Tui hăng Gơnong bruă Gru grua, Pơrơguăt drơi jăn hăng Tuai čuă ngui tơring čar Lâm Đồng, rơnoh tuai hyu ngui, ĕp lăng, dŏ glăi amăng bơyan anai hơmâo laih năng ai 650.000 wơ̆t, amăng anun tuai mơ̆ng tač rơngiao năng ai 30.000 wơ̆t; prăk pơhrui mơ̆ng bruă čơkă tuai truh 1.200 klai prăk. Hnơ̆ng apah dŏ anih pơdơi, sang jưh tuai mơ̆ng 70-80%, kơnong kơ hơdôm anih jưh hiam hnơ̆ng pơkă mơ̆ng 3-5 asar pơtŭ, tuai mut dŏ mơ̆ng 85-90%.

Kiăng bơwih brơi kơ ƀing tuai hyu ngui, tơring čar Lâm Đồng hơmâo pok pơhai sa amăng plĕ hơdră pơhlom klă bruă bơwih bơwăng kơ ƀing tuai, kiăng mơak klă, rơnuk rơnua, biă mă ñu đuăi hyu amăng jơlan glông, rơnăk ayuh hyiăng anih hơdip jum dar hăng pơhlom mơnong ƀong huă hơdjă rơgoh. Djop sang sĭ mơdrô ba tuai hyu ngui khom ngă tui djơ̆ bruă ƀlir pơtep lui rơnoh apah ba hyu tuai hăng sĭ mơdrô mơnong ƀong huă djơ̆ lăp, ƀu lui ôh hơmâo tơlơi pơđĭ trun nua tă tăn,  hơdui ba, pơgô̆ ƀing tuai hyu ngui, kiăng ngă tui tơlơi hiam mơak čơkă tuai jĕ giăm pơhiăp nao rai rơhmač.

Đà Lạt ăt jing anih pơhưč lu sang anŏ tuai ƀing tuai ruah či nao pơdơi pơdă, hyu ngui. Ayong Lê Văn Trọng, tuai mơ̆ng Dak Lak nao ngui lăi:

 “Tơlơi mưn amăng pran jua kâo ƀuh arăng jum tuai hiam mơak biă, anih dŏ, anŏ ƀong huă truh pơ sang jưh tuai laih anun anih anom hyu ĕp lăng lêng kơ lăi pơthâo rơđah rơhmač soh hăng ƀing tuai rơnguai. Lơ̆m rai ngui pơ đang bơnga anai, kâo ƀuh hơmâo tơlơi pơblih phrâo hiam hloh mơ̆ng tơring čar Lâm Đồng phrâo, hrŏm hăng pơblih phrâo amăng lŏn ia, yak nao amăng thun 2026”.

Lơ̆m anun, kual gah ngŏ tơring čar Lâm Đồng ăt hơmâo čih pioh tuai nao ngui lu. Ayong Nguyễn Thành Công, tuai mơ̆ng ƀôn prong Hồ Chí Minh brơi thâo:

“Kâo ruah anih hyu ngui ƀơi Phan Thiết hăng Mũi Né dŏ glăi. Kâo hơmâo nao pơ Suối Tiên, Sang pơdă tơpai vang, đĭ rơdêh jeep, đĭ song nan đưm….laih dơ̆ng pioh mông pơdơi pơdă mơak rơnang blang đôč. Tal hyu ngui anai akŏ thun phrâo kâo mơak biă mă kiăng găn rơgao amăng lŏn mơnai glai klô”.

Ƀrô tal anai, lu bruă mă ngui ngor gru grua mơak-pơphul lu mơnuih ngă hrŏm arăng pơphun mơak biă mă kah hăng Countdown-Mơak čơkă thun phrâo 2026 ƀơi Đà Lạt, Mũi Né hăng kual gah yŭ Lâm Đồng; hrŏm hăng jơlan hơdră adoh suang, ngui ngor mơak amăng djop kual, anih tuai hyu ngui kơdok kơdor soh. Biă mă ñu, Lâm Đồng pơphun čơkă mơak rơdêh por blung a plĕ trun thun 2026, čơkă 200 čô tuai, djru pôr pơthâo rup rap anih hyu ngui mơak rơnuk rơnua, jĕ giăm.

Yua hơmâo prăp rơmet tong ten, tuai hyu ngui ƀơi Lâm Đồng ƀrô amăng hơdôm hrơi pơdơi čơkă thun phrâo 2026 hơmâo ngă lăp pran jua ƀing tuai hyu ngui, pơdơi pơdă mơak hlak. Mơ̆ng hơdră pơphun anai, Lâm Đồng pơkă tơhnal kiăng čơkă 25 klăk tuai amăng thun 2026, pơtong rơđah anih tuai hyu ngui hiam hăng pơhưč hloh amăng dêh čar ta.