Tui hăng Gơnong bruă wai lăng bôh thâo, bơkơjăp drơi jăn hăng tuai čuă ngui Daklak, yap truh tom brơi lơ 26/1, anun lĕ lơ 5 Tết tui phiăn juăt, tơring čar Daklak hmâo čơkă 130 rơbâo wot čô tuai, biă ñu tuai amăng lŏn ia. Abih bang prăk pơhrui glăi mơng bruă tuai hyu čuă ngui hmâo 14 klai prăk, đĭ ha mơkrah bơhmu hăng thun hlâo. Rơnoh mă yua anih anom, anih dô̆ hơnong ñu hmâo rơbêh kơ 55%.

Tui hăng ơi Lại Đức Đại, Kơ-iăng Khua Gơnong bruă wai lăng bôh thâo, bơkơjăp drơi jăn hăng tuai čuă ngui Daklak, mơng hlâo kơ tết hơdôm tơring glông, plơi prong amăng tơring čar hmâo kơtưn pel ĕp laih, pơplih pơkra, pơkra glăi hơdôm anih anom tuai čuă ngui hăng gơnam pioh kơ tuai čuă ngui hmâo ră anai kiăng djru brơi tuai klă hloh. Hơdôm anih anom ƀong mơñum hăng anih dô̆ glăi leng kơ lăi pơdah rơđah nua hăng sĭ djơ̆ nua pơkă, ƀu hmâo tơlơi pơgô̆ nua tuai. Biă ñu, amăng tal Tết tui phiăn juăt thun anai, tơlơi ayuh hyiăng gêh gal, hơdôm bruă mă bôh thâo, jơnum ngui ƀơi hơdôm tơring glông, plơi prong hmâo djru ngă pơhư̆č laih tuai čuă ngui nao pơ̆ Daklak./.