Hăng plăng facebook glăk jing sa jơlan pôr pơhing yôm phăn pioh ƀing bơnai dra Tày lăi pơthâo, lăi pơhư̆č gru grua bôh thâo djuai ania pô truh hăng djop anih anom ƀơi rŏng lŏn tơnah.

Yă Nguyễn Thị San lĕ djuai ania Tày, tơkeng rai hăng prong đĭ ƀơi kual lŏn Nghiã Đô (tơring glông Bảo Yên, tơring čar Lào Cai). Yă San ruai glăi lĕ Nghĩa Đô lĕ kual lŏn đưm, anih pơjing, djă pioh hơdôm gru grua bôh thâo lu mơta hăng tơlơi pơhiăp bôh pia mơng neh wa djuai ania Tày. Ƀơi anai dô̆ hmâo tơhnal gal pơlar tuai čuă ngui plơi pla. Bruă lăi pơhing, lăi pơhư̆č hơdôm gơnam ƀơi plơi pla ăt kah hăng hơdôm gơnam bôh thâo đưm djuai ania truh hăng djop mơnuih lĕ tơlơi kiăng biă, biă ñu amăng rơnuk măi mok 4.0 kah hăng ră anai.

Rơngiao kơ bruă gum hrom bruă đah kơmơi mơng plơi pla, bruă đang hmua, yă Nguyễn Thị San pioh mông kiăng hyu hơduah ĕp, djă pioh glăi hơdôm tơlơi adôh then, adôh cọi đưm mơng Nghĩa Đô. Truh ră anai, ñu hmâo čih pioh glăi 119 mơta tơlơi adôh cọi đưm mơng plơi pla pô hăng čang rơmang amra pơtô glăi brơi kơ ƀing hlăk ai amăng pơgi kơdih anai, kiăng bĕ rơngiă hĭ er adôh mơng ơi yă đưm. Biă ñu, amăng rơnuk phrâo 4.0 ră anai, bruă lar hyu hơdôm nua yôm bôh thâo phiăn juăt djop djuai ania hmâo jing amuñ hloh lu biă.

Tơbiă mơng plăng mơnuih mơnam kah hăng: Facebook, Zalo, YouTube, TikTok jing laih jơlan djru yôm phăn amăng bruă tô nao rai, lar hyu hăng pơgang nua yôm bôh thâo đưm nao hrom hăng pơlar bruă tuai čuă ngui kơ neh wa Tày. Tui hăng nai prin tha Nguyễn Anh Cường – Khua Anom bôh thâo djuai ania ƀiă (Sang hră đại học pơtô bôh thâo adôh suang Hà Nội), ră anai tơlơi bơdjơ̆ nao mơng măi mok 4.0 hmâo hăng glăk hmâo tơlơi pơplih djop mơta mơng tơlơi hơdip ană mơnuih. Lom ƀing ta thâo tŭ mă anô̆ gal hă pran lar hyu truh djop plơi pla ană mơnuih amăng kual, đa lĕ ƀơi đơ đam rŏng lŏn tơnah dong, amra amuñ amĕ hloh lu biă:

“Ăt hmâo mơn lu hơdră pioh pơgang, lăi pơhư̆č samơ̆ tui hăng kâo yôm phăn hloh ăt lĕ bruă djă pioh glăi hơdôm gru rŭp. Anun lĕ hơdôm gru rŭp khom pơplih mrô. Hăng hơdră măi mok 4.0 ră anai lĕ bruă lăi pơhư̆č kơ băn ao, kơ bôh thâo djuai ania lĕ amuñ biă hăng lu hơdră pha ra, jơlan gah pha ra. Ăt amuñ brơi kơ bruă lar hyu hơdôm tơlơi pơhing anun. Bơ̆ hlâo adih mơ-ĭt sa pok rŭp hyu tơnap biă, ră anai ta kơnong kơ clik mă ha sa thâo mơtăm”.

