Nao hrăm hơmâo 50 čô mơnuih, ƀing hơmâo ngă bruă čơkă tuai ƀơi djop anih ba tuai hyu ngui, anih brơi tuai jưh homestay, sang anŏ mơnuih ƀôn sang čơkă tuai hyu ĕp lăng đang hmua, đang boh čroh. Anih pơtô hrăm anai, kiăng ngă gêh găl kơ mơnuih mă bruă amăng gơnong bruă ba tuai hyu ngui thâo hluh, pơđĭ tui tơlơi thâo hluh akŏ pơjing hăng pơkra ming gơnam sĭ mơdrô kơ tuai hyu ngui; djru pơtrut bruă pơkra ming lu gơnam tam hloh pioh kơ tuai blơi lăng hiam, phara, pơhưč tuai rơnguai nao pơ Dak Lak lu tui.

Yă Nguyễn Thụy Phương Hiếu, Kơ-iăng Khua Gơnong bruă Gru grua-Pơrơguăt drơi jăn-Tuai čuă ngui Dak Lak brơi thâo, anih pơtô hrăm anai ngă tui akŏ bruă pơtô hrăm rĭm thun kiăo tui Kơčăo bruă pơđĭ kyar tuai čuă ngui dưi hơmâo anom bruă Ping gah tơring čar Dak Lak čih pơkra mơ̆ng thun 2021.