Amăng tal pơplông čing hơgor mơak kơdok kơdor, tha plơi Ama H’Loan Ƀuôn Kŏ Dhông, plơi prong Ƀuôn Ma Thuôt, pô ngă yang iâu yang hăng lăi pơthâo ƀing tuai rơnguai boh tơhnal ngă hmua pla pơjing amăng sa thun. Yua adai hiam, hlim rơnang phang mơak, phun pla đĭ hiam boh čroh asar lôm, bơnga blang čơnuh bluh tơdŭ đĭ klă, anun pơdai jor kơtor lu. Kơtor buă hơjai, pơdai buă atông glăi pơ sang laih.

Ră anai, truh puih rơnang phang pơđiă, djop sang anŏ gŏ uă ngă yang čuh un, blun mơnŭ pŭ kơ yang atâo ơi yă prin tha glăi ngui hrom abih bang. Tha plơi ama H’Loan brơi thâo, tơlơi ngă yang mơak djơ̆ bơyan hơmâo mơ̆ng đưm đă laih amăng gru grua tơlơi phiăn ngă yang hri gah djuai ania Êđê. Rơnuk anai, djuai ania Êđê pơblih pla phun pla pơkŏn kah hăng pla kơphê, tiu. Mah hnun, tơlơi ngă yang ƀu pơblih lơi.

Amăng hơdră ngă yang mơak, ƀing tuai dŏ hmư̆ hrom akhan hri kơ Dam San hing ang biă mă laih anun hơduah ĕp kiăng thâo kơ gru grua hiam kơphê mơ̆ng lu dêh čar amăng rŏng lŏn tơnah. Anai yơh bruă mă anăp nao čơkă jơnum prong ngui ngor bruă kơphê Ƀuôn Ma Thuôt thun 2023 him lăng či pơphun amăng blan 3 thun pơ anăp ƀơi Dak Lak.