VOV4.Jarai - Čơtlăm lơ 27/5, ƀơi plơi prong Buôn Ma Thuột, Sang djă pioh gru grua đưm lŏn ia gum hrom hăng Sang djă pioh gru grua đưm tơring čar Daklak pơphun jơnum lăi pơthâo glăi ƀơƀiă bôh tơhnal klơi hơduah ĕp gơnam đưm Thác Hai tal 2. Gru grua pel ĕp gơnam đưm Thác Hai gah thôn 6, să Ia Jlơi, tơring glông Ea Sup, tơring čar Daklak.

Ƀing khua pơ ala hyu čuă lăng gơnam đưm pơdă prưng

Gru gơnam đưm anai dưi ƀuh amăng akô̆ thun 2020 hăng klơi ĕp tal sa amăng blan 3/2021. Ƀơi tal klơi ĕp tal 2 ngă tui mơng rơnuč thun 2021 truh ră anai, ƀing kơsem ĕp gơnam đưm hmâo pơhrui mă sa mrô gơnam gru đưm, hmâo lu mơta: jông bôh pơtâo, gơnam man hăng lŏn, gơnam tuh čai, pơsăt, rơbêh kơ 1000 gai jơi khuer bôh pơtâo djop mơta hăng hơdôm rơbăn tơhla anet. Tui hăng ƀing hyu hơduah ĕp gơnam đưm, gru grua đưm Thác Hai lĕ gru grua lu mơta, hmâo tơhnal anih dô̆, jing kual pơsăt rah, laih anun jing sa anih anom pơkra jơi khuer bôh pơtâo prong. Gru gơnam đưm hmâo tơhnal pơkă rơgao hăng anai năng ai ñu 3.500 thun truh 2.000 thun hlâo adih hăng dô̆ glăi sui năng ai ñu 1.000 thun./.

Siu H’ Prăk: Pơblang