VOV4.Jarai - Mơguah lơ 8/4, ƀơi sang pơplông Bơkơjăp drơi jăn tơring čar Daklak, plơi prong Buôn Ma Thuột, Gơnong bruă bôh thâo, bơkơjăp drơi jăn hăng tuai čuă ngui tơring čar gum hrom hăng Grŭp djuai ania tơring čar pơphun “Pok phun Jơnum pơplông bơkơjăp drơi jăn djop djuai ania Daklak tal 18 thun 2022”.

Pô pơ ala kơ Khua Jơnum min mơnuih ƀôn sang tơring čar Daklak ƀơk khăn gru djă hơdor pioh kơ hơdôm grŭp

Pri pơplông amra pơphun mơng lơ 8/4 truh lơ 10/4/2022. Rơbêh kơ 600 čô mơnuih rai mơng 15 grŭp mơng hơdôm tơring glông, plơi prong hăng plơi prong Buôn Ma Thuột, gum hrom pơplông 7 mơta tơlơi anun lĕ: Pah bôh lông đah kơmơi hăng đah rơkơi, đă bôh lông đah kơmơi ƀơi tơdrŏn đă anet, pơplông đuăi bơnai hăng rơkơi, đĭ gai sưng bơnai hăng rơkơi, pơnah hrăo bơnai hăng rơkơi, tŭn gai bơnai hăng rơkơi hăng dui hrĕ.

Ƀing pơplông gum hrom pơplông đuăi

Anai lĕ hơdôm tơlơi pơplông tui phiăn juăt, juăt pơphun amăng hơdôm tal jơnum ngui rim thun, khă hnun hai yua kơ klin Covid-19 ngă tơnap, bruă jơnum thun 2021 tơ̆i đưn hĭ  truh kơ thun anai. Hơdôm mơnuih pơplông lĕ neh wa djuai ania ƀiă glăk dô̆ hơdip hăng mă bruă ƀơi Daklak. Hluai tui bruă pơplông, hrom hăng pơhư prong bruă pơhrăm pơplông bơkơjăp drơi jăn, pơđĭ tui tơlơi suaih pral, pran jua kơ mơnuih ƀôn sang; mă yua, pơgang hăng ngă tui hơdôm bôh yôm bôh thâo phiăn juăt, hruă kơjăp pran gum hrom hơbit amăng plơi pla djop djuai ania ƀơi tơring čar./.

Siu H’ Prăk: Pơblang