Akŏ thun anai, ƀơi Sang gru grua Dak Lăk, plơi prong Buôn Ma Thuột pơphun pơdă prưng hăng anăn “Trường Sa - Anih gah hlâo ia rơsĭ”. Pơdă prưng pơƀuh rai giăm 100 pok rup kơ bruă pơtŏp tơhan blah ngă hăng tơlơi hơdip mơda mơ̆ng ƀing khua, ling tơhan hăng mơnuih ƀôn sang ƀơi bul pơtâo ia rơsĭ Trường Sa; rup 21 bul pơtâo anet prong amăng bul pơtâo ia rơsĭ Trường Sa hrŏm hăng dram gơnam kah hăng hla gru Dêh čar, hla gru Tơhan ia rơsĭ Việt Nam, gơnam pơkra mơ̆ng kơđĕ abao yua ƀing tơhan ƀơi bul ia rơsĭ Trường Sa pơkra mă. Amăng hrơi pơdă prưng hơmâo pơdah 5 črăn phim Ră ruai - Gru tơhnal đưm kơ Trường Sa.

Pơdă prưng pơhưč lu mơnuih ƀôn sang hăng ƀing tuai nao lăng. Ơi Tôn Thất Tuấn Ninh, ƀơi tơring glông Lăk, tơring čar Dak Lăk ră ruai, hơdôm gơnam pơdă hơmâo pôr pơthâo lu tơlơi, jê̆ giăm, sit nik kơ bul pơtâo Trường Sa hăng lu mơta bruă, kjăp pran jua.

“Ƀơi kual Dap Kơdư hăng Dak Lăk anai, tal blung a kâo nao lăng arăng pơdă prưng pơƀuh tơlơi hơdip ăt kah hăng bruă mă mơ̆ng ling tơhan ƀơi bul pơtâo ia rơsĭ Trường Sa, kiăng neh met wa pơ kual Dap Kơdư ƀuh tơlơi hơdip pơ kual gah hlâo ia rơsĭ Lŏn ia ta”.

Ƀu kơnong ƀơi plơi prong Buôn Ma Thuột đôč ôh, mơ̆ng thun 2014 truh ră anai, Gơnong bruă pôr pơhing tơring čar Dak Lăk hơmâo pơphun lu bruă pôr pơhing pơthâo bruă pơgang ba ia rơsĭ bul ia rơsĭ. Amăng anun hơmâo pơdă prưng ba hyu lu anih “Hoàng Sa, Trường Sa mơ̆ng Việt Nam - hơdôm gru tơhnal sit mơ̆ng đưm hăng tơlơi gêh gal” ƀơi hơdôm boh tơring glông: M’Drăk, Ea Kar, Ea Súp, Krông Bông, Ea H’leo, Čư̆ Kuin hăng plơi prong Buôn Hồ. Ƀơi rim wơ̆t pơdă prưng hră lơkak hăng hră pơ-ar đưm jing gru tơhnal pơsit brơi tơlơi dưi wai lăng mơ̆ng Việt Nam hăng dua bul pơtâo ia rơsĭ Hoàng Sa, Trường Sa ƀơi Ia rơsĭ Ngŏ. Hơdôm hră pơ-ar hơmâo čih pioh amăng lu hơdrôm hră gru grua đưm mơ̆ng Việt Nam hăng lu dêh čar, biă ñu lĕ hră pơ-ar, hră lơkak hơmâo kač, ba pơƀuh mơ̆ng rơnuk thun 16 truh ră anai ƀơi Việt Nam hăng ƀơi lu dêh čar či rŏng lŏn tơnah.

Ơi Nguyễn Quốc Hiệp, Kơ-iăng khua gơnong bruă pôr pơhing tơring čar Dak Lăk, Khua anom pơphun pơdă prưng brơi thâo: Hơdôm hră pơ-ar hăng giăm 100 pok hră lơkak hơmâo pơdă hơmâo tum pơƀut hơdôm mơta hră pơ-ar sit, hơmâo pơƀuh mơ̆ng đưm hlâo truh ră anai ƀơi dêh čar hăng jar kmar; pơsit hrơi čih pơkra, ngă tui hăng pơgang ba tơlơi dưi wai lăng lŏn ia mơ̆ng Việt Nam hăng 2 bul pơtâo Hoàng Sa, Trường Sa. Mơ̆ng rim wơ̆t pơdă prưng pơhưč hơdôm rơbâo čô mơnuih nao lăng, hơduah ĕp.

