VOV4.Jarai - Lơ 25/8, ƀơi să Dak Phơi, tơring glông Lăk, Gơnong bruă Gru grua - Bơkơjăp drơị jăn hăng Tuai čuă ngui tơring čar Dak Lăk ngă hrŏm hăng Anom bruă gru grua - pôr pơhing tơring glông Lăk hăng Jơnum min mơnuih ƀon sang să Dak Phơi pơphun pơƀuh glăi tơlơi ngă yang pơtruh giăng mah mơng djuai ania Mnông Gar. Anai jing sa amăng hơdôm bruă hơmâo amăng kơčăo bruă “Djă pioh hăng pơtrut tui gru grua atông čêng ƀơi tơring čar Dak Lăk” yua Anom bruă ngă hrŏm jar kmar tơring čar Jeollabuk-do, dêh čar Hàn Quốc djru.

Pô phai ngă yang brơi 2 čô adơi ayong

Mông huă asơi kiăng 2 boh sang jê̆ giăm hloh, hơmâo abih bang mơnuih dŏ lăng

Tơlơi ngă yang hơmâo pơphun ƀơi sang ơi Y Thiêng Čil, ƀuôn Jiê Yuk, să Dak Phơi, tơring glông Lăk, tơring čar dak Lăk, pơtruh ngă giăng mah adơi ayong hăng ơi Y Nam Pan Ting hrŏm ha boh plơi mơn. Tui anun, ơi Y Thiêng Čil hăng ơi Y Nam Pan Ting lĕ gơyut gơyâo sui thun, juăt nao rai biă mă. Tơlơi ngă yang hơmâo 5 bơnah, hăng 2 tơlơi ngă yang phun anun lĕ ngă yang hiam drơi, lăi pơthâo kơ yang rơbang kơ bruă pơtruh adơi ayong mơng 2 boh sang anŏ hăng tơlơi ngă yang huă asơi mơng dua boh sang hơmao pơtruh ngă adơi ayong. Amăng mông ngă yang, čêng Bor hơmâo atông djring djring, ƀing tơdăm dra suang, hơ-ơč kơ tơlơi ngă yang pơtruh giăng mah adơi ayong mơng 2 boh sang anŏ. Tơdơi kơ tơlơi ngă yang anai, mơng dua čô mơnuih ƀu djơ̆ kơnung djuai hơget ôh, mơng anai 2 boh sang jing adơi ayong ha boh sang yơh, djru nao rai lơ̆m tơnap tap, huăi yap hlơi djru lu djru aset ôh.

Siu H’Mai: Pơblang