Tết Bunpimay pơphun hăng hơdôm phiăn juăt mơ̆ng djuai ania Lao kah hăng: mơnơi Phơt, rơkâo tơlơi rơnuk rơnua thun phrâo; kă hrĕ mrai ƀơi tơngan rơkâo tơlơi tơphă, bư̆ rơñan čuah rơkâo tơlơi pơđĭ kyar, pơdrŏng asah, tlaih apui kơđen hăng dlông ia krông, pơdah tơlơi adôh suang tui phiăn juăt, suang lăm vông.

Tơlơi kiăng lăi nao amăng jơnum ngui thun anai lơm blung a hmâo Phiăn pŭ H’Bia thun phrâo H’ Bia Sang Khane, suang lăm vông hăng săi ia pơdah ƀơi glông jơlan amăng ƀuôn Trí ba mut ƀơi anih phun tuai čuă ngui Tơdrông toa hăng Bul pơtâo Ây Nô. Ƀơi anai, mơnuih ƀôn sang hăng tuai čuă ngui pơhrua pô mut amăng hơdôm tơlơi lông lăng mơ-ak kah hăng bơkơtuai nao rai bôh thâo đưm čing hơgor, pơdah gông brô̆ Lào; pơplông “tơnă hơbai plơi bul pơtâo” hăng “ia băn ao djuai ania Dap Kơdư”; găn rơgao lăng bruă pơhrôp brơi kơ rơman, čơphin rŭp rơman hrŏm hăng tuai./.