Tơdơi kơ lu wơ̆t pơdah tơlơi ngă sen ƀơi plơi prong Buôn Ma Thuột hăng hơdôm boh tơring amăng Dak Lăk, phrâo anai, tơlơi ngă sen akhan hri “Khát vọng Dam Săn - Tơlơi čang rơmang mơ̆ng Dam Săn” hơmâo pơdah pơƀuh pơ lu mơnuih hor kơ tơlơi adoh suang ƀơi ƀôn prong Hồ Chí Minh. Tơlơi ngă sen akhan hri yua pô pơčeh tơlơi adoh Nguyễn Cường pơčeh kiăo tui Tơlơi akhan hri Dam Săn mơ̆ng djuai ania Êđê, pơƀuh rup mơnuih sông kơtang Dam Săn čang rơmang kơtưn đĭ akŏ pơdong plơi pla hăng pơgang ba phung djuai prong kơtang. Tơdăm Dam Săn ngă glưh pran jua Hơbia Yang hrơi, ba glăi pơ-iă pơčrang bang bơngač kơ ană plơi pla, pơjing rai tơlơi pơkhăp hăng tơlơi hơdip phrâo pơ kual čư̆ siăng Dap Kơdư kơdrưh kơ-ang anai. Yă Lưu Thị Hoa, dŏ ƀơi ƀôn prong Hồ Chí Minh lăi:“Blung a kâo hơmâo lăng tơlơi adoh ngă sen akhan hri Kơtưn đĭ Dam Săn, kâo lăng mơ-ak biă. Mơ̆ng hlâo kâo juăt lăng cải lương, lăng mơn arăng ngă sen adoh, samơ̆ aka ƀu ƀuh ôh tơlơi ngă sen adoh mơ-ak kar hăng anai. Mơnuih sông kơtang Dam Săn jing mơnuih hơmâo pran jua hiam, thâo pap kơ arăng, khin hơtai sông kơtang biă, ngă hmư̆ hing hyu djŏp djang kiăng abih bang ană plơi hla tui”.

Tơlơi ngă sen adoh hri anai yua mơnuih mơ̆ng Grup adoh suang djuai ania ƀiă Dak Lăk pơphun. Amăng anun, pô pơ ala kơ Dam Săn lĕ Nghệ sĩ ưu tú Y Joel Knul hăng pô pơ ala H Nhí (bơnai Dam Săn) yua bơnai ñu lĕ H’Lueng Niê, mơnuih apăn bruă adoh.

Nghệ sĩ ưu tú Y Joel Knul ră ruai, mơ̆ng anet ñu hơmâo hmư̆ ơi yă akhan hri, ñu pơpŭ biă mă kơ Dam Săn yua dah pô anai ñu hơmâo hơtai, khin djai drơi pô yua kơ ană plơi. Yua hnun, lơ̆m hơmâo ngă sen, ñu lăng kơdrưh biă. Rim wơ̆t hyu pơƀuh tơlơi ngă sen akhan hri anai, mah glăk hrăm đôč, samơ̆ pran jua ñu mut hrŏm hăng pô ñu pơ ala mơtăm. Boh thâo gru grua hiam amĭ ƀă yă pơjing mut amăng drah kơtăk laih.

“Lơ̆m kâo pơ ala kơ Dam Săn, tŭ kơ pơhưč pơhač amăng pran jua, yua dah kâo mut hrŏm tơlơi hơdip hăng pô kâo pơ ala. Ƀuh bruă ngă hiam djai drơi pô yua kơ ană plơi, đam črăn yơr tơngan ngă glưh pran mơn, lơ̆m H’Nhí kuar hăng kĕ tơngan Dam Săn rơngôt kơtang kơtit, kâo ƀlĕ ia mơta. Ƀu hơmâo hơget prong lơi, samơ̆ ngă lĕ ƀu amuñ ôh, tơlơi ngă sen hơmâo boh pia yôm biă. Tơlơi čih mơ̆ng pô pơčeh tơlơi adoh Nguyễn Cường kiăo tui mơ̆ng tơlơi akhan Dam săn jing yôm biă mă”.

