Yap truh ră anai, hơmâo 30 ring čing, rơbêh 430 per eng ao gru grua đưm ƀơk brơi kơ djop plơi pla, kiăng djă pioh hăng pơđĭ tui gru grua hiam čing hơgor djuai ania ƀiă ƀơi Dak Lak. Tui hăng anun, thun anai, Gơnong bruă Gru grua ƀơk 8 ring čing tơnah djuai ania Êđê hăng giăm 130 per eng ao đưm djuai ania Êđê kơ khul atông čing, adoh suang ƀơi 9 boh plơi pla, 1 boh sang hră kơnuk kơna čem rông čơđai sang hră djuai ƀiă hăng 1 grup adoh suang ƀơi să gah 7 boh tơring glông, plơi prong amăng tơring čar Dak Lak.

Anai lĕ, thun tal 4 laih Gơnong bruă Gru grua Pơrơguăt drơi jăn hăng Tuai čuă ngui Dak Lak pok pơhai bruă mă ƀơk čing hăng eng ao brơi kơ khul atông čing, ƀing adoh suang ƀơi djop plơi pla. Biă mă ñu thun anai, hrŏm hăng prăk tơring čar djru lĕ hơmâo tơlơi djru mơ̆ng anom bruă ngă hrŏm jar kmar tơring čar Jeolabuk, dêh čar Hàn Quốc tui hăng hơdră ngă hrŏm djru ba kiăng djă pioh hăng pơđĭ tui gru grua đưm hiam klă ƀơi tơring čar Dak Lak.