Amai Ka Bông (djuai ania K’ho Sre) ƀơi plơi Phú Bình, să Phú Hội, tơring glông Đức Trọng, tơring čar Lâm Đồng hmâo 2 čô ană. Ñu ƀuh amăng pran jua bơngot biă huĭ tơdơi anai ană pô amra wor bit hĭ bôh pơhiăp amĭ ama pô ƀă ơi yă pơjing, ñu čang rơmang dua čô ană ñu khom thâo pơđok, thâo čih bôh hră K’ho pô. Amai Ka Bông pơdah pran jua:

 “Hrơi anai plăng mơnuih mơnam pơlar kơtang, yua anun bôh pơhiăp K’ho mơng pô ƀu hmâo lu mơnuih hmư̆ dong tah… Kâo čang rơmang dua čô ană kâo khom djă pioh phun akha ơi yă mơng pô anun lĕ thâo pơđok thâo čih tơlơi pơhiăp djuai ania pô”.

Adơi Lơ Mu Nay Sa “K’ho Čil, tơkeng thun 2002), ƀơi plơi Srê Đăng, să N’Thôl Hạ, tơring glông Đức Trọng, tơring čar Lâm Đồng ră anai lĕ čơđai gưl dlông thun tal 3, Anom pơtô pơhrăm gưl sa, Sang hră Đại học Tây Nguyên, brơi thâo, ƀơi plơi ñu ră anai ƀu dô̆ atông čing hơgor hăng adôh tơlơi adôh đưm amăng hơdôm hrơi jơnum ngui dong tah. Đa lĕ hơdôm mơnuih atông čing hơgor ăt yua tơlơi yuan mơn kiăng ră ruai nao rai tơdruă. Băn ao djuai ania pô ƀiă đô̆č čut ñu. Lom ñu dô̆ anet lĕ ăt dô̆ hmư̆ mơn yă atông hơgor, atông čing,… truh prong, yă rơngiă lĕ hlong djă ba hlao hăng hơdôm gru rŭp anun kơnong kơ dô̆ djă pioh glăi amăng tơlơi pơmin ñu đô̆č. Adơi Lơ Mu Nay Sa, ƀuh ƀlok glăi biă:

 “Kâo čang rơmang amăng hơdôm mông jơnum ngui, ƀing tha plơi, khua ƀôn, hơdôm mơnuih thâo hluh kơ phiăn juăt djuai ania pơtô glăi kơ ƀing gơmơi, kiăng ƀing gơmơi hmâo tal hrăm tui hăng tô̆ tui phiăn juăt bôh thâo klă hiam anun mơng djuai ania pô. Ăt kah hăng tơdơi anai kâo amra pơtô glăi kơ rơnuk pơgi kơdih anai djuai ania pô kiăng huăi rơngiă tui hăng rơngiă hĭ”.

Kiăng ngă tui pran kơtang gum hrom hơbit abih bang djuai ania, tơring čar Lâm Đồng hmâo pơtrut kơtang laih bruă hyu lăi pơhing kơ nua yôm bôh thâo djop djuai ania, pơđĭ tui pran ư-ang kơ hơdôm brua yôm bôh thâo; pơtrut pơsur mă yua hơdôm er adôh đưm, tơlơi suang đưm, gông brô̆ djuai ania… Tơring čar ăt hmâo tuh pơplai laih pơdŏng glăi lu phiăn ngă yang kah hăng Pơthi gah djuai ania K’ho ƀơi K’Long, tơring glông Đức Trọng, ngă yang Nhô Wèr gah djuai ania K’ho Sre ƀơi tơring glông Di Linh, phiăn ngă yang Nhô Rơhe (ba pơdai mut amăng atông) gah djuai ania K’ho Sre, tơring glông Lâm Hà, phiăn pơdô̆ rơkơi bơnai gah djuai ania K’ho Čil ƀơi să Dă Chais tơring glông Lạc Dương, …

