Hơdôm hrơi akŏ bơyan bơnga, lơ̆m rơhuaih bruă pơ hmua, yă H’Lep Niê (juăt iâu Amĭ Khuýt), dŏ ƀơi plơi Buôr, să Hòa Xuân, plơi prong Buôn Ma Thuột dŏ ƀơi không mrai ñu yơh. Ñu glăk mơñam abăn hăng gru bơnga kơđŏm pơčeh mă phrâo. Anai jing bơnga đưm, ƀu juăt ƀuh đơi ôh, ñu phrâo hrăm tui arăng mơn.

“Mơnuih djuai ania Êđê hơmâo lu gru bơnga kah hăng bơnga pơđuăi glông dua, kuet kueo, pơčruar nao rai, rup than kyâo, hơmâo lu mơta yơh. Hơdôm gru bơnga anun lĕ kâo mơñam laih. Bơ ră anai kâo sem lăng hơmâo gru bơnga phrâo hơget lĕ kâo hrăm tui dong, mah kâo tha yơh samơ̆ ăt kiăng thâo lu hloh, anun jing kiăo tui hrăm amăng grup dong”.

Anih pơtô mơñam mrai yua yă H Bion Bkrông (juăt iâu yă K’dăm Săn) ƀơi ƀuôn Čư̆ Dluê, să Hòa Xuân pơtô brơi. Rơbêh 60 thun laih, yă H’Bion hơmâo giăm 50 thun mơñam mrai. Ñu amra pơtô glăi hơdôm tơlơi ñu thâo kơ ƀing adơi amai kiăng hrăm djă pioh hăng pơtrut tui bruă mơñam đưm.

“Kiăng hiam drơi jăn đôč yơh či pơtô ba adơi amai, ană tơčô thâo mơñam, thâo pơhrua mrai, thâo rơngaih, thâo čơkăp sit eng ao. Kâo amra pơtô bruă duñ mrai, jruk bơnga, yong ayul bơnga, yong prư̆, yong bơnga, mơ̆ng bơnga anet truh kơ bơnga prong tơnap hloh. Tal dua lĕ kiăng ană tơčô hơmâo pran, hor kơ bruă mơñam mrai kiăng djă pioh na nao”.

Anih pơtô hrăm jing sa amăng hơdôm bruă mă mơ̆ng grup mơñam mrai djuai ania Êđê ƀuôn Drai Hling, să Hòa Xuân. Tui anun, tơdơi kơ akŏ pơdong amăng blan 9 thun 2023, Grup hơmâo pơƀut giăm 30 čô adơi amai amuaih mơñam mrai, kiăng hrăm mơñam, pơtrut tui bruă mơñam eng ao. Ƀing adơi amai hơmâo ƀing kơhnâo pơtô mơñam, pơtô rơngaih, jruk bơnga, akă ayul, yong pơglưh. Hrŏm hăng hăng anun, grup hơmâo djru không mrai, măi tơčoh...kiăng ƀing adơi amai hrăm bruă. Amai H'Nga Byă, Khua grup brơi thâo:

“Pơ anăp anai kâo amra jak iâu adơi amai pơƀut mơñam eng ao, kơdung bak, tuai, abăn mơsum hŭi kơ wơr hĭ gru ama grua amĭ ta đưm”.

Tui hăng ơi Từ Văn Hợi, Khua Jơnum min mơnuih ƀôn sang să Hòa Xuân, bruă akŏ pơdong Grup gru grua, bơkjăp drơi jăn hăng tuai čuă ngui Dak Lăk kơ akŏ bruă “Pơgang, pơtrut tui gru grua hiam mơ̆ng djŏp djuai ania ƀiă pơlir hăng bruă pơđĭ kyar tuai čuă ngui”, gah jơlan hơdră dêh čar pơtrun pơđĭ kyar bơwih ƀong huă mơnuih mơnam kual mơnuih ƀôn sang djuai ƀiă hăng čư̆ siăng, rơwang thun 2021-2030. Tơlơi gơñăm nao mơ̆ng tơring čar lĕ amra pơtrut tui gru grua pơlir hăng tuai čuă ngui amăng plơi pla.

“Akŏ pơdong grup mơñam mrai kiăng pơtrut tui gru hiam hăng anăp nao sui thun dong anun lĕ pơđĭ kyar tuai čuă ngui, pơƀuh gơnam tam, gru grua hiam mơ̆ng djuai ania Êđê ƀơi să Hòa Xuân, djru mơnuih ƀôn sang djuai ƀiă ƀơi tơring čar, plơi prong pơƀuh hyu gru grua hiam mơ̆ng mơnuih ƀôn sang djuai ƀiă djă pioh, răk lui”.

Bơyan bơnga anai, jua mơñi mơñam mrai pơrơklek glăk hơmâo ƀơi sang glông mơ̆ng adơi amai djuai ania Êđê či să Hòa Xuân, plơi prong Buôn Ma Thuột. amăng hrơi mông mơ-ak mơ-ai bơyan bơnga, jua mơñi jring jring, tơngan rơguăt mă mrai glăk mơñam rai ia iom hiam ƀhêm ƀơi hơdôm blah eng ao Êđê.