Ră anai facebook, tiktok glăk ngă pơhư̆č lu mơnuih amăng đơ đam rŏng lŏn tơnah mă yua, yua kơ hơdôm anô̆ hơdeč hmar mơng ñu kah hăng like, share, follow, livestream... hmâo pơjing laih anih anom klă pioh tô nao rai, lar hyu bôh thâo đưm. Hơdôm plăng fanpage mơng anun ăt dưi pơdŏng mơn tui rim akô̆ bruă rơđah kah hăng fanpage kơ adôh then, adôh cọi, ƀudah băn ao mơñăm djuai ania, gơnam ƀong mơng djuai ania... Pơ̆ anun, nao hrom hăng bruă lăi pơthâo, lăi pơhư̆č bôh thâo đưm, jing hơdră pơlar bruă tuai čuă ngui kiăng pơđĭ tui nua yôm gru grua, djru pơtrut tơlơi pơđĭ kyar bơwih ƀong.

Tui amai Đồng Thị Vân Hà, djuai ania Tày ƀơi plơi prong Bắc Kạn (tơring čar Bắc Kạn), ră anai hơdôm gơnam bơdjơ̆ nao truh bôh thâo djuai ania kah hăng: băn ao, tơlơi adôh đưm ƀudah hơdôm gơnam mơng mơñăm bung bai mơng djuai ania ƀiă jai hrơi jai dưi lăi pơthâo sa hơdră lu mơta, lu djuai tui plăng mơnuih mơnam (facebook). Bơhmutu ñu, abăn ao, pơ ala kơ nao jơnum ngui pơdah lăng ƀudah ba mut hơdôm homestay pioh lăi pơhư̆č, lăi pơthâo truh hăng tuai čuă ngui. Lu gơyut hlăk ai djuai ania Tày hmâo ba tơbiă hơdôm gơnam anun hăng dlông măi mok điện tử, laih anun ba đĭ hăng dlông facebook, zalo, tiktok kiăng lăi pơthâo truh hăng djop mơnuih kơ băn ao đưm. Samơ̆ anai ăt lĕ hơdră gơñu glăk lăi pơhư̆č bôh thâo đưm djuai ania, gơnam tam mơng neh wa djuai ania Tày. Amai Đồng Thị Vân Hà brơi thâo:

“Ƀơi plơi prong lu mơnuih hmâo tơlơi juăt blơi gơnam amăng plăng facebook, kâo ăt ngă juăt mơn hăng hơdră phrâo măi mok, hrom hăng ƀing gŏp tha muai, anet prong čơphin rŭp gơnam kiăng ba đĭ hăng dlông facebook, hăng čang rơmang gơnam pô ngă rai ƀu djơ̆ kơnong kơ ƀơi plơi pla, amăng tơring čar, amăng lŏn ia ôh mơ̆, dô̆ anăp nao ataih hloh dong lĕ amra sĭ kơ dêh čar tač rơngiao”.

Ră anai, tơlơi pơđĭ kyar mơng plăng mơnuih mơnam luh gah guai lŏn ia hmâo pơjing laih tơlơi gal pioh bơkơtuai nao rai hăng jar kơmar hmâo tơhnal gal pok prong, hăng pran kơtang gah bôh pơhiăp čar arăng hăng bruă thâo tañ, lu mơnuih hlăk ai ruah hơdră pơjing hơdôm plăng YouTube hăng bôh yôm lăi pơhư̆č bôh thâo, tuai čuă ngui Việt Nam hmâo lăi pơblang tơlơi Anglê djru gơyut gơyâu hơdôm bôh dêh čar amuñ amĕ ngă juăt, tŭ mă. Lu plăng dưi ngă tui truh kih, sit nik jing hơdôm anih anom bôh thâo đưm dưi hmâo mơnuih lăng amăng lŏn ia pô hăng mơng dêh čar tač rơngiao đing nao./.