Rơbêh 10 blan amăng thun 2022, tuai čuă ngui nao pơ tơring čar Dak Lak giăm 1 klăk čô, pơhrui mơng bruă bơwih brơi tuai čuă ngui rơgao hăng mrô pơkă amăng ha thun, amăng anun giăm 12% lĕ tuai mơng tač rơngiao. Rơnoh pơhrui mơng tuai čuă ngui him lăng 824 klai prăk, rơgao rơbêh 50 klai prăk pơhmu hăng mrô him lăng hlâo anun amăng thun 2022. Bruă bơwih brơi tuai čuă ngui ƀơi Dak Lak hơkrŭ glăi tañ tơdơi kơ klin Covid-19 dưi pơgang hĭ. Tơlơi kiăng lu hloh mơng tuai čuă ngui lĕ ruah hơdôm anih rơ-ơ̆, hơmâo lu tơlơi yôm phara, yua anun ruah nao čuă ngui pơ Dak Lak.

Yă Nguyễn Thị Phương Hiếu - Kơ-iăng Khua gơnong bruă gru grua, bơrơguăt drơi jăn hăng tuai čuă ngui tơring čar Dak Lak brơi thâo, tơring čar glăk tŏ tui hơmâo hơdră djru brơi hơdôm khul grup, ƀing mơnuih pơđĭ kyar tuai čuă ngui, amăng anun ssing nao pơđĭ kyar čuă ngui amăng plơi pla pơlir hăng bruă djă pioh, lăi pơthâo gru grua mơnuih djuai ania ƀiă. Amăng rơwang thun 2021-2025, tơring čar hơmâo ruah tuh pơ alin brơi 5 boh plơi pla mơnuih djuai ania ƀiă, hăng rơnoh prăk djru mơng 800-1 klai prăk kiăng pơđĭ kyar bruă bơwih brơi tuai čuă ngui.