VOV4.Jarai-Lơ 27/2, mrô mơnuih ƀă Covid 19 ƀơi Gia Lai tal blung a rơgao 1.100 čô sa hrơi. Khua mua kơnuk kơna tơring čar brơi čơđai sang hră gưl muai hăng gưl sa pơdơi hrăm pơ sang hră, dŏ hrăm pơ sang lăng amăng tivi budah komputer amăng plơi prong Plơi Ku, ngă tui mơ̆ng lơ 28/2.

Djop sang hră ăt ngă tui hơdră pơgang klin lăp djơ̆

Dua boh anih hơmâo lu mơnuih ƀă kman hloh lĕ, plơi prong Plơi Ku 356 čô hăng tơring glông Đak Đoa 198 čô. Khul khua mua git gai pơgang klin Covid 19 tơring čar Gia Lai lăi, ră anai lu mơnuih ƀă Covid 19 amăng plơi pla aka ƀu thâo mơ̆ng pơpă phun ƀă, yua mơnuih ƀôn sang ngă amưng amăng bruă pơgang klin, tơlơi anai yơh hơđuh rai klin kơtang. Yua kơ anun, khua mua git gai pơgang klin, rơkâo mơnuih ƀôn sang khom răng kơđiăng hloh samơ̆ kŏn bral hơngal, bơngơ̆t đơi ôh; ngă tui djơ̆ lăp tơlơi pơtô pơgang klin Covid 19 kiăng pơgang hơđong kơ ta pô.

Nay Jek: Pơblang