Dong mơng thun anai, jơnum ngui Sầu riêng Krông Pač amra pơplih klă tui jing Jơnum ngui sầu riêng tơring čar Dak Lak. Boh tơhnal anai hơmâo Jơnum min mơnuih ƀôn sang tơring čar Dak Lak bơtŭ ư amăng hơdôm boh tơhnal klah čun mơng Khul apăn bruă Ping gah tơring čar, tơdơi kơ sem lăng hơdôm boh tơhnal yôm mơng hơdôm tal pơphun hlâo anun. Tui jơlan gah phrâo, Jơnum ngui sầu riêng tơring čar Dak Lak amra pơphun prong gưl tơring čar, pơphun 2 thun ha wŏt. Him lăng, jơnum ngui blung a prong gưl tơring čar amra pơphun amăng thun anai, anai lĕ bruă pơtum abih bang, pơlir kơplah wah ngă hmua, gru grua hăng tuai čuă ngui.

Jơnum ngui amra hơmâo lu bruă mă anun lĕ jơnum sang čơ sĭ gơnam ngă hmua, tal pơplông boh troh jơman, ngui đĭ hyu rơdêh bơnga, tơlơi ngui sô hơđăp, lăi pơthâo tuai čuă ngui, pơlir blơi pơhrui gơnam đang hmua….Tui gơnong bruă gru grua, bơrơguăt drơi jăn hăng tuai čuă ngui tơring čar Dak Lak, tơring car glăk prap lui akŏ bruă pơđĭ kyar tong ten brơi Jơnum ngui sầu riêng, hăng pơsit tong lĕ tơlơi kơđŏm glăi amăng bruă tuai čuă ngui amăng rơwang tal 3 thun anai, sit biă ñu amăng bơyan pơdơi akŏ pơjing kơnuk kơna lơ 2/9.