VOV4.Jarai - Amăng 5 thun pơ anăp anai, tơring čar Dak Lak amra mă yua rơbêh 20 klai prăk kiăng kơ tŏ ngă tui akŏ bruă djă pioh hăng lăi pơthâo gru grua čing hơgor ƀơi ƀon lan. Anai lĕ boh tơhnal amăng akŏ bruă pok pơhai ngă tui tơlơi pơtrun mơng Khul pơ ala mơnuih ƀon sang tơring čar kơ bruă djă pioh hăng lăi pơthâo gru grua čing hơgor amăng tơring čar Dak Lak, rơwang thun 2022-2025 phrâo hơmâo Jơnum min mơnuih ƀon sang tơring čar Dak Lak pơtrun phrâo anai.

Sit biă ñu, tui hăng akŏ bruă pok pơhai ngă tui tơlơi pơtrun mơng Khul pơ ala mơnuih ƀon sang tơring čar kiăng kơ pok pơhai hơdôm bruă, sit biă ñu lĕ: hơmâo lu dong bruă pơtô pơblang, lăi pơthâo, djă pioh gru grua čing hơgor. Rĭm thun pơphun hơkrŭ glăi ƀiă biă mă ñu 1 tơlơi ngă yang, ngui ngor sô hơđăp mơng djop djuai ania ƀiă amăng tơring čar pơlir hăng hơdôm bruă djă pioh gru grua čing hơgor. Kơsem min, pơƀut glăi, hơkrŭ, mă yua, pơtô glăi hăng hrưn đĭ klă dong amăng bruă atông hơdôm tơlơi adôh sô hơđăp mơng djuai ania Êđê, M’nông amăng mông ngă yang, ngui ngor amăng plơi pla.

Siu Đoan: Pơblang