Festival anai dưi pơphun ƀơi phường Plei Ku, să Biển Hồ hăng hơdôm să, plơi pla tiơrng čar ieo gah tơring čar Gia Lai, iâu pơtum truh 1.500 čô mơnuih kơhnăk gru đưm nao pơdah hrŏm. Pok blung amăng tơlơi ngui ngor anai ƀơi să Biển Hồ dơ̆ng mơ̆ng kơnôl 30/10 truh kơnôl 1/11, hăng jơnum ngui pơphun ƀơi lan sang rung plơi Ia Gri. Tal pơdă sang čơ sĭ mơdrô gơnam hơmâo 30 čơgăn gơnam lăi pơthâo mơnong ƀong huă, gơnam OCOP, mơnong ƀong huă hơmâo phara hơjăn amăng plơi pla. Kơnôl 31/10, să Biển Hồ lăi pơthâo gơnam sĭ mơdrô kơ tuai hyu ngui amăng plơi Ia Nueng hăng rŭ glăi bruă ngă yang pơdong sang rung djuai ania Jarai ƀơi plơi Ia Gri. Amăng hrơi blan anai mơ̆n, pơplông đuăi anăn “Gia Lai City Trail-Tơlơi čang rơmang mơ̆ng lơ̆n glai čư̆ siăng” pơtruh brơi bruă mă pơrơguăt drơi jăn hăng hyu ĕp anih anom hiam lơ̆n glai ƀơi tơring čar.

Mơ̆ng kơnôl 6 truh kơnôl 8/11, lu bruă mă pơphun ƀơi phường Plei ku, hơmâo tơlơi ngui ngor rŭi hyu rơbat pơtrui amăng jơlan phun, adoh suang gru grua đưm, lăi pơthâo mơnong ƀong huă, gơnam đang hmua hăng kơphê Gia Lai. Jơlan hơdră adoh suang ‘Mlam atông čing ring hơgor” pơphun amăng tlam mơmŏt kơnôl 7/11 ƀơi tơdron lăk Đại Đoàn Kết, pơhrôp glăi anih gru grua hiam đưm amăng plơi pla, tơlơi hơdip djuai ania ƀiă, brơi khul tuai ĕp lăng kông ngăn gru grua đưm, bruă pơkra ming gơnam yua amăng tơlơi hơdip mơda rim hrơi. Ƀrô djơ̆ tal anai, Gia Lai pơphun jơnum lăi pơthâo hră pơtrun tŭ yap gơnam kông ngăn dêh čar hăng ring čing Kơđơ djuai ania Jarai. Ring čing Kơđơ Jarai hơmâo 8 boh čing sa ring, dưi djă pioh ƀơi sang djă gơnam đưm Plei Ku.