Hăng anăn “Tum pơƀut djop tơlơi yôm phara”, hrơi ngui gru grua djop djuai ania tơring čar Dak Lak thun anai pơphun dong mơng lơ 18-20/11. Tal blung a pơphun prong gưl tơring čar hăng 10 bruă phun hăng 2 tơlơi ngui ngor hluai tui, hrơi ngui ngor pơhưč rơbêh 800 čô mơnuih kơhnâo kơhnăk, mơnuih ƀon sang rai mơng 15 boh tơring glông, plơi prong ƀơi Dak Lak mut hrŏm. Amăng anun, jơlan hơdră pok pơphun hăng hơdôm gru grua yôm phara, hơmâo anŏ mut hrŏm kơplah wah jua gông brô̆ sô hơđăp hăng rơnuk phrâo, laih dong pran gum pơgôp djop djuai ania.

Jơlan hơdră pơdah gru grua yôm phara, tơlơi adôh suang hơmâo lu tơlơi mơ-ak. Amăng mông pơđut hĭ, khul pơphun hơmâo jao hră tŭ yap brơi hơdôm khul grup hơmâo tơlơi ngui mơ-ak hloh amăng hơdôm boh tơhnal amăng jơlan hơdră; jao hră pơpŭ brơi 20 grup rơgơi hloh amăng bruă pơphun hăng mut hrŏm hrơi ngui gru grua djop djuai ania tơring čar Dak Lak thun 2023.