Amăng anih anom plơi pla djă pioh gru grua hiam, ƀơi anăp lan sang rung ƀôn Ia Amrơn, să Ia Pa, tơring čar Gia Lai, gong drai dưi pơhrôp hiam ƀhêm ƀham, deng dong, tơrơhñai lu mơta ia iom, Jum dar phun gong drai, gong kut klao anun arăng dưm mơnong ngă yang pơyơr kơ lơ̆n adai glai klô, mơnuih ƀôn sang prăp lu tong ten biă mă; hơmâo čeh tơpai, sa drơi ană un, bui jŭ hăng dua rêu pơdai phrâo hơpuă. Pô iâu lăi, ngă yang ơi R’Ô Bhak, buh ao drai, ao gru grua đưm đah rơkơi Jarai ngă yang, pơ ala kơ abih bang ană plơi pla amăng ƀôn, ngă yang, iâu lăi bơngăt yang hri, bơngăt pơdai.

Tơlơi iâu lăi, iâu khul yang rơbang mơ̆ng yang Adu adai, yang čư̆ yang ia, yang hri, bơngăt jua pơdai braih djuai ania Jarai. Hrơi anai, ƀôn lan, plơi pla laih hơpuă pơdai glăi tuh amăng atông, amăng tơnuh, amăng bung bai pơdai braih phrâo akŏ bơyan či huă či ƀong. Yua hơmâo hlim rơnang phang mơak, yang atâo ơi yă djru ba, anun phun pơdai hiam, phun kơtor đĭ, pơdai jor, kơtor lu mơ̆n, ană plơi pla hơmâo asơi huă trơi pơđao yâo mơak. Tơ tă anai ană plơi ngă yang huă asơi hle, pơdai phrâo, hơmâo čeh tơpai, sa drơi mơnŭ, ha drơi bui ngă yang iâu lăi brơi glăi ƀong, glăi huă, djru brơi bruă pưk hmua dĭ da gla kơñ dưi hruaih, hiam jong hơtai, hiam drơi jăn…”.

Tơdơi kơ sa bơyan mă bruă amăng thun gleh glả tơnap tap, pơdơi pơdă ngă yang “Huă asơi hle” braih pơdai phrâo jing mông gêh găl kơ ană plơi pla djuai ania Jarai hơbai ta jak iâu pơtum ngui ngor ƀong mơñum mơak, ngă yang hơdor tơngia, iâu lăi bơni hơ-ơč khul yang rơbang lơ̆n mơnai glai klô, yang adai, yang atâo ơi yă hơmâo djru ba ngă pưk rơnang ngă sang mơak hơmâo boh pơdai jor kơtor lu. Nay H’Luir, mơnuih ƀôn sang ƀôn Čơma, să Ia pa lăi nao kơ hrơi ngui ngor mơak ngă yang huă asơi hle yua să Ia Pa akŏ pơjing sa tơlơi čang rơmang tui anai.

“Mơak yơh arăng pơphun djơh hăng anun, djă pioh glăi gru grua đưm, čing hơgor ƀu thâo lui, ƀu kơƀah ôh amăng mông ngui ngor anun. Eng yâo ao hiam, eng ao mơñam hăng mrai Jarai đưm hiam biă mă. Huă asơi hle, kiăng iâu lăi, ngă yang adai, yang djop mơta hơmâo brơi kơ ta pơdai jor kơtor lu, tơlơi hơdip trơi pơđao. Kơnuk kơna djru ba pơhrôp glăi djơh hăng anun hiam yơh, mơak biă mă. Yua tơlơi phiăn ta mơ̆ng đưm ñu djơh anun yơh. Laih ngă hmua truh bơyan hơpuă pơdai, iâu yang bơni kơ khul yang rơbang hơmâo djru ba laih, kiăng djop mơnuih mơak soh”.