 Adơi Ka Tảo, (K’ho Sre, tơkeng thun 1998), ră anai lĕ čơđai gưl dlông hrăm thun tal rơnuč Anom pơčrang lăng mač kơman, Sang hră Đại học Tây Nguyên brơi thâo: pơ̆ plơi pla kâo, plơi Kon Pàng, să Tân Thanh, tơring glông Lâm Hà, tơring čar Lâm Đồng, mơnuih ƀôn sang ăt djă pioh mơn gru grua bôh thâo djuai ania, čing hơgor hăng hơdôm phiăn jơnum ngui tui phiăn juăt mơng djuai ania pô ăt dưi djă pioh hăng ngă tui mơn, gơnang kơ anun ñu kah hăng dưi čơkă mă ia tơsâu rơ-ơ̆ amăng bơngat jua mơng hrơi tơbiă mơng kian amĭ. Adơi Ka Tảo, mơ-ak brơi thâo:

 “Pơ̆ plơi kâo, neh wa ăt dô̆ djă pioh mơn bruă atông čing, adôh tơlơi adôh đưm, brơi ƀing hlăk ai amăng plơi pla hrăm tui. Amăng hơdôm hrơi jơnum ngui kah hăng pơdô̆ rơkơi bơnai, mơ-ak thun tha rơma… ƀơi anai ƀing hlăk ai dưi hrăm hơdră atông čing, kâo ƀuh klă biă hăng tŭ yua lom dưi lăng ƀuh hơdôm tơlơi anun ƀơi plơi pla kâo”.

 Čơđai gưl dlông Ka Tảo čang rơmang bôh thâo djuai ania pô dưi pơdah amăng măi mok pôr pơhing lu hloh dong kiăng dưi hmâo ƀing hlăk ai thâo. Adơi Ka Tảo, lăi:

 “Kâo kiăng biă ƀing gơyut hlăk ai rơnuk anai adôh lu tơlơi adôh đưm bôh pia phrâo, suang adôh, hơdôm mông jơnum ngui bôh thâo djuai ania pô anun pôr lu amăng brô̆, tivi kiăng hmâo lu mơnuih thâo truh bôh thâo đưm djuai ania pô”.

 Bruă pơgang bôh pơhiăp, bôh hră čih mơng djop djuai ania ăt dưi hmâo hơdôm gưl gong gai ƀơi Lâm Đồng đing nao. Hơdôm bôh plơi pla ăt ba mut mơn amăng jơlan hơdră pơtô tơlơi pơhiăp, bôh hră čih mơng neh wa djuai ania ƀiă hơđăp ƀơi anai kơ čơđai sang hră djuai ania ƀiă K’ho lăi ha jăn, djuai ania ƀiă lăi hrom ƀơi hơdôm plơi pla hmâo lu neh wa djuai ania ƀiă dô̆ hơdip mơda hăng pơtô tơlơi pơhiăp, bôh hră čih mơng neh wa djuai ania ƀiă ƀơi hơdôm bôh sang hră đom lom pơtô čơđai djuai ania ƀiă.

Ră anai, amra lăng ƀuh ƀơi hơdôm bôh plơi pla K’ho lăi hrom, ƀôn lan Dăp Kơdư lăi ha jăn, hmâo laih lu gơyut hlăk ai hmâo hrăm hră dlông čang rơmang dưi tô tui phiăn juăt djuai ania pô. Tơlơi lăp yôm phăn ƀơi ƀing hlăk ai anai anun lĕ tơlơi thâo djơ̆ kơ nua yôm bôh thâo đưm. Kiăng gum hrom hăng ƀing gơyut hlăk ai djuai ania K’ho lăi ha jăn, djuai ania ƀiă ƀơi tơring čar Lâm Đồng lăi hrom, hơdôm gưl gơnong bruă apăn tâ̆o hloh pok hơdôm anih pơtô adôh đưm, atông čing hơgor, pok anih pơtô bôh hră djuai ania kơ ƀing čơđai kual hmâo lu neh wa djuai ania ƀiă ăt kah hăng ƀơi hơdôm bôh sang hră djuai ania ƀiă. Mơng anun djru kơ bruă djă pioh, pơgang hăng ngă tui nua gru grua phiăn juăt mơng djuai ania./.