Anai jing tơlơi pơhing hơmâo lăi pơthâo amăng mông jơnum pơphun tlam tom brơi (lơ 12/3) gah rơngiao mông Jơnum ngui kơphê Buôn Ma Thuột tal 9. Tê̆t Bunpimay jing tơlơi ngui ngor ngă yang yôm biă mă amăng sa thun mơ̆ng djuai ania Lao, jing hrơi mông pơdah pran jua pơpŭ hăng Ơi phơ̆t hăng ơi yă đưm. Him lăng Tê̆t Bunpimay Lao thun Phật lịch 2568 amra pơphun mơ̆ng lơ 12-13/4 pơ anăp ƀơi ƀuôn Trí, să Krông Na, tơring glông Buôn Đôn.

Jing jơlan hơdră jơnum ngui prong hloh kơ mơ̆ng hlâo, Tê̆t Lao thun anai amra hơmâo lu bruă ngui ngor mơak kah hăng: Ngă yang thun phrâo, Ngui phai apui kơđen dian amăng ia, Ngă yang akă hrĕ ƀơi tơngan, Rơbat pơtrui tơkung Hơbia bơyan bơnga, Tơlơi pơplông “Dra hiam Bunpimay”, pơplông hơtuk rơyă 100 mơta añăm ƀong jơman kual Dap Kơdư, Ngui kơsăi ia, ngui pơdong rơnưh, brơi rơman ƀong Buffet hăng lu jơlan hơdră adoh suang pơkŏn dong./.