Mơ̆ng anun, kiăng pơtrut ƀing čơđai sang hră ĕp lăng pơđok lu hơdrôm hră yôm, pơtrut pran jua hor kơ bruă gru grua hiam pơđok hră ƀơi djop sang hră.

Mơ̆ng mơguah sing bring mơtam, amăng anom gru grua boh thâo hăng tơlơi pơhing tơring glông Ea Hleo, tơring čar Dak Lak ƀuh lu biă mă mơnuih, čơđai sang hră nao pơđok hră ik ăk mơtam. Rĭm bruă ngă, tơlơi ngui ngor dŏ pơđok hră dưm dăp phara kual kah hăng: anih pơdă lui hơdrôm hră pơđok hăng gơnam hră pơar STEM, amăng anih pơdă rup hiam tui hăng akŏ tơlơi pia, anih ngă bruă găn rơgao thâo thăi, ĕp lăng lu mơta hơdrôm hră hăng gru grua hiam pơđok hră, lăi pơthâo hơdôm mơta gơnam yua hơdrôm hră phrâo in pơkra hăng pơplông akhan, ră ruai tui tơlơi čih amăng hơdrôm hră.

Rĭm kơ anih pơhưč lu mơnuih nao pơđok hră wơ̆t čơđai sang hră hăng nai pơtô hrăm hră, amĭ čơđai sang hră nao hrom, ĕp lăng ană bă pơđok hră. Hok mơak dŏ djă ƀơi tơngan pri apah bơni, adơi Bùi Trần Bảo Thư, čơđai sang hră hrăm anih 6A5, sang hră gưl dua Lê Qúy Đôn, tơring kual Ea Drăng, tơring glông Ea Hleo lăi:

“Mơ̆ng mơguah truh ră anai rai ĕp lăng adoh suang, tŭ mă hơdrôm hră arăng brơi, ngui hrom, ră ruai hăng ƀing neh, met čih tơlơi ră ruai hơ̆k hơr laih anun ngui tui tơlơi juăt đưm, ĕp gru grua hiam pơđok hră. Djop tơlơi ngui ngor kâo mơak soh mut hrom, găn rơgao hăng ƀuh gru grua hiam pơđok hră tŭ yua yua dah mông gêh găl ba glăi mơak pran jua. Kâo kiăng sang hră pơphun lu wơ̆t dơ̆ng tơlơi ngui ngor mơak djơh hăng anai, kiăng pơphul hrom gơyut gơyâo pơđĭ tui tơlơi thâo thăi hăng ngui ngor mơak hloh".

Ƀu kơnong kơ găn rơgao lu bruă mă pioh kơ čơđai muai đôč ôh, čơđai sang hră ngă hrom hơdră dŏ tŭ mă hơdrôm hră pơđok arăng ƀơk pơpha brơi kah hăng hơdôm tơlơi čih ră ruai tơlơi hơ̆k hơr hiam pioh kơ čơđai muai anet. Hơdôm boh yôm phun bơ ră ruai mơ̆ng ƀing tuai jak iâu nao pơtô lăi, djru kơ čơđai sang hră thâo lu hloh kơ rơnoh yôm kơ bruă hor pơđok hră, mơ̆ng anun pơtrut pran jua ƀing čơđai hor kơ pơđok hră, hơduah ĕp lu mơta hơdrôm hră či pơđok.

Adơi Phan Thị Phương Thúy, čơđai sang hră hrăm anih 9A, sang hră đom lăm kơnuk kơna čem rông čơđai sang hră mơnuih djuai ƀiă tơring glông Ea Hleo brơi thâo:

“Kâo hmư̆ ƀing pơčeh tơlơi pơtưh, pơčeh tơlơi ră ruai hơk hơr pơhiăp mơak biă laih anun pơpŭ hăng amuaih đơi kah hăng ƀing met neh anun ngă. Lu grup thâo biă, ră ruai, akhan glăi tơlơi akhan čih amăng hơdrôm hră, ră ruai glăi kơ Wa Hồ, hmư dlưh pran jua ai hơtai. Kâo ƀuh mơak pơpŭ kiăng hla tui ƀing anun. Kâo ƀiă đôč pơđok hră yua kơ ƀu hor đơi ôh, kâo pơđok hơdrôm hră čih kơ tơlơi pơtô thâo pơmin kơ bruă kơsem amăng lăm pran jua, bơ hơdrôm hră čih ră ruai hơk hơr ƀiă đôč pơđok. Samơ̆ ră anai hmư̆ ƀing nai, ƀing net, met lăi pơthâo kâo ƀuh hor yơh, lu hơdrôm hră arăng čih pơthâo rơgơi, mơak pơlar boh pơhiăp tơlơi thâo lu hloh”.

Tui hăng ơi Nguyễn Huy Dũng, Khua anom Gru grua Tơlơi pơhing tơring glông Ea Hleo, mơak hrom hrơi Hơdrôm hră hăng gru grua hiam pơđok hră thun 2023, tơring glông hơmâo akŏ bruă pok pơhai lu bruă mă mơak. Ƀuh rơđah, kah hăng pơphun hrơi mơak jơnum hăng akŏ ñu : Hơdrôm hră hăng ƀing thun muai”; pơdă prưng, bơwih brơi arăng pơđok 2.500 pok hơdrôm hră hăng lu mơta djuai kah hăng: Hơdrôm hră tơlơi hơk hơr čơđai muai, hơdrôm hră boh thâo phrâo, hơdrôm hră pioh ĕp lăng hrăm tui; hơdrôm hră pơtô tơlơi thâo hơdip mơda, hơdrôm hră pơtô tơlơi thâo pơkra ming, hơdrôm hră tơlơi phiăn, hơdrôm hră gah ia jrao, hră pơhing phrâo....

