Hăng kơčong čư̆ Langbiang hing ang glông 1.500 met pơhmu hăng jơlah ia rơsĭ, Đà Lạt hơmâo ayuh hyiăng rơ-ơ̆ djop bơyan, lŏn mơnai glai rưng hiam biă mă, jing anih čuă ngui rơnuk rơnua, pơhưč lu tuai čuă ngui amăng lŏn ia hăng tač rơngiao. Anai lĕ kual lŏn dŏ hơdip mơng mơnuih djuai ania K’ho, amăng rơnuč rơwang thun tal 19, Prang hơmâo nao pơ kual anai man pơdong plơi prong pơdơi pran, tơdơi anun pơhưč lu mơnuih nao dŏ hăng djop rơnuk. Tơlơi pơmut nao rai gru grua yôm phara amăng tơlơi hơdip mơng mơnuih ƀơi Đà Lạt ră anai.

Găn rơgao 130 thun ako pơjing hăng pơđĭ kyar, ƀô̆ mơta plơi prong Đà Lạt, tơring čar Lâm Đồng hơmâo yak nao pơplih phrâo, tơlơi bơwih ƀong huă pơđĭ kyar, wai pơgang rơnuk rơnua, pơtom hiăp pok prong. Tơlơi dưi amăng pơđĭ kyar ngă hmua mă yua boh thâo phrâo, tuai čuă ngui jing anŏ ba jơlan hlâo amăng bơwih ƀong huă. Sit biă ñu, Đà Lạt hơmâo tŏ tui gru grua djuai ania, pơlir hăng tơlơi hơdip mơnuih ƀơi Đà Lạt “Jê̆ giăm - Mơ-ak klă-Thâo čơkă tuai”.

Đặng Quang Tú, Khua Jơnum min mơnuih ƀôn sang plơi prong Đà Lạt pơsit tong, hơdôm tơlơi dưi prong mơng plơi prong, anun lĕ jing anom phun bơwih brơi tuai čuă ngui amăng lŏn ia hăng jar kmar, plơi prong Festival bơnga ƀơi Việt Nam, plơi prong rơgơi, plơi prong pơčeh phrâo tơlơi adôh suang mơng UNESCO, hăng ră anai glăk tŏ tui gir run pơjing plơi prong gru grua rŏng lŏn tơnah. Ƀu djơ̆ kơnong tui anun, Đà Lạt ăt hơmâo 2 wŏt tŭ yap lĕ “Plơi prong tuai čuă ngui agaih rơnăk ASEAN” hăng anai lĕ sa amăng hơdôm anih ngui hiam rơ-ơ̆ hloh kual Asia. Khua jơnum min Đặng Quang Tú pơsit tong.

“Thun 2014, Khua dêh čar hơmâo tơlơi pơtrun mrô 704, kah hăng tơlơi pơtrun mrô 04 mơng Ping gah tơring čar Lâm Đồng hơmâo pơsit hơnong pơkă: Pơjing plơi prong Đà Lạt jing plơi prong hiam phrâo, plơi prong pơčeh phrâo, anih phun bơwih brơi tuai čuă ngui amăng glai čư̆, anih pơdơi pran, anih čuă ngui gru grua yôm phara amăng jar kmar, hăng lĕ anih gru grua, adôh suang, bơrơguăt drơi jăn hăng ngui ngor amăng kual; sa anih yôm amăng pơčeh phrâo hăng ngui adôh suang. Ƀơi anăp kơ hơdôm tơlơi dưi anun, Ping gah, gong gai hăng mơnuih ƀôn sang plơi prong Đà Lạt amra gum pơgôp ha pran, gir run kơtang hloh kiăng pơplih phrâo, lăng tui arăng, gơgrong kiăng ngă pơgiong bruă pơđĭ kyar, hơdor tơngia ƀing mơnuih hơmâo gum pơgôp prong đưm hlâo adih, anai lĕ ƀing ĕp ƀuh, man pơdong hăng pơđĭ kyar plơi prong anai”.

Đĭ pơhiăp amăng mông ngă lơphet pioh hơdor 130 thun Đà Lạt akŏ pơdong hăng pơđĭ kyar, Kơ-iăng khua dêh čar Lê Minh Khái tŭ yap hăng lăng yôm hơdôm tơlơi dưi prong mơ̆ Ping gah, gong gai, ling tơhan hăng mơnuih djop djuai anai plơi prong Đà Lạt lăi phara, tơring čar Lâm Đồng hnun mơn dưi ngă amăng thun blan laih rơgao, pơgôp yôm phăn amăng tơlơi dưi hrŏm amăng lŏn ia.

Hăng tơlơi čang rơmang hăng đăo gơnang hơmâo sa plơi prong Đà Lạt djă pioh anŏ hiam rơ-ơ̆, gru grua samơ̆ ăt pơplih phrâo, thâo pơčeh phrâo, pơđĭ kyar jai hrơi hiam klă, pơplih phrâo amăng pơgi kơdih, Kơ-iăng khua dêh čar rơkâo Ping gah, gong gai, mơnuih ƀôn sang plơi prong Đà Lạt kiăng pơtrut kơtang bruă pơđĭ kyar bơwih ƀong huă-mơnuih mơnam hăng tơlơi pơsit lăng ană mơnuih lĕ phun; mơnuih lĕ hơnong pơkă, akŏ phun, hăng pơtrut pơsur, tŭ mă hơdôm tơlơi dưi lơm pơđĭ kyar. Kơ-iăng khua dêh čar lăi pơtong:

“Kâo rơkâo Ping gah, gong gai, mơnuih ƀôn sang plơi prong Đà Lạt tŏ tui djă pioh, pơtrut pran gum pơgôp djop djuai ania; anăm pơdơi hrưn đĭ amăng git gai hăng kjăp bruă mơng khul Ping gah, mơnuih apăn bruă Ping gah; hơkrŭ kjăp pran gum pơgôp, mut hrŏm amăng Ping gah hăng anih anom kơđi čar, ba glăi tơlơi mut hrŏm amăng abih bang mơnuih. Pơhlôm djop mơta, klă hloh, tŭ yua hơdôm rơnoh mă yua amăng mơnuih mơnam hăng khut khăt ƀiă dong amăng tuh pơ alin pơđĭ kyar man pơdong anih anom ha amăng plĕ, lăp djơ̆, tŭ yua, sit biă ñu hơdôm ring bruă yôm phăn, gru grua, pơtô pơjuăt, ia jrao, pơplih yua boh thâo phrâo, man pơdong plơi prong rơgơi, pơgôp ba Đà Lạt jing plơi prong pơđĭ kyar yôm phăn amăng kual, amăng lŏn ia, pơkuh nao rai yôm amăng kual hăng jar kmar”.

Kơ-iăng khua dêh čar ăt pơtă, Đà Lạt kiăng tŏ tui lĕ plơi prong Festival bơnga Việt Nam; tŭ mă hơdôm tơlơi dưi, tơlơi gal amăng pơđĭ kyar tuai čuă ngui mơ-ak rơ-ơ̆, klă hloh; pơđĭ kyar ngă hmua yua boh thâo phrâo anăp nao mơtah, agaih rơnăk, wai pơgang jum dar, mă bruă gir run hăng tŏ tui gơgrong klă ding kơna amăng hơdôm boh plơi prong pơčeh phrâo mơng UNESCO, mơng anun pơtrut đĭ tui rơnoh yôm pơgôp lu ƀiă dong amăng gơnam bruă pơkra pơjing tui gru grua amăng tơlơi bơwih ƀong ƀơi ƀon lan./.