Tui hăng hră lăi pơthâo mơng Ding jum gru grua - bơrơguăt drơi jăn hăng tuai čuă ngui, truh ră anai, hơmâo laih 51 sang pơđok hră tơring čar, 541 sang pơđok hră tơring glông hăng giăm 2.200 sang pơđok hră să ƀơi hơdôm ƀon lan hơmâo mơnuih djuai ania ƀiă dŏ hơdip hơmâo hơdrôm hră pơđok pơblang jing dua tơlơi anun lĕ tơlơi djuai ania ƀiă - tơlơi yuăn. Sit biă ñu, lu sang pơđok hră hơmâo gir run pioh amăng plang internet hơdôm boh pơhiăp mơng djuai ania pô kiăng kơ dưi djă pioh sui ƀiă anun lĕ Sang pơđok hră tơring čar Yên Bái hơmâo dưm 100% hơdrôm hră hăng tơlơi djuai ania ƀiă; sang pơđok hră tơring čar Sơn La hơmâo rơbêh 1.000 hơdrôm hră hăng tơlơi tơlơi djuai ania Thái sô hơđăp, dưm amăng plang intenet rơbêh 23.000 pok hră tơlơi djuai anai ƀiă; sang pơđok hră brơi mơnuih mơnam ƀơi hơdôm boh sang phơ̆t Khmer pok brơi mơnuih nao pơđok hơdrôm hră djuai ania Khmer mơng hơdôm tơring čar, ƀôn prong kual Dơnung.

Ră anai, ƀơi hơdôm boh ƀon lan, boh pơhiăp hăng tơlơi čih mơng hơdôm djuai ania hơmâo tŭ yap samơ̆ lăi pơthâo kơnong ƀơi hơdôm anih đôč, lu mơnuih djuai ania ƀiă aka ƀu mă yua boh pơhiăp mơng djuai ania pô. Yua anun, bruă djă pioh, lăi pơthâo boh pơhiăp, tơlơi čih mơng djuai ania ƀu djơ̆ bruă hajăn hlơi ôh mơ̆ kiăng gum tơngan hrŏm mơng abih bang mơnuih. Yua anun yơh, amăng hrơi blan laih rơgao, lu ƀon lan hơmâo lu bruă mă ba glăi tŭ yua. Pơhmutu ƀơi tơring čar Khánh Hòa pok anih pơtô hrăm tơlơi djuai ania Rắc-lây brơi ƀing apăn bruă, mơnuih mă bruă; tơring čar Phú Thọ djă pioh boh pơhiăp, tơlơi čih mơng djuai ania ƀiă hluai tui bruă pơtô hơdôm tơlơi adôh suang, tơlơi ngui ngor mơng djuai ania ƀiă; ƀudah tơring čar Ninh Thuận kơsem minh, duñ pơƀut glăi, čih hơdrô hơdrôm hră djuai ania Chăm, pơphun jao Hră mơ-it sô hơđăp mơng djuai ania Chăm hăng hơmâo anom bruă djă pioh dêh čar II ƀôn prong Hồ Chí Minh pơkra ming, dưm amăng plang internet.

Amai Bhling Thị Tuyền, dŏ ƀơi să Cà Dy, tơring glông Nam Giang (Quảng Nam) lĕ mơnuih djuai ania Cơ Tu, ñu lĕ mơnuih hlâo anun kiăo tui hrăm tơlơi djuai ania ƀiă, ñu brơi thâo, amăng hơdôm tal pơtô hrăm, ƀing mơnuih kiăo tui hrăm hơmâo ƀing  rơgơi kơhnâo, ƀing wai lăng pơtô hăn črâo ba boh pơhiăp, tơlơi čih mơng djuai ania pô. Tơlơi anai yôm phăn biă mă hăng djơ̆ hăng tơlơi sit nik mơng mơnuih djuai ania ƀiă: Nao pơtop hrăm ñu hok mơ-ak hăng pơ-ư ang biă mă. Anai lĕ tal blung a ñu hơmâo arăng pơtô brơi kiăng djă pioh boh pơhiăp, tơlơi čih mơng djuai ania Cơ Tu. Kar kăi hăng lu neh met wa ƀơi să Cà Dy, ñu kơnong thâo pơhiăp đôč mơ̆ aka ƀu thâo čih ôh. Čang rơmang anai lĕ hrơi mông kiăng ñu amra pel ĕp hăng hrăm rơđah dong kơ boh hră mơng djuai ania Cơ Tu lăi phara hăng gru grua djuai ania hnun mơn.

