Tal pơdă rup, hră pơar anai anăn “Thun blan aka ƀu ataih-Gia Lai-KonTum tơdơi kơ thun 1975” pơphun pơdă ƀơi tơdron lăk Gum pơgôp prong, plơi prong Plei Ku, hơmâo dưm 150 pok rup, hră pơar gơnam gru grua lăi nao tơlơi hơdip mơda mơnuih ƀôn sang Gia Lai-Kon Tum amăng hơdôm thun blan tơdơi kơ pơklaih rơngai. Hơdôm pok rup pơƀuh rơđah tơlơi dŏ dong ƀong huă, bruă mă, hrăm hră pơar hăng bruă amăng ƀirô....lăi pơthâo pran jua tơgŭ mă bruă khin hơtai, gir run găn rơgao tơlơi tơnap tap mơ̆ng ană plơi pla tơdơi kơ lŏn ia pơklaih rơngai.

Ƀơi sang bruă djă pioh gơnam gru tơring čar Gia Lai,pơdă rup anăn “Gia Lai 50 thun man pơdong hăng pơđĭ kyar” lăi pơthâo hơdôm boh pia: Ia iom gru grua hiam Gia Lai; Gia Lai amăng bruă tơgŭ hơkrŭ pơklaih rơngai djuai ania; 50 thun man pơdong hăng pơđĭ kyar. Pơdă rup anai pơƀuh gru grua khin hơtai hăng boh tơhnal bơwih ƀong huă, gru grua hiam, mơnuih mơnam, pơgang rơnuk rơnua, pơhlôm hơđong dêh čar ƀơi tơring čar, laih dơ̆ng pơtong sit tơlơi đăo kơnang nao Ping gah git gai. Tŏ tui dơ̆ng, pơdă rup anăn” 50 thun anom bruă khul pơčeh hơ̆k hơr adoh suang tơring čar Gia Lai”pơdă 80 pok rup hiam, čơphil pioh djop mơta 120 ring bruă kơsem min boh thâo ia rơgơi, tơlơi ră ruai đưm mơnuih ƀôn sang. Lu bruă ngă pok bah amăng mut ĕp mơ̆ng ră anai truh lơ 4/5  pơ anăp pơdơi.