Amăng sang glông ayong Y Wôn Knul (Ama Nhiên), ƀuôn Akŏ Dhông, plơi prong Buôn Ma Thuột, sa grup hlăk ai giăm ha pluh čô mơnuih glăk hok mơ-ak pơtŏp glăi tơlơi adoh suang, pĕ gong brô̆, đah atông čing, đa atông đing t’rưng, ƀơi anŏ ñu ayup đing pi, adoh hri. Ayong Y Wôn Knul brơi thâo, jai hrơi hơmâo lu ƀing tuai nao pơ Buôn Ma Thuột kiăng hmư̆, kiăng lăng tơlơi adoh suang, hơduah ĕp gru grua hiam mơng djuai ania Êđê. Biă ñu amăng hrơi jơnum ngui kơphê pơ anăp, anom bruă bơwih brơi tuai čuă ngui hơmâo hơduah hlâo abih laih hrơi ngui ngor atông čing pơ sang:

“Prăp lui mông jơnum ngui ngor jing adơi ayong ăt hơmâo pioh mông dŏ ră ruai, hrăm atông čing ƀudah pĕ gong brô̆, adoh k’kưt, akhan tơlơi akhan ƀơi kual Dap Kơdư, atông čing ni, atông đing t’rưng ni, adoh k’kưt  akhan ni, kiăng ñu mơ-ak hloh, klă hloh, pơƀuh brơi kơ abih bang thâo kiăng khăp, pơpŭ kơ gru grua mơng ƀing gơñu laih anun ta pơpŭ kơ ƀing nao pơhmư̆ dong”.

Jing anih čuă ngui gru grua hmư̆ hing ƀơi plơi prong Buôn Ma Thuột, hơdôm hrơi anai, ƀuôn Akŏ Dhông glăk hơmâo pơhrup hiam tui hăng lu kyâo pơtâo, anih anom hiam bơwih brơi bruă jơnum. Hrŏm hăng prăp lui anih đih pơdơi homestay hăng gơnam ƀong huă, hơdôm boh sang amăng plơi ăt kih rơmet, pơhrup glăi sang dŏ, bah amăng war, pik glăi ia kulor pơkra rơnap čih anăn črâo brơi tuai hyu ngui kiăng thâo jơlan nao rai, hyu ngui amăng plơi. Amai H’Tit Aliô̆, ƀuôn Akŏ Dhông lăi, sang anŏ ñu hơmâo brơi giăm 400 klăk prăk pơkra glăi sang glông, gum čơkă tuai lơ̆m hơmâo tuai nao ngui ngor, ƀong huă. Amai H’Tit Aliô̆ lăi:

“Hrơi jơnum ngui mông anai bơdjơ̆ nao ƀu kơnong kơphê đôč ôh mơ̆ anai ăt jing gru grua djuai ania Êđê ƀơi Buôn Ma Thuột dong anun jing plơi pla mơ-ak, dŏ čang biă. Kâo lăng plơi pla hok mơ-ak, dik dak hloh, glăk djru nao rai prăp lui hăng bơwih brơi bơyan Festival kơphê anai. Plơi pla hơmâo lu bruă kah hăng atông čing, ƀong huă, brơi mơñum kơphê đôč đač. Amăng plơi hơmâo hơdôm boh sang anŏ kah hăng Ay Ray, Tăng Bi, sang kơphê Arul, kơphê Akŏ Dhông gơñu ăt prăp lui ječ ameč mơn kơ Festival tal anai”.

Ƀơi hơdôm boh plơi pla amăng Dak Lăk, mơnuih ƀon sang ăt čơkă hrŏm mơn hăng bruă mă ngă hiam tui dong gru grua mơng hrơi ngui ngor kơphê, kah hăng Jơnum boh thâo gru grua - bơkơjăp drơi jăn djŏp djuai ania, ngă yang pin ia, phrâo kông, pơkiăo rơman, ngă yang rơman...Tui hăng ayong Y Thiên Adrơng, pô wai lăng anih tuai čuă ngui ƀơi plơi prong Buôn Ma Thuột, ñu prăp lui tơlơi čuă ngui djă gru plơi pla djuai ƀiă kiăng ƀing tuai hơmâo ƀuh gru grua hiam mơng đưm sô, bưp ană plơi pla - pô pơjing rai gru grua hiam ƀơi rim plơi pla.

“Kiăo tui jơlan hơdră mơng Jơnum ngui kơphê amra hơmâo lu bruă ƀơi Buôn Ma Thuột, ngă bruă ƀơi Lăk hăng Buôn Đôn. Rim kual amra hơmâo gru grua phara mơn, rim anih tuai nao ngui amra brơi tuai bưp, pơhiăp tom hăng ană plơi, thâo hluh pran jua ană plơi, tơlơi thâo khăp ƀu-eng mơng rim  djuai ania, rim plơi pla. Kâo pơtruh hăng mơnuih ƀon sang glăk dŏ hơdip pơ anun, kiăng gơnu ră ruai hơdôm tơlơi ƀing gơñu thâo hăng ƀing tuai”.

Jơnum ngui kơphê Buôn Ma Thuột tal 8 hơmâo lu mơnuih ƀơi Dak Lăk hok mơ-ak tơguan. Amăng hrơi mông dik dăk prăp rơmet čơkă “Blan klâo Dap Kơdư”, hơdôm boh plơi pla amra mut hrŏm sa pran pơjing rai tơlơi jơnum ngui djă gru hiam mơng kơphê hăng lu gru grua phara pơkŏn dong.