VOV4.Jarai - Lăi nao hơdôm añăm ƀong mơng djuai ania Êđê rơngiao kơ hơdôm añăm ƀong jơman mơng glai rưng hơmâo wŏt hơdôm añăm ƀong mơng bơnga, anun lĕ bơnga boh pơneh, bơnga kơnôk, boh mông…Mơnuih djuai ania Êđê yua hơdôm bơnga anai kiăng kơ hơbai añăm, jing añăm ƀong pơjrao amăng drơi jăn tŭ yua biă mă. Amăng anun ƀu kơƀah ôh añăm ƀong jơman mơng bơnga muai.

Amăng blan 4, blan 5 lĕ bơyan bơnga muôi bluh đĭ lăng hiam biă mă. Mơnuih djuai ania Êđê juăt mut nao amăng glai rưng bơyan anai kiăng kơ pĕ bơnga muai. Mơng đưm đă ră hlâo mơnuih djuai ania Êđê thâo hơbai hơdôm añăm ƀong mơng bơnga muai. Yua anun rup rap añăm muôi ăt lăi nao amăng hơdôm boh pia hăng tơlơi adôh pơtưh mơng djuai ania Êđê. Phun ñu čăt amăng glai hăng kơnong bluh bơnga tơdơi kơ tal hơjan amăng akŏ bơyan tơjŭ pla.

Bơnga muai

Ƀu djơ̆ kơnong anŏ hiam mơng glai rưng ƀơi kual Dap kơdư đôč ôh mơ̆ amăng hơdôm mông ƀong huă hơmâo añăm ƀong mơng bơnga muai amra ngă rơgoh gô̆ asơi mơtăm yơh. Amai H’Lai H’đơk, dŏ ƀơi ƀuôn Čuôr Knia, să Ea Bar, tơring glông Buôn Đôn, tơring čar Dak Lak brơi thâo, añăm muai juăt hơbai jing hơdôm añăm ƀong jơman. Tơdơi kơ pĕ glăi arăng amra lôk hĭ hơđuh tha jum dar bơnga, pioh glăi kơnong gor mơda amăng lăm. Anai lĕ anih ƀong jơman hloh mơng bơnga muai pioh kơ hơbai añăm ƀong.

“Hơbai blung hlâo lĕ rao rơgoh, tuk brơi tơsă, laih anun pioh brơi kơ ñu khŏt ia laih dong ñeč hăng boh ngu. Dua dong lĕ, ƀing ta tuk, yong hĭ truh khŏt ia, tơdơi anun hơnia hăng akan tuk, ƀudah akan krô, dưm pơhăng dong ƀong jơman biă mă”.

Bơnga muai

Laih dong, gor amăng lăm ƀing ta ăt tuk, uh tơsă ƀudah hơnia hrŏm hăng pruăi mơnŭ amra ƀâo mơngưi phara mơng añăm muai, gor mơda ƀing ta kĕ ƀong amuñ biă mă. Gor añăm muai dưi ñeč mơtah ƀudah om tơsă grŏm hăng akan krô, pơhăng hra ngok ñeč hrŏm jing añăm ñeč. Ayong Y Đăp Êya, dŏ ƀơi ƀuôn Nui, să Tâm Thắng, tơring glông Čư̆ Jut, tơring čar Dak Nông brơi thâo, hlâo adih, rĭm wŏt nao pơ hmua, mơnuih ƀon sang amăng plơi pla pĕ glăi ha hơbai rêu ba glăi hơbai añăm. Samơ̆ ră anai, yua kơ hơmâo lu mơnuih blơi glăi pioh hơbai brơi kơ tuai, yua anun mơnuih ƀon sang nao pĕ lu kiăng kơ sĭ hơmâo dong prăk pơhrui. Yua anun añăm muai ră anai ĕp tơnap biă mă.

“Añăm muaii čăt tui hluai kual. Tui hluai pran hor ƀing ta amra hơbai phara. Kơnong kâo pô, kâo hor tuk laih anun ñeč hăng boh ngu, rơsun toi. Ră anai añăm muai anai ĕp tơnap biă, nao ataih kah mơng hơmâo”.

Bơnga muai tuk, ñeč hăng boh bơngu, rơsun toi

Bơnag muai bluh đĭ sa wŏt ha thun, ăt kơƀah biă mă tơdah mut nao plơi pla mơnuih djuai ania Êđê amăng bơyan anai mơ̆ ƀu dưi ƀong añăm hơbai mơng bơnga muai. Añăm ƀong mơng glai rưng, hơdjă, ƀu djơ̆ kơnong pơdah rup rap hiam brơi kual Dap kơdư đôč ôh mơ̆ ăt jing añăm ƀong jơnum mơng glai rưng dong.

Siu Đoan: Pơblang