-Mơ̆ng tơlơi pơmin hơpă H Juel hăng sang anô̆ pok Sang bruă Leng Gung juăt lăi pơhưč, lăi pơthâo hăng sĭ mơdrô hơdôm mơta gơnam mơ̆ng bôh thâo đưm gah djuai ania Bơnông tơring čar Dak Nông?

            H Juel lăi glăi: Rơgao hăng anai 10 thun, lơm kâo dô̆ rơkơi, kâo ƀuh neh wa dô̆ djă pioh mơn lu phiăn juăt đưm, biă ñu hơdôm phiăn ngă yang  mơ̆, amăng hơdôm phiăn ngă yang lĕ ƀu kơƀah ôh tơpai čeh. Mơ̆ng anun kâo hrăm tui amĭ rơkơi kâo pơtô brơi hơdră kŏng tơpai hăng pơkra poi đưm, blung a kŏng tơpai 1, 2 čeh pioh sang anô̆ mơñum ƀudah yua măng phiăn ngă yang anet mơ̆ng sang anô̆, tơdơi kơ anun ƀơƀrư̆ kŏng lu tui ƀu djơ̆ kơnong kơ yua amăng phiăn ngă yang mơ̆ng plơi pla ôh mơ̆, dô̆ lăi pơthâo hyu tơpai čeh kŏng tui phiăn juăt mơ̆ng djuai ania Bơnông truh hăng tuai mơ̆ng djop anih hăng ră anai tơpai čeh mơ̆ng kâo hmâo ba hyu sĭ lu kơ tuai. Rơngiao kơ anun kâo dô̆ hor băn ao mơñam mơ̆ng djuai ania pô dong, hơdôm bơnga ƀơi băn ao mơñam leng kơ hmâo sa tơlơi ruai, sa bôh tŭ yua pha ra amăng tơlơi hơdip mơda rim hrơi, hơdôm mơta bơnga kah hăng asar bôh get, bôh plôi, gă, čim brim, rup mơnuih... leng kơ hiăm biă hăng tŏng ten dong. Anun yơh kâo hmâo tơlơi pơmin khom lăi pơthâo, lăi pơhưč truh djop mơnuih thâo hluh dong kơ gru grua bôh thâo đưm anun mơ̆ng djuai ania pô, mơ̆ng anun Sang bruă bơwih ƀong mơnuih ƀôn sang Leng Gung mơ̆ng kâo dưi pơdŏng amăng thun 2022.

            -Sĭ mơdrô gơnam gah bôh thâo đưm hmâo hơget pha ra hăng hơdôm gơnam pơkon hăng amăng anun lĕ pô khom đing nao tơlơi hơget?

            H Juel: Sĭ mơdrô hơdôm gơnam tui phiăn juăt mơ̆ng djuai ania kah hăng tơpai čeh, gơnam băn ao mơñam, hơdôm gơnam mơñam bung bai, gơnam djă hơdor pioh pơkra mă mơ̆ng mrai, huai kram... hmâo lu anô̆ pha ra hăng tơnap tap hloh bơhmu hăng sĭ mơdrô gơnam pơkon, yua hơdôm gơnam anai ƀiă mơnuih blơi, yua anun kiăng ngă pơhưč mơnuih blơi ƀing gơmơi hmâo kiăo tui tơlơi arăng kiăng, ngă lu gơnam mă yua mơ̆ng bơnal mơñam kah hăng ƀop dưm prăk, kơdung băk, kep ƀuk, tơkhŏ jep, hơdôm gơnam djă hơdor pioh kiăng thâo tơlơi kiăng mơ̆ng mơnuih blơi yua hăng pioh ba gru hiam bôh thâo đưm mơ̆ng djuai ania pô dưi hmâo lu mơnuih thâo truh.

            -Hơdôm mơta gơnam mơñam băn ao đưm, mơñam bung bai ƀudah tơpai čeh... mơ̆ng H Juel sĭ hyu dưi hmâo lu mơnuih hor blơi mơ̆n, nua sĭ ñu hiưm hơpă, bruă bơwih ƀong sĭ mơdrô hmâo tơlơi tơnap hơget mơn?