Hrŏm hăng anun, Ding jum pơtô pơjuăt ăt hơmâo lu hơdră kiăng pok prong, đĭ tui klă dong amăng bruă pơtô hrăm tơlơi djuai ania ƀiă amăng sang hră. Ră anai đơ đam dêh čar hơmâo 6 tơlơi djuai ania ƀiă hơmâo pơtô hrăm sit nik amăng hơdôm boh sang hră, anun lĕ Mông, Êđê, Jarai, Bahnar, Chăm hăng Khmer ƀơi 21 boh tơring čar, ƀôn prong gah gơnong glông. Rĭm thun, hơmâo giăm 600 boh sang hră hăng 4.500 anih pơtô hrăm hăng rơbêh 110.000 čô čơđai hơmâo pơtô brơi tơlơi djuai ania ƀiă. Sit biă ñu, Jơlan hơdră tui hơnong pơkă dêh čar amăng pơđĭ kyar bơwih ƀong huă-mơnuih mơnam amăng kual mơnuih djuai ania ƀiă hăng kual čư̆ siăng rơwang thun 2021-2030 amra hơmâo dong rơnoh gum djru amăng djă pioh boh pơhiăp, tơlơ čih mơng mơnuih djuai ania ƀiă.

Tui ơi Trần Mạnh Hùng, kơ-iăng khua anom bruă gru grua djuai ania (Ding jum gru grua, bơrơgăt drơi jăn hăng tuai čuă ngui), ră anai, hơdôm boh ƀon lam amăng đơ đam dêh čar hơmâo pok pơhai lu anih pơtô hrăm kơ bruă djă pioh boh pơhiăp, tơlơi čih brơi mơnuih djuai ania ƀiă, amăng anun hơmâo ƀing tha plơi, khua plơi ăt kah hăng ƀing mơnuih arăng đăo gơnang amăng plơi pla. Hơdôm anih pơtô hrăm kơ bruă djă pioh boh pơhiăp, tơlơi čih ƀu djơ̆ kơnong bruă yôm phăn kiăng hrưn đĭ hluh rơđah dong mơng gong gai hăng mơnuih ƀon sang kơ gru grua mơng djop djuai ania đôč ôh mơ̆, kiăng djru brơi tơlơi hơdip rĭm hrơi, pơgôp pơđĭ kyar bơwih ƀong huă, mơnuih mơnam amăng ƀon lan:

“Bruă pơphun hơdôm anih pơtô hrăm lĕ bruă kiăng djă pioh gru grua amăng đơ đam dêh čar hăng hơdôm boh ƀon lan mơnuih djuai ania ƀiă. Anom bruă gru grua djuai ania čang rơmang anai amra jing akŏ phun, pok prai phrâo kiăng gum hrŏm kơplah wah gơnong glông hăng ƀon lan hăng hơnong pơkă ngă hiưm pă kiăng djă pioh gru grua djuai ania tŭ yua hloh”.

Kar kăi tui anun mơn, mơng hơdôm tơlơi gir run amăng bruă gru grua ngă gêh gal kiăng djă pioh boh pơhiăp, tơlơi čih mơng djuai ania ƀiă hơmâo mă yua lu dong, djop anih amăng tơlơi hơdip mơda, pơgôp ngă tui tơlơi pơtrun jơnum gơnong glông 5 (tal VIII) amăng pơjing hăng pơđĭ kyar gru grua Việt Nam pơđĭ kyar, djă pioh gru grua djuai ania.