VOV4.Jarai - Kiăng kơ djru brơi ƀing čơđai ngui ngor mơ-ak hăng ba glăi tơlơi yôm phăn, hăng lu tơlơi ngui, pel ĕp gru grua mơng djop djuai ania ƀơi tơring čar Dak Lak hơmâo pơphun. Hluai tui hơdôm tơlơi ngui ngor kiăng kơ ƀing čơđai dưi pel ĕp lu dong gru grua mơng djuai ania hăng hơdôm anŏ yôm phara.

Amăng sa hrơi rơnuč rơwang hrơi tơjut blan 8, lan sang ama Jenny, dŏ ƀơi ƀuôn Akŏ Dhông, plơi prong Buôn Ma Thuột dik dak mơ-ak hăng lơ̆m pơphun lu tơlơi ngui ngor. Lu čơđai mơng 8 truh 12 thun mut hrŏm amăng hơdôm tơlơi ngui anun lĕ “sŏ ia ba glăi pơ plơi pla”, “pơblang ngă rơđah tơlơi hơgŏm hăng tơlơi Angle”, “Tăp pơdai”, gum tơngan hrŏm tơnă hơbai gơnam ƀong huă amăng yang hrơi dong, anai lĕ hơdôm añăm tam, hơbơi pơtơi juăt tơnă hơbai rĭm hrơi mơng djuai ania Êđê. Hrŏm hăng đok ur kiăng pơtrut pơsur, jua sung hlao tăp pơdai hrŏm hăng hơdôm boh tơhnal pơlăi nao rai kơplah wah tơlơi Angle - Yuăn ngă kơ mông ngui ngor mơ-ak biă mă. Amon Tô Trần Pha Lê, 12 thun, rai mơng plơi prong Kon Tum, tơring čar Kon Tum hok mơ-ak lơ̆m nao ngui hrŏm, ñu brơi thâo:

“Anai lĕ jơlan hơdră blung a mơ̆ kâo nao ngui hrŏm, ngui bơyan pơdơi prong, Farmtrip hăng jơlan hơdră ngui hrŏm kar hăng ană rơman. Kâo hok mơ-ak biă mă lơ̆m thâo hluh rơđah dong tơlơi hơdip mơda mơng djuai ania Êđê. Kâo čang rơmang dưi mut hrŏm lu tơlơi ngui ngor dong kiăng kơ thâo lu dong gru grua mơng hơdôm djuai ania phara”.

Ƀing čơđai tơnă hơbai hăng hơdôm añăm ƀong mơnuih djuai ania anun lĕ añăm trong

Ƀu djơ̆ konong dưi tơnă hơbai hăng mut hrŏm hơdôm tơlơi ngui ngor, amăng jơlan hơdră anai ƀing čơđai ăt dưi čuă ngui amăng ƀuôn Akŏ Dhông, pel ĕp gru grua hăng hyu lăng, mut ngui amăng sang djuai ania Êđê, hrăm mơñam mrai, hmư̆ arăng pĕ gông brô djuai ania, kač rup hăng mut hrŏm lu tơlơi ngui mơ-ak pơkŏn. Anai lĕ jơlan hơdră tui bruă bơwih brơi tuai čuă ngui pel ĕp gru grua brơi kơ ƀing čơđai hăng anăn “Ană rơman” yua anom bruă pơtô tơlơi Angle ƀơi plơi prong Kon Tum, tơring čar Kon Tum pơphun ƀơi Dak Lak.

Pel ĕp teh rup ƀơi abăn ao hăng bruă mơñam mrai mơng djuai ania Êđê

Amai Nguyễn Thị Tuyết Nhung, Khua anom bruă pơtô tơlơi Angle Sunshine, ƀơi tơring čar Kon Tum brơi thâo: amăng bơyan pơdơi prong, hrŏm hăng bruă pơtô hrăm ƀơi anih, ƀing čơđai dưi hyu čuă ngui, pel ĕp gru grua ƀơi hơdôm tơring čar kual Dap kơdư. Mơng anun ngă kơ ƀing čơđai amuñ hrăm tui, hăng dưi ngui ngor mơ-ak laih dong thâo hluh rơđah gru grua, boh pơhiăp hăng boh hră. Ƀơi hơdôm tơring čar anun lĕ Gia Lai, Kon Tum ƀudah Dak Lak, hơdôm bruă ngui pel ĕp gru grua mơng djop djuai ania ƀơi anai ngă čơđai hor hăng đing nao biă mă.