Pơdă rup hiam hăng rup kač kơ Ea Hleo hiam rô̆; pơphun lu tơlơi ngui ngor gru đưm ană plơi, pơđăo nao rai pioh apah bơni; ră ruai hăng ƀing čih pơčeh tơlơi hơk hơr, ƀing pơčeh tơlơi pơtưh, pơplông akhan, ră ruai glăi tui tơlơi čih amăng hơdrôm hră,....Hơdră anai, hơmâo lu mơnuih đing nao, ngă hrom giăm 1000 wơ̆t čơđai sang hră hăng nai pơtô ƀơi sang hră gưl dua, sang hră gưl klâo amăng tơring glông. Hrom hăng anun, tơring glông ăt đing nao mơ̆n kơ čơđai sang hră tơnap tap hăng lu bruă ngă pơplông nao rai, bang bơngač gru grua hiam pơđok hră ƀơi djop sang hră ngă tui. Ơi Nguyễn Huy Dũng lăi:

“Ƀing gơmơi hơmâo akŏ bruă ngă bang hyu tơlơi bơngač truh pơ djop sang hră, djop să amăng anun hơmâo ƀơk hơdrôm hră kơ djop sang djă pioh hơdrôm hră pơđok ăt kah hăng pơčruh hơdrôm hră pioh ƀơk glăi kơ čơđai sang hră ƀun rin, hơdră anai ngă tui abih amăng blan pă hăng hrơi blan pơ anăp dơ̆ng”.

Brơi hơdrôm hră tơl tơngan čơđai sang hră kual ataih jing sa amăng hơdôm bruă mă ƀuh rơđah tŭ yua biă mă mơ̆ng Khul čih tơlơi hơk hơr adoh suang mơak tơring čar Dak Lak hok mơak hrom čơkă hrơi Hơdrôm hră hăng gru grua hiam pơđok hră Việt Nam thun anai. Niê Thanh Mai, Khua Khul čih tơlơi hơk hơr adoh suang mơak tơring čar brơi thâo, tŭ mă tơlơi dưi jao mơ̆ng Khul čih tơlơi hơk hơr adoh suang mơak Việt Nam, Khul ƀơi tơring čar Dak Lak hơmâo ƀơk hơdôm rơtuh pok hơdrôm hră tơlơi hơk hơr adoh suang amăng Kơčăo bruă “Ƀơk hơdrôm hră hơk hơr adoh suang kơ čơđai muai kual ataih, tơnap tap” laih anun pơphun lu bruă mă jĕ giăm, djru hrom bưp ƀing čih pơčeh tơlơi hơk hơr.

Niê Thanh Mai čang rơmang, mơ̆ng anun čơđai sang hră amra hơmâo tơlơi jĕ giăm hloh hăng lu mơta hơdrôm hră pioh kơ čơđai muai sang hră, brơi ĕp lăng, pơđok lu hơdrôm hră rĭm blan.

“Ba hơdrôm hră truh pơ kual ataih, kual tơnap tap hơmâo lu bruă mă ƀơk hơdrôm hră ăt kah hăng hơdôm bruă mă kiăng bang hyu tơlơi khăp, jơlan hơdră pioh kơ čơđai sang hră tơnap tap dŏ pơ kual ataih. Biă mă ñu thun anai kơčăo bruă ƀơk hơdrôm hră kơ čơđai muai kual ataih čơđai mơnuih djuai ƀiă, Sang bruă Khul čih pơčeh tơlơi hơk hơr adoh suang Việt Nam hơmâo ba rai 4000 hơdrôm hră kơ tơring čar Dak Lak kiăng ba nao pơ lu sang hră amăng tơring glông, biă mă ñu anăp nao kơ čơđai sang hră mơnuih djuai ƀiă tơnap tap amăng djop plơi pla”.

Ƀu kơnong amăng hơdră ngă tui Hrơi hơdrôm hră hăng gru grua hiam pơđok hră đôč ôh, bruă ba nao hơdrôm hră pơđok truh pơ djop sang hră, boh nik sang hră kual ataih amăng tơring čar Dak Lak hơmâo pok pơhai kơnang kơ hơdră anăn Sang pơđok hră ba hyu tơl plơi pla, sa bruă mă kah hăng tŭi bơngač tơlơi rơgơi ia kơhnâo, sang hră jă hiam ia mrơ̆t. Mơ̆ng anun anăp nao kơ tơhnal pơtrun kiăng pơsur pran jua hăng pơđĭ kyar tơlơi pơčeh phrâo hơk hơr hăng gru grua hiam pơđok hră amăng kual plơi pla, akŏ pơjing tơlơi juăt, among pơđok hră, djru hrom pơđĭ kyar gru grua hiam pơđok hră jai hrơi tŭ yua hăng ba glăi boh tơhnal klă hiam hloh.