Plơi Ia Nueng dŏ ƀơi anih gru grua hiam lơ̆n mơnai, ia dơnao prong Biển Hồ, jing Ia Nueng, ƀơi plơi anun hơmâo 200 boh sang anŏ hăng rơbêh 1000 čô mơnuih, amăng djuai ania Jarai truh 96%. Plơi pla anai, ăt dŏ djă pioh lu anŏ hiam gru grua đưm, sang Jarai, sang rung, phun kyâo bơnŭ hlâo ia, phun hra akŏ plơi sui rơtuh thun laih, pin ia ăt dŏ, bruă krih mơñam rêu ro bung bai, ngă gŏk, rup trah dưm ƀơi pơsat sô đưm dŏ djă pioh, bruă rơngaih mrai, mơñam eng ao Jarai, atông čing hơgor, tơnă asơi hơbai añăm hla rơ̆k gru grua ăt dŏ djă pioh djop soh sel.

Kơnang kơ hơdôm mơta gơnam gru grua anun, jing gơnam sĭ mơdrô, čơkă tuai mut hyu ngui dŏ glăi amăng plơi pla Ia Nueng, laih anun akŏ pơdong plơi pla ngă pơhrôp hiam pioh čuă lăng, găn rơgao ĕp dơnao ia Nueng-Biển Hồ, amăng jang plơi, sang rung anih jơnum plơi, pin ia gru grua đưm, anih či pơjing gơnam gru grua pioh sĭ mơdrô  truh pơ djop sang dŏ, tuai apah dŏ glăi juăt lăi homestay hơmâo soh. Tui hăng hơdră tuai ngui djơh hăng anai, gơñu amrra sem anŏ hiam gru grua đưm amăng plơi, bruă mă, tơlơi dŏ dong ƀong huă, truh kơ bruă pơkra ming gơnam tam, tơnă asơi hơbai añăm, ƀong huă laih anun ngui ngor atông čing suang arap; hyu sem bruă rơngaih mrai, mơñam eng ao gru đưm Jarai; nao pơ hmua lăng ană plơi pla mă bruă, ƀudah trun ngă bruă hrŏm hăng pô sang kah hăng nao pơ hmua jik rơ̆k, pơtem pơdai glăi pơ sang tăp pơdai tơpơi braih, hroh pơdai, hơdơi braih truh pơ tơnă asơi hăng apui djuh ƀơi tơpur đưm laih anun hơtŭk añăm te, añăm hla ƀlang mơñeč, pơpao hăng bơnga boh (hung) pơneh tơnô…laih dơ̆ng hyu lăng bruă pĕ boh kơphê tơsă amăng hmua đang hăng ba glăi ƀhu truh kơ hna hăng kơ-uă pơjing tơpung kơphê pioh mơñum.....

Hăng mơnuih ƀôn sang amăng plơi, hơmâo tuai apah dŏ glăi amăng sang anŏ mơtam pok brơi jơlan phrâo ngă bruă ĕp prăk kăk laih anun pơđĭ tui bruă ngă djă piho gru ama grua amĭ hăng pơlar tui tơlơi phiăn hiam, gru grua đưm klă brơi tuai ƀuh hăng thâo krăn, pioh glăi kơ ană tơčô mô yâo rơnuk tơdơi thâo hăng djă pioh. Amai Rahlan Han, mơnuih ƀôn sang plơi Ia Nueng brơi thâo:

“Kâo kiăng ană plơi pla amra ngă hrŏm ha pran jua, gum pơgôp nao rai pơđĭ kyar bruă tuai hyu ngui amăng plơi pla lu hloh, kah pơpha tơdruă tơlơi thâo thăi mơñam mrai đưm kơ ƀing hlăk ai čơđai rơnuk anai thâo. Kiăng hơmâo hơdră pơtô ba ƀing čơđai thâo bruă ba hyu tuai, lăi pơthâo kơ ƀing tuai thâo tơlơi pơhing hơdip mơda, bruă mă gru grua amăng plơi Jarai ta pô”.

Ơi Đặng Khánh Toàn, Kơ-iăng khua Jơnum min monuih ƀôn sang să Biển Hồ brơi thâo, să anai lăng kơ mơnuih ƀôn sang yơh ngă pô amăng bruă man pơdong hăng pơđĭ tui bruă čơkă tuai hyu ngui amăng plơi pla. Pơ anăp adih, să Biển Hồ ăt ngă pơgiong tơhnal pơkă brơi tŭ yua hloh, bơwih brơi čơkă tuai hyu ngui, anih dŏ, anŏ ƀong hăng pơtrut bruă ngă ba tuai hyu ngui lu hloh. Plơi Ia Nueng pơtruh nao rai hăng lu anih pơkŏn brơi tuai hyu sem, Ia Nueng-Biển Hồ, ĕp amăng đang kyâo phun hơngô sui rơtuh thun, nao ngui ƀơi kơdư pla če tha hăng čư̆ apui kơdir đang rơya juăt lăi Đang Ya, akŏ pơjing tuôr pioh kơ tuai hyu ĕp, pơhưč lu tuai nao pơ Gia Lai.

“Plơi pla čơkă tuai Ia Nueng ƀing gơmơi pơtong rơđah lĕ, mơnuih ƀôn sang, ană plơi pla yơh ngă pô phun amăng plơi, yua mơ̆ng mơnuih ƀôn sang mơ̆n pơjing rai gơnam gru grua hiam đưm, bruă ngă hmua pla pơjing gơnam sĭ mơdrô rơgoh hơdjă, ba tuai hyu ĕp, hyu ngui, dŏ glăi, ngă bruă hrŏm, pơkra gông brô̆ hrŏm hăng kơnuk kơna djru tuh pơ alin prăk kăk brơi ană plơi pla pơjing rai gơnam sĭ mơdrô amăng plơi pla, pơdah thâo kơ ƀing tuai ĕp hăng blơi. Mơ̆ng anun, djru ană plơi pla hơmâo prăk pơhrui glăi prăk kơ sang anŏ, hơđong tơlơi hơdip mơda, hơđong bruă kơđi čar, rơnuk rơnua mơnuih mơnam plơi pla, ba anih hyu ngui ƀơi Ia Nueng jai hrơi pơđĭ kyar”.

Tơdơi kơ jơnum pôr pơthâo, ƀing khua mua, mơnuih ƀôn sang hăng khul ngă bruă mơdrô ba tuai hyu ngui, nao ĕp anih djă pioh pơdah thâo gru grua hăng atông čing suang arap, pơƀuh brơi gơnam sĭ mơdrô kơ tuai hyu ngui amăng plơi Ia Nueng.