“Hăng bruă pơdă prưng jing djru prong biă đah mơ̆ng pơđĭ tui tơlơi pơmin, tơlơi grong bruă mơ̆ng rim čô khua, mơnuih ping gah lăi hơjăn hăng mơnuih ƀôn sang Việt Nam lăi hrŏm, djru pơgang ba ia rơsĭ, bul pơtâo plao ia rơsĭ hăng ngă truh kih 2 bruă yôm phun anun lĕ akŏ pơdong hăng pơgang ba Lŏn ia”.

Bruă pôr pơthâo kơ tơlơi dưi wai lăng bul pơtâo ia rơsĭ ăt hơmâo hơdôm boh tơring ƀơi Dak Lăk pơphun ngă hăng bang hyu truh pơ ƀing nai pơtô, čơđai sang hră. Ƀơi plơi prong Buôn Hồ, Tơlơi pơplông “Kâo khăp kơ Ia rơsĭ, Bul pơtâo ia rơsĭ Việt Nam” hơmâo pơphun rơnuč thun 2023 kơ hơdôm boh sang hră gưl dua. Mơ̆ng tơlơi pơplông anai, wơ̆t nai hăng ƀing čơđai prăp rơmet klă, tong ten, hơduah ĕp dlăm hloh tơlơi dưi ia rơsĭ bul pơtâo ia rơsĭ, mơ̆ng anun pơƀuh tơlơi pơčeh phrâo amăng bruă pơblang brơi abih bang hmư̆, ngă sen pôr pơthâo.

Nai pơtô H’ Bhai Mlô, Sang hră gưl dua Trần Phú, phường Đoàn Kết, plơi prong Buôn Hồ lăi: Tơlơi pơplông ƀu kơnong pơjing rai anih ngui ngor klă hiam đôč ôh mơ̆ ăt gum pơđĭ tui tơlơi thâo hluh mơ̆ng nai pơtô wơ̆t hăng ƀing čơđai kơ bul pơtâo plao ia rơsĭ Việt Nam, mơ̆ng anun pơtrut tui tơlơi khăp kơ plơi pla, lŏn ia.

“Brơi ƀing čơđai thâo hluh anŏ yôm mơ̆ng ia rơsĭ, bul ia rơsĭ, gru grua đưm mơ̆ng rơnuk ơi yă ta djai amăng hơdôm tal blah ayăt pơgang ba ia rơsĭ. Kiăng ƀing čơđai tañ thâo hluh, thâo pơmin djơ̆ kơ anŏ yôm mơ̆ng ia rơsĭ, bul pơtâo ia rơsĭ lŏn ia ta. Ƀing čơđai ăt hur har hơduah ĕp, ĕp mă pô gơñu hơdôm tơlơi tơña, tơlơi thâo kơ ia rơsĭ, bul ia rơsĭ”.

Bơ adơi Trần Nguyễn Đăng Khoa, čơđai hrăm anih 11A1, Sang hră gưl 3 Y Jút, să Ea Bhôk, tơring glông Čư̆ Kuin, tơring čar Dak Lăk, yua hor anun jing hyu hơduah ĕp na nao, lăng clip kơ bul pơtâo plao ia rơsĭ amăng internet, mơ̆ng anun ñu thâo rơđah hloh kơ tơlơi yôm mơ̆ng bul pơtâo plao ia rơsĭ:

“Jing čơđai sang hră tui kâo anai kiăng gir hrăm hră hloh dong, gir pôr pơthâo brơi abih bang mơnuih thâo tơlơi dưi wai lăng ia rơsĭ mơ̆ng Việt Nam. Tơlơi khăp tơdơi anai kâo kiăng ngă tơhan ia rơsĭ, yua dah bul pơtâo ia rơsĭ jing drah kơtăk mơ̆ng ƀing ta, jing mơnuih pơgang lŏn ia jing bruă kơdrưh kơ-ang biă mă”.