Bruă rŭ glăi Ngă yang “Huă asơi hle” huă asơi phrâo ƀơi să Ia Pa, tơring čar Gia Lai hơmâo pơhưč ƀu ƀiă ôh khul tuai rơnguai nao ĕp ngui hrŏm, biă mă ñu ƀing tha plơi, ƀing tơdăm dra, tơdăm ngek dra muai hăng mơnuih hor kơ gru ama grua amĭ djuai ania ta mơ̆ng đưm, nao sem lăng arăng ngă yang hơnĭ ñu. Ksor Ther, khua hơđăp anom bruă Pơtô hăng Pơjuăt Ia Pa, tơring čar Gia Lai brơi thâo, hlâo kơ rŭ glăi bruă ngă yang Huă asơi phrâo, pơdai hle, ƀing khua apăn bruă gong gai plơi pla ăt hơmâo tơña ƀing tha đưm, mơnuih thâo tơlơi phiăn Jarai đưm kiăng pơphun tơlơi ngui ngor đah mơ̆ng djơ̆.

‘Hnang blung ngă mah aka ƀu tum ôh samơ̆ ƀuh mơak mơ̆n. Hlâo kơ ngă yang, ƀing să, hơmâo blơi brơi čing, eng ao laih anun tơña mơnuih ƀôn sang, blơi čing brơi kơ djop plơi pla, wơ̆t eng ao Jarai, pơtô hrăm brơi kơ ƀing tơdăm ngek dra muai hrăm suang arap. Kơnuk kơna djru djơh hăng anun hiam mơak yơh. Tơlơi ngă yang huă asơi hle, ƀing tha rơma kah mơ̆ng thâo, ră anai ƀing tha ƀiă tui laih, prăp lui ngă yang pin ia, pơdŏ rơkơi bơnai pơhrôp glăi, gơmơi tui anun mơak biă mă kiăng djop mơnuih thâo hluh tơlơi phiăn gru grua đưm hiam klă mơ̆ng djuai ania”.

Bruă rŭ glăi tơlơi phiăn ngă yang Huă asơi hle ƀơi Ia Pa, tơring čar Gia Lai lir hơbit hăng bruă djă pioh, pơđĭ tui rơnoh yom gru grua hiam amăng jơlan hơdră tơhnal pơkă mơ̆ng dêh čar kơ bruă pơđĭ tui gru grua hiam thun 2026. Ơi Nguyễn Thái Sơn-Khua anom bruă Gru grua, tơlơi pơhing hăng pơrơguăt drơi jăn să Ia pa, brơi thâo, thun blan pơ anăp, să ăt ngă brơi, djă pioh lu tơlơi ngă yang hiam mơak djă pioh gru grua djop djuai ania amăng să.

“Anai lĕ tơlơi ngă yang huă asơi phrâo pơphun ƀơi ƀôn Ia Amrơn, jing gru grua hiam phara biă mă mơ̆ng djuai ania Jarai. Bruă ngă anai kiăng dưi djă pioh ngă tui na nao, re se djă pioh rơnoh yom gru grua đưm. Jơlan hơdră tŏ tui dơ̆ng, atông čing ring hơgor suang arap, hŭi kơ rơngiă hĭ, sang bruă gru grua să brơi pơphun glăi, kiăng ƀing čơđai rơnuk anai lăng hăng ngă tui, djă pioh na nao”.

Tơdơi kơ črăn ngă yang, tơlơi ngui ngor mơak ƀong huă, atông čing suang arap amăng ƀôn Ia Amrơn, să Ia Pa ik ăk kơdok kơdor yơh. Hmư̆ ik jua čing ing jua hơgor, ok or tơdăm dra, tha muai čơđai hlăk djă tơngan hơdai, tơkai suang arap. Lu khul atông čing amăng să, nao pơtum atông hrŏm, bưp nao rai, ngui ngor, hrăm tơdruă laih anun ƀing tuai ăt mut mơak hrŏm ƀong mơñum, suang arap, pơphul, kơdăt hrôm tơkai amăng kơsăk, pơplông hơdui hrĕ hlơi kơtang, gôm mơta kiăo mă bip. Lu tơrưng pơdă gơnam sĭ mơdrô lăi pơthâo gơnam boh troh đang hmua, kyâo pơtâo pơkra ming gơnam pơhrôp hiam hăng mơnong ƀong huă gru grua đưm djuai ania pơgôp hrŏm ngă mơak amăng mông jơnum ngui ngor anai.