Ƀơi sang rung plơi Ia Gri, să Biển Hồ ƀuh lu mơnuih ƀôn sang hăng tuai rơnguai nao ngui hrŏm. Jua čing hơgor hmư̆ dik dak, pơmut hrŏm hăng hơdôm er gông brô̆ djuai ania. Mơnuih kơhnâo Rčom Chốt, rai mơng plơi Mrông Yô̆, să Ia Phĭ, tơring čar Gia Lai hok mơ-ak brơi thâo: “Kâo rai pơ anai djă ba gông ting ning, sa djuai gông brô̆ djuai ania, kiăng pơgôp ngui mơ-ak, pĕ brơi kơ neh met wa hăng tuai rơnguai hmư̆. Tơlơi anai ngă kâo hok mơ-ak ƀiă dong lĕ lơm ƀuh sang rung hơmâo pơdong giong hrŏm hăng ia iom hiam mơng bơnga ang.”

Hăng amai Mơ Ly, rai mơng Đăk Đoa, tơring čar Gia Lai, anai lĕ hrơi mông kiăng ñu dưi pơgôp tơlơi adôh, hrŏm hăng abih bang mut hrŏm jơlan hơdră hăng pơƀuh nao rai tơlơi mơ-ak amăng hrơi jơnum ngui. “Kâo hok mơ-ak biă mă lơm dưi mut hrŏm ngui adôh tơlơi adôh kual Dap kơdư, adôh pơpŭ kơ Ping gah. Kâo ăt hok mơ-ak yua hơmâo să Biển Hồ jak iâu nao mut hrŏm Festival atông čing hơgor thun anai. Bơnga ang hiam biă mă, kâo kiăng abih bang mơnuih thâo hăng rai ĕp lăng pơ anai.”

Đa hơmâo mơnuih nao pơ Čư̆ Đang Ya yua kơ hor ĕp lăng anŏ hiam mơng bơnga ang, đa hơmâo mơnuih kiăng hơduah ĕp tơlơi ngui gru grua, ăt hơmâo mơn mơnuih rai pơ anai kiăng nao lăng tơl anih hơdôm tơlơi mơ̆ hlâo anun ƀuh kơnong amăng rup rap đôč. Amai Y Nư mơng Kon Tum nao pơ Čư̆ Đang Ya hlâo kơ hrơi mông pơphun ngui. Ñu brơi thâo, hơdôm tơlơi pơhing lăi nao hrơi ngui anai ƀuh amăng plang mơnuih mơnam hăng hơdôm anom bruă pôr pơhing ngă lu mơnuih kiăng nao lăng, tơlơi anai ngă kơ ñu tui rai ĕp lăng tơl anih. “Anai lĕ tal blung a kâo rai pơ Čư̆ Đang Ya. Ƀuh arăng ba pơƀuh amăng plang mơnuih mơnam, anun lĕ pơ anai hơmâo tơlơi ngui ngor anun kâo ăt kiăng rai ngui hrŏm mơn. Kâo čang rơmang dưi ĕp lăng hơdôm tơlơi ngui, tơlơi adôh, tơlơi ayun suang, lăng arăng mơñam mrai hăng hyu lăng hơdôm čơgăn arăng pơdă gơnam ƀơi anai.”

Bơ tui hăng amai Lan, hrơi ngui bơyan bơnga ang hăng atông čing Čư̆ Đang Ya jing hrơi mông ĕp lăng yôm phăn mah ñu ăt dŏ hơdip ƀơi Gia Lai. “Kâo dŏ hơdip ƀơi Gia Lai 5 thun samơ̆ anai lĕ tal blung a kâo rai lăng hrơi ngui bơyan bơnga ang, ngui atông čing Čư̆ Đang Ya. Kâo hok mơ-ak biă mă. Sit biă ñu, bơnga ang buh hiam biă, ba glăi anih ngui pơhưč lu mơnuih. Tơdah hlơi aka ƀu rai ngui bơyan bơnga ang anai, ăt kiăng ha wŏt rai ngui kiăng thâo.”

Ƀu djơ̆ kơnong pơhưč lu mơnuih nao ĕp lăng, Festival atông čing hăng rơwang hrơi tơjuh ngui bơyan bơnga ang-Čư̆ apui kơdir Đang Ya ăt hơmâo tơlơi đing nao mơng ƀing mơnuih bơwih brơi tuai čuă ngui. Ƀuh ƀô̆ mơta ƀơi Čư̆ Đang Ya amăng hrơi ngui thun 2026, yă Phan Thị Thu Minh, Khua sa boh kông ti tuai čuă ngui ƀơi Hà Nội brơi thâo: “Ƀrô hrơi ngui bơyan bơnga ang thun 2026, kâo rai pơ anai kiăng ĕp lăng. Kâo čang rơmang, amăng thun anai, hăng bruă pơmut hrŏm hơdôm boh tơring čar, hrơi ngui bơyan bơnga ang amra kơđŏm glăi lu tơlơi mơ-ak brơi kơ tuai rơnguai lơm rai čuă ngui pơ Gia Lai.”

Amăng rơnuk yua boh thâo ia rơgơi, rĭm čô tuai ăt jing sa čô mơnuih pơƀuh brơi hơdôm anih čuă ngui. Sa pok rup hiam, sa video pơdar mă tơdơi kơ tal hyu čuă ngui amra ngă rup rap Gia Lai bang hyu hơmâo lu mơnuih thâo. Ayong Đức, sa čô mơnuih pơdar mă rup ngă tiktok rai mơng Đức Cơ brơi thâo: “Hrơi anai kâo rai pơ anai jing kar hăng sa čô mơnuih pơdar mă rup rap, kiăng kơ ĕp lăng hăng mut hrŏm hrơi ngui ngor. Kâo ƀuh abih bang mơnuih gir mut hrŏm biă, nao check-in, pơdar mă rup hiam laih anun ba pơƀuh amăng plang mơnuih mơnam kiăng mơnuih amăng lŏn ia hăng tač rơngiao ƀuh hơdôm anŏ hiam mơng Gia Lai. Kâo čang rơmang hơdôm rup rap pơdar mă amra pơƀuh brơi abih bang mơnuih thâo Gia Lai hiam hiưm pă ñu.”

Mơng Festival čing hơgor truh rơwang hrơi tơjuh ngui bơyan bơnga ang-Čư̆ apui kơdir Đang Ya, Gia Lai glăk hơmâo dong tơlơi gal kiăng bơră ruai glăi pô hăng hơdôm tơlơi yôm phara. Hăng rĭm čô mơnuih rai pơ anai, rĭm pok rup rap phĭn, pơdar pơƀuh, hơdôm tơlơi bơră ruai hơmâo lăi pơthâo amra jing tơlơi tơkuh nao rai kiăng ba anŏ hiam mơng kual lŏn anai jê̆ giăm ƀiă hăng tuai rơnguai./.