VOV4.Jarai - Mơguah lơ 6/6, Gơnong bruă bôh thâo bơkơjăp drơi jăn tơring čar Quảng Bình pok phun pơdă prưng hăng pơdă hơdrôm hră, rŭp hăng anăn ñu “65 thun Quảng Bình ngă tui tơlơi Wa Hồ pơtô” ƀơi Sang djă pioh gru grua tơring čar. Bruă pơdă prưng hmâo pơdă laih giăm truh 1000 pok rŭp, hơdrôm hră, hră pơ-ar yôm hmâo anăn ñu “65 thun Quảng Bình ngă tui tơlơi Wa Hồ pơtô”.

Bôh yôm pơdă prưng lăi nao tơlơi hơdip, bruă mă hăng hơdôm pran jua tuh rơyuh prong prin mơng Khua mir sir Hồ Chí Minh pioh kơ bruă ngă hơkrŭ mơng Ping gah, mơng djuai ania ta. Bruă pơdă prưng kiăng djru pơtô juăt tơlơi pơmin bruă hơkrŭ, gru grua phiăn khăp lŏn ia kơ rơnuk hlăk ai, rŭ tơgŭ pran jua ư-ang, pơpŭ djuai ania; pơtrut hơdôm gưl mơnuih ƀôn sang Quảng Bình mă bruă hăng tuh rơyuh pran jua pơdŏng plơi pla jai hrơi jai rơgơi mơbruă, tâ̆o yâu, pơdrong asah./.

Siu H’ Prăk: Pơblang