mơn grup čing atông mơ-ak biă mơtăm, gơñu atông pơkhă nao rai bơrơtlep mơtăm kar hăng anŏ hiam mơ̆ng ring čing, mơ̆ng tơlơi atông anun mơn. Ăt hơmâo mơn grup đa dưi ngă tui anun, samơ̆ lu biă ñu lĕ juăt thâo atông čing găp ƀrô đôč. Tơlơi anun hai pơƀuh anŏ lăng ba kiăng ƀing ană amon pơtŏp lĕ aka ƀu hơmâo lu ôh, tơlơi gêh gal brơi ană amon atông čing aka ƀu lu ôh”.

Pơđut mông jơnum ngui, anom pơphun pơplông hơmâo brơi 6 pri kơ hơdôm grup rơgơi hloh hăng 18 pri kơ hơdôm tơlơi atông rơgơi hloh. Anai ƀu kơnong bruă pơtrut pran jua hăng hơdôm anom bruă đôč ôh mơ̆ anai jing “boh mih” tơdơi kơ lu thun pơphun pơtô atông čing kơ hlăk ai mơ̆ng gong gai plơi prong Buôn Ma Thuột lăi hơjăn hăng tơring čar Dak Lăk lăi hrŏm.

Ơi Phạm Tiến Hưng, Kơ-iăng khua jơnum min pơ ala mơnuih ƀôn sang plơi prong Buôn Ma Thuột, Khua anom bruă jơnum ngui ngor brơi thâo: jơnum ngui jing bruă đah mơ̆ng pơsit brơi hơdôm tơlơi pơtrun mơ̆ng plơi prong kơ bruă pơgang hăng pơtrut tui gru grua djŏp djuai ania ƀiă ƀơi tơring čar. Djru ngă gal brơi kiăng ƀing kơhnăk pơtŏp bruă djă pioh gru yôm mơ̆ng djuai ania. Anai ăt jing hơdră ngă pơhưč gru grua tuai čuă ngui mơ̆ng plơi prong. Tơlơi truh kih mơ̆ng mông jơnum lĕ djru pok rai lu bruă kiăng plơi prong pơphun ngă amăng hrơi blan pơ anăp.

“Him lăng amăng hrơi blan pơ anăp lĕ truh hrơi năm ƀudah hrơi tơjuh rơnuč blan lĕ gơmơi pơphun jơnum ngui ƀơi tơdron lăk ha wơ̆t, kiăng ƀing hlăk ai djuai ƀiă hơmâo anih ngui ngor. Laih dong pơƀuh rup ană mơnuih wơ̆t hăng gru grua hiam mơ̆ng djuai ania ƀiă plơi prong Buôn Ma Thuột, jak iâu ƀing tuh pơ alin ăt kah hăng tuai nao sem lăng gru grua hiam mơ̆ng djŏp djuai ania plơi prong Buôn Ma Thuột”.

Hơdôm jơlan ngă bruă pơ anăp anai mơ̆ng plơi prong Buôn Ma Thuột ăt pok rai tơlơi đĭ kyar kiăng hơdôm grup čing hlăk ai hơmâo lu tơlơi gêh gal či pơtŏp, hyu atông, thâo hluh gru grua boh thâo đưm mơ̆ng djuai ania.