VOV4.Jarai - Amăng 2 hrơi lơ 20 hăng lơ 21/7, ƀơi plơi prong Buôn Ma Thuột, tơring čar Daklak pơphun jơlan hơdră bơkơtuai bôh thâo čơđai muai djop djuai ania kual Tŏng Krah dêh čar hăng Dăp Kơdư. Nao gum hrom hmâo 200 čô mơnuih pơ ala lĕ čơđai muai djuai ania mơbruă ƀơi hơdôm bôh tơring čar Daklak, Đà Nẵng, Lâm Đồng, Kontum, Dăknông, Gialai.

Čơđai muai mơbruă dưi čơkă mă prăk djru hrăm hră Vừ A Dính

Ƀing čơđai ƀu djơ̆ kơnong kơ hrăm hră rơgơi ôh mơ̆ gơñu jing ƀing ngă khua anih hrăm čơđai muai, Khua khul grŭp rơgơi, juăt djru gơyut gum hrom pơplih phrâo. Amăng jơlan hơdră, ƀing pơ ala dưi gum hrom mlăm tŏ apui jơnum ngui hăng hmư̆ hơdôm tơlơi adôh suang pha ra mơng djuai ania yua kơ hơdôm grŭp gum hrom jơnum ngui pơdah; gum hrom bơkơtuai, hơduah ĕp hơdôm gru hiam bôh thâo pha ra tui kual...

Ƀing čơđai dưi hơduah ĕp kơ bôh thâo djop djuai ania

Tal anai, Khul hlăk ai rơnuk Hồ Chí Minh pioh laih gơnam brơi lĕ tơdron bơkơjăp drơi jăn hmâo nua 150 klăk prăk hăng Sang Khăn quàng đỏ hmâo nua 80 klăk prăk kơ tơring čar Daklak. Keh prăk djru hrăm hră Vừ A Dính brơi 50 anung prăk djru hmâo nua 50 klăk prăk kơ 50 čô čơđai muai djuai ania ƀiă kual Tŏng Krah dêh čar hăng kual Dăp Kơdư./.

Siu H’ Prăk: Pơblang