Tui hăng Nghệ sĩ ưu tú Y Joel Knul, blung a pô pơ ala kơ Dam Săn hơmâo jao kơ pô pơkŏn. Samơ̆ lơ̆m bưp hăng pơtŏp lăng hlâo, pô pơčeh tơlơi adoh Nguyễn Cường ruah ñu dong. Bruă phun ñu lĕ pô adoh wơ̆t hăng pĕ goong atông brô̆, tơdơi kơ pơhrăm lăng ngă sen adoh hri, ñu gir hrăm lu biă. Sit hnun yơh, lơ̆m tơlơi ngă sen akhan hri Tơlơi čang rơmang mơ̆ng Dam Săn hơmâo ba pơƀuh, hơmâo lu mơnuih hor lăng, anun jing tơlơi pơplih phrâo amăng tơlơi hơdip mă bruă mơ̆ng ñu.

Amăng giăm 25 thun mă bruă adoh suang hăng 15 thun ngă bruă amăng Grup adoh suang djuai ania Dak Lăk, Nghệ sĩ ưu tí Y Joel Knul dưi ngă lu bruă truh kih, hơmâo mă lu miđai, pri ƀơi hơdôm tal pơplông amăng hăng čar rơngiao. Hmư̆ hing kar hăng Pri ia prăk thun 2019 hăng Pri ia mah thun 2022 ƀơi tal Pơplông adoh suang ASEAN, Pri ia prăk Pơplông adoh suang đơ đam dêh čar thun 2021...Amai H Su Yn Byă, dŏ ƀơi plơi prong Buôn Thuột, Dak Lăk brơi thâo.

“Nghệ sĩ ưu tú Y Joel ba glăi tơlơi adoh, yŭ adoh amăng djuai ania Êđê, hơdôm tơlơi adoh mơ̆ng ñu phara, mơ-ak biă, hơmâo lu mơnui thâo. Čang rơmang ñu pơčeh rai lu tơlơi adoh mơ-ak hloh hăng mơnuih hor hmư̆ tơlơi adoh”.

Yă Nguyễn Thụy Phương Hiếu, Kơ-iăng khua gơnong bruă gru grua, bơkơjăp drơi jăn hăng tuai čuă ngui Dak Lăk brơi thâo, mơnuih rơgơi kơhnâo Y Joel hơmâo pơpŭ anăn Nghệ sĩ ưu tú mơ̆ng thun 2015, lơ̆m anun ñu 40 thun, ră anai jing mơnuih thun aset hloh amăng 4 čô mơnuih Nghệ sĩ ưu tú amăng tơring čar. Ƀu kơnong hơmâo er adoh mơ-ak đôč ôh mơ̆, mơnuih kơhnâo Y Joel Knul jing mơnuih ngă bruă gir, hor kơ bruă biă mă. Ră anai, kơhnâo Y Joel hơmâo djŏp tơlơi kiăng hơmâo laih, yua hnun, Gơnong bruă glăk ngă hră pơ-ar rơkâo Kơnuk kơna pơpŭ jing Nghệ sĩ Nhân dân.

“Nghệ sĩ ưu tú Y Joel Knul gir ngă bruă kiăng ñu rơgơi hloh, abih bang bruă mă mơ̆ng Grup adoh suang djuai ania tơring čar, hrŏm hăng grup akŏ pơjing anih mă bruă gum pơgôp, jai hrơi đĭ kyar hloh. Gơnong bruă ăt djru brơi mơn kiăng Nghệ sĩ ưu tú Y Joel Knul dưi pơtŏp hrăm đah mơ̆ng dưi mă lu pri hloh, đah mơ̆ng dưi pơsit Nghệ sĩ Nhân dân pơ anăp anai”.

Hăng hơdôm tơlơi gir run ngă bruă, Nghệ sĩ ưu tú Y Joel Knul glăk ba glăi boh than hiam amăng bruă adoh suang ñu, hơmâo lu mơnuih khăp ƀu-eng. Hrŏm hăng adoh, ră anai ñu glăk pơmin ngă bruă phrâo dong amăng tơlơi adoh suang Dap Kơdư, čang rơmang dưi tum pơƀut hăng pơčeh phrâo tơlơi adoh bơni kơ Dap Kơdư, pơjing rai tơlơi adoh phrâo bơwih brơi mơnuih hor hmư̆.