“Ƀu nao pơpă ataih ôh, mơ̆ ƀing čơđai dưi ngui ngor hrŏm abih bang hăng ƀing gơmơi ƀu djơ̆ kơnong pơphun hăng tơlơi yuăn ƀudah ngui ngor tui tơđar đôč ôh mơ̆ ƀing gơmơi ăt yua wŏt tơlơi Angle, yua tơlơi Angle amăng mông ngui ngor sit nik kiăng kơ ƀing čơđai thâo yua, thâo pơhiăp kiăng hiưm pă brơi kơ djơ̆ hloh”.

Lăng arăng kŏng tơpai čeh

Ƀơi Dak Lak, amăng bơyan pơdơi prong thun anai lu tuai čuă ngui amăng plơi pla pơphun lu mông ngui pel ĕp gru grua brơi kơ ƀing tuai lĕ ƀing čơđai anet anun lĕ nao pel ĕp đing năm, đing buôt, bruă kŏng tơpai čeh, mơñam mrai, hơbai añăm trong phĭ, čuh đing brong. Hăng nao pel ĕp rah, hơmâo arăng črâo brơi tơl tơngan. Kah hăng hơdôm tour “nao ngă đang hmua”, ƀing ta amra dŏ hơdip hrŏm amăng plơi pla, đĭ rơdêh kông nông nao ngă kơphê, trun nao dơnao ia mă akan ƀudah hrăm ayup đing.

Ayong Y Thiên Adrơng, mă bruă ƀơi kông ti bơwih brơi tuai čuă ngui Siam Tour, ƀơi plơi prong Buôn Ma Thuột, tơring čar Dak Lak brơi thâo, hơdôm tơlơi dưi mơng djop plơi pla dŏ djă pioh gru grua bơwih brơi tuai čuă ngui, anom bruă gir run pơlir hơbit djop mơta bruă kiăng kơ lăi pơthâo anŏ yôm phara kiăng tuai čuă ngui thâo, biă mă ñu lĕ ƀing čơđai anet hơmâo dong lu tơlơi ngui pel ĕp gru grua amăng kual.

“Ƀing čơđai dưi ngui pel ĕp gru grua sang dŏ djuai ania, eng ao, hluai tui hơdôm bruă pơlir hơbit tui gru grua. Ƀing čơđai amra pơplông tơnă hơbai. Tơnă hơbai añăm hơget tui hluai ƀing gơñu pơmĭn mă. Samơ̆, añăm tam lêng kơ yua tui gru grua djuai ania Êđê, kiăng kơ thâo tong ten gru grua tơnă hơbai. Kâo čang rơmang dưi pơlir hơbit abih bang mơnuih amăng plơi pla, rĭm boh plơi pla jing sa kual bơwih bơwang prong rơhaih; ƀu djơ̆ kơnong kơphê, sang dŏ, bruă mơñam abăn ao đôč ôh mơ̆, dŏ lu mơta kiăng kơ lu hơkrŭ glăi lăi pơthâo gru grua djuai ania pô”.

Pel ĕp gông brô̆ djuai ania hăng hrăm djŭp đing

Hăng jơlan hơdră ngui rah hrăm rah, hơdôm jơlan hơdră ngui pel ĕp gru grua brơi kơ ƀing čơđai anet ƀơi Dak Lak hơmâo pơhưč lu čơđai mut hrŏm. Ƀu djơ̆ kơnong ngă kơ ƀing čơđai thâo dong hơdôm bruă tŭ yua amăng bơyan pơdơi prong anai, hơdôm bruă anai ăt pơgôp kiăng ƀing čơđai dưi pel ĕp thâo tong ten dong kơ gru grua djop djuai ania ƀơi ƀon lan, mơng anun hơkrŭ glăi hăng tŏ tui djă pioh hơdôm anŏ yôm phara mơng gru grua hiam klă mơng djop djuai ania.

H’Xíu: Čih

Siu Đoan: Pơblang