            H Juel: Tơpai čeh ăt kah hăng hơdôm mơta gơnam mơñam bung bai, băn ao mơ̆ng sang bruă ƀing gơmơi ră anai hmâo lu mơnuih thâo truh hăng rơkâo blơi. Ƀu kơnong kơ djop brơi arăng blơi yua amăng tơring čar Dak Nông ôh mơ̆, dô̆ hmâo lu mơnuih ƀơi ƀôn prong Hồ Chí Minh rơkâo blơi dong, ră anai bruă sĭ gơnam anai ăt gêh gal mơn.

            -Djơ̆ mơ̆ng lăi bruă bơwih ƀong sĭ mơdrô mơ̆ng sang anô̆ H Juel glăk pơplih phrâo hơdôm gơnam mơ̆ng bôh thâo đưm. Bruă bơwih ƀong sĭ mơdrô anai sit ñu ăt glăk djru bruă mă, pơđĭ tui prăk pơhrui glăi kơ neh wa ƀơi plơi pla?

            H Juel: Kâo mơ-ak biă yua kơ hơdôm gơnam đưm mơ̆ng djuai ania pô dưi hmâo lu mơnuih thâo truh, hăng djru ƀing thâo phiăn đưm mơñam bung bai, rơngaih mơñam băn ao, kŏng tơpai hmâo dong prăk pơhrui glăi amăng tơlơi hơdip mơda, ngă brơi bruă mă đưm djuai ania pô hơdip glăi amăng tơlơi hơdip rơnuk anai pioh lu mơnuih thâo truh gru hiam mơ̆ng Bơnông Preh, Prâng, Nong... truh hăng lu mơnuih hloh.

            -Drơi pô H Juel ngă rah mơnuih hyu mă tơlơi pơhing phrâo, pơtui jua pơhiăp, laih anun gum hrŏm sang anô̆ wai lăng sang bruă, dua bruă mă hmâo hơget pơhrua nao rai mơ̆n?

            H Juel: Hăng bruă mă phun lĕ pô hyu mă tơlơi pơhing phrâo, pơtui jua pơhiăp tơlơi Bơnông hăng wai lăng rah Sang bruă bơwih ƀong mơnuih ƀôn sang Leng Gung lĕ gêh gal biă... Lơm pơdah đĭ rup kâo buh băn ao mơñam mơ̆ng Sang bruă Leng Gung tơčôh mơñam anun jing lăi pơhưč rah gơnam rah hăng lăi pơhing hyu djă pioh bôh thâo đưm mơ̆ng djuai ania pô hlao. Hăng ăt mơ̆ng bruă hyu mă tơlơi pơhing phrâo, pơtui jua pơhiăp mơ̆ anăn păn tơpai čeh kâo dưi sĭ hyu lu biă hăng lu mơnuih thâo truh rơkâo blơi lu. Kâo ƀuh anai lĕ sa tơlơi tơphă hăng gêh gal hăng kâo.

            -H Juel hmâo tơlơi pơmin, kơčăo bruă hơget kơ bruă mă mơ̆ng pô, biă ñu bruă djă pioh, ngă tui hơdôm nua bôh thâo đưm? Hmâo tơlơi hơget H Juel kiăng mơ-ĭt kơ ƀing gơyut hlăk ai, mơ-ĭt kơ neh wa plơi pla mơn?

            H Juel: Kâo kiăng pơkra giong sa bôh sang dlông đưm gah djuai ania Bơnông pioh hmâo anih anom lăi pơhưč, djă pioh bôh thâo djop mơta gơnam đưm mơ̆ng djuai ania pô. Rơngiao kơ anun kâo pơmin pơkĕ hrŏm hăng hơdôm sang bruă tuai čuă ngui ƀơi anai hăng pơ̆ tơring čar pơkon pioh lăi pơhưč gơnam mơ̆ng djuai ania Bơnông Preh, Prâng, Nong... ƀơi tơring čar Dak Nông. Kâo ăt čang rơmang mơn hơdôm rơnuk hlăk ai Bơnông gir run djă pioh gru grua hiam bôh thâo đưm mơ̆ng pô, ƀu dưi rơngiă hĭ.

            -Rơkâo bơni kơ ih H Juel!