Anih anom gru đưm hmua Blôk Rossi đưm ƀơi jơlan Trần Hưng Đạo, phường Đạt Hiếu, plơi prong Ƀuôn Hô lĕ sa amăng hơdôm blah hmua blôk pla kơphê hăng kơsu mơ̆ng rơnuk Prang akŏ pơdong ƀơi Dak Lak thun 1926. Anai lĕ anih djă pioh bruă ngă jak iâu hơkrŭ ƀơi kual Dap Kơdư  lơ̆m 2 rơnuk blah ayăt mơ̆ng djuai ania ta. Boh nik ñu amăng rơnuk blah Mi, ƀơi hmua Blôk Rossi hơmâo akŏ pơjing sa grup ping gah, sa khul tơdăm dra mut phung rơnuk HCM hăng sa khul tơhan blah dơ̆p hơmâo 16 čô ding kơna. Mơnuih ngă kông ñơn hăng khua Blôk Rossi pô djru brơi mơnong ƀong