Hơdôm hrơi anai, ƀuôn Akŏ Dhong, plơi prong Buôn Ma Thuột ƀuh dik dak tuai čuă ngui amăng tơring čar, mơng tơring čar pơkŏn hăng mơng tač rơngiao glăi ƀong tê̆t. Tơdơi kơ 30 thun ataih mơng plơi pla, amai Nguyễn Kim Nguyên mơnuih dŏ hơdip pơ dêh čar Mi ăt hok mơ-ak mơn hăng hơdip tơlơi pơplih mơng plơi pla, hăng tơlơi ngă mơ-ak hloh lĕ tơlơi pơplih mơng plơi pla, glăk hrưn đĭ pơplih phrâo laih dong djă pioh gru grua. Dŏ mơñum kơphê amăng sang Arul House, amai Nguyễn Kim Nguyên brơi thâo:

“Lơm kâo rai pơ anai kâo hor biă mă. Ƀơi anai jum dar lăng hiam biă mă, kar hăng đưm hlâo adih…djop mơta hiam soh…ngă mơ-ak amăng pran jua”.

Lơm lu mơnuih glăk amoaih yua hơmâo tơlơi mut hrŏm yôm phara ƀơi Arul House, mơnuih rơgơi kơhnâo Vũ Lân, mơnuih hơmâo rơbêh 40 thun pơlir hăng bruă kơsem min, djă pioh gru grua kual Dap kơdư, ƀuôn Akŏ Dhong hăng anih djă pioh gru grua Arul House ăt lĕ anih tŏ tui gru grua. Ñu brơi thâo gru grua čing hơgor ƀơi kual Dap kơdư ƀu djơ̆ hơnong đôč ôh mơ̆ kiăng hơdip tŏ tui pơ anăp. Sit biă ñu Arul House hăng ƀuôn Akŏ Dhong ăt pơdah anai lĕ sa amăng hơdôm anih yak nao kiăng gru grua kual Dap kơdư tŏ tui mut hrŏm amăng tơlơi hơdip phrâo:

“Ƀu djơ̆ kơnong lĕ djă pioh tui hơđăp đôč ôh ăt kiăng pơčeh pơjing ra sa anih djă pioh ƀơi Arul, hơmâo mă yua hơdôm gơnam yua tui sô hơđăp anun lĕ kyâo, kram, ale pơdah djơ̆ hăng tơlơi hơdip mơda, kah hăng tơlơi čang rơmang mơng mơnuih ƀôn sang hăng ră anai ƀing gơñu hơmâo dưm jum dar anai kiăng pơdah tơlơi pơplih samơ̆ ăt lăp djơ̆ mơn. Tơlơi anai mut hrŏm amăng bruă pơđĭ kyar bơwih brơi tuai čuă ngui ba glăi prăk pơhrui kơ neh met wa amăng plơi pla”.

Arul House lĕ anih dŏ hơdip kơ djop rơnuk kơnung djuai sang anŏ yă H’Len Niê, ƀuôn Akŏ Dhong, phường Tân Lợi, plơi prong Buôn Ma Thuột. Yă H’Len, sa čô đah kơmơi juăt ngă đang hmua mơn, tơngan juăt djă čong, bra gui rêu rô, yua kơ hor djă pioh gru grua mơng ơi yă, ñu hơmâo man pơdong sang kiăng kơ djă pioh gơnam yôm tui gru grua djuai ania Êđê hăng dŏ ƀong huă gơnam tơnă hơbai mơng djuai ania Êđê.

“Yua kơ pran hor amoaih, kâo ăt pơmĭn ngă tui tơlơi ta kiăng đôč mơ̆ ƀu djơ̆ lĕ anih bơwih ƀong ôh. Tơlơi anai brơi ƀuh gru grua yôm pioh glăi mơng ơi yă. Yua Arul lĕ tơlơi bơră ruai glăi tơlơi hơdip mơng H’Len, Arul lĕ anăn ama H’Len. Kâo pơmĭn kâo lĕ rup rap kơ amĭ ama, ăt lĕ ană mơnuih hơdip amăng lŏn ia Việt Nam, ƀing ta anăm ngă sat rup rap ơi yă, lŏn ia ta pô, ƀing ta kiăng pơdah hăng pran gir run mă bruă hăng tơlơi pơ-ư ang”.

Pran khăp hăng gru grua djuai ania Êđê, amoaih gru grua sang anŏ, kơnung djuai hăng plơi pla, anai lĕ tơlơi pơtrut H’Len Niê pơdong anih djă pioh gru grua Arul House. Hăng pran gir run kơtang hloh hơmâo lu tơlơi gum djru, đah kơmơi ngă hmua amăng ƀuôn Akŏ Dhong dưi pơdong sang Arul House yôm phara djuai ania Êđê. Lơm pơdong giong, H’Len Niê dong ƀơi anăp lu tơlơi glêh tơnap mơn, anun lĕ prăk kak kiăng djop brơi Arul House tŏ tui na nao. Laih anun ñu bưp Trần Thị Châu Phương, mơnuih hơmâo tơlơi găn rơgao amăng bruă bơwih brơi tuai čuă ngui ƀơi Hội An hăng ƀôn prong Hồ Chí Minh. Hăng ră anai, Trần Thị Châu Phương lĕ ngă Khua wai lăng Arul House.

“Lơm anun kâo weh nao čuă amai H’Len kar hăng sa čô tuai hyu čuă ngui đôč. Kâo ăt pơmĭn yua hơget sa čô đah kơmơi djuai ania Êđê gir ktir kar hăng anun, hăng kâo pô lĕ tuai čuă ngui kâo lăng tơlơi anai yôm biă mă, anun kâo gum hrŏm hăng amai H’Len. Sit biă ñu kâo ăt aka ƀu ngă hơget ôh prong brơi Arul, kâo ƀuh amăng plơi pla tơlơi hơdip mơ-ak, pơplih phrâo samơ̆ aka ƀu dưm dăp glăi đôč. Dŏ amăng sang ană plơi pla ƀong huă hiưm pă, hrơi ngă yang, ngui ngor tơnă hơbai hiưm pă, kâo lĕ mơnuih dưm dăp brơi kiăng kơ hiam tui gru grua hơđăp. Mơng rĭm čô mơnuih pơgôp glăi dưi pơjing rai Arul rĭm hrơi”.

Ră anai Arul House jing sa amăng hơdôm anih juăt nao čuă ngui mơng lu mơnuih amăng lŏn ia hăng tač rơngiao, lơm nao pơ plơi prong Buôn Ma Thuột. Amăng sa hrơi plơi prong Buôn Ma Thuột hơđong trun, arăng amra tŏ apui ƀơi lan sang Arul House. Jua čing hơgor, tơlơi adôh Eirei rơnang mơ-ak hăng abih bang apăn tơngan ayun suang, ngă tơlơi hơdip jê̆ giăm tui hăng mơnuih amăng ƀuôn Akŏ Dhong hrŏm hăng tuai mơng ataih giăm pơjing rai sa anih ngui ngor mơ-ak.