VOV4.Jarai-Truh lơ 27/1, ring bruă pơkra tơrưng gông ia ƀơi tơdrun song nan đĭ trun ngui ƀơi ia dơnao Xuân Hương ngă giong laih djop črăn, pioh ba bơwih brơi kơ tuai nao hmư̆ hăng mơnuih ƀôn sang ĕp lăng amăng hơdôm hrơi tết Nhâm Dần mơak thun phrâo 2022. Ring bruă tơrưng gông ia anai rơnoh prăk tuh pơ alin ming pơkra truh 10 klai prăk, yua kông ty pơčruh ngăn tuh pơ alin Lan Anh-Đà Lạt jao brơi. Ring bruă anai dưi dưm truă, ming pơkra ƀơi tơdrun song nan đĭ trun ngui amăng dơnao ia Xuân Hương, ming pơkra gông pơpoh nao rai hmư̆ jing er tơlơi adoh mơak, akă pơđôm pông pơđung ƀơi jơlah ia, tơlơi pơpư̆ hơmâo jua mơñi er tơlơi adoh lĕ tui hluai anŏ rơgơi pơkĕ hăng hơdră git gai mơ̆ng măi komputer.

Ring bruă anai amra jing anŏ lăp đing nao ƀơi Đà Lạt sit amăng mlam, bơwih brơi kơ mơnuih ƀôn sang hăng tuai nao ĕp lăng

Ring bruă anai đơ đam anih dưm truă prong samơ̆ lơ̆m dăp ƀơi sa akiăng ia dơnao Xuân Hương, pơjing anih ĕp lăng hiam, anih dưm phun bơnga, gông mơñi adoh, apui pơčrang…pơjing rai sa rup hiam, jua mơñi mơak pơhưč tuai rơnguai hăng mơnuih ƀôn sang hor ĕp lăng mơak pran jua. Ƀu kơnong bơyan têt ngă yang thun phrâo anai đôč ôh, ring bruă tơrưng gông adoh anai amra mă bruă na nao amăng mlam dơ̆ng mơ̆ng rĭm hrơi rơma, hrơi năm, hrơi tơjuh, sui truh boh ƀiă abih lơ 31/12/2024.

Nay Jek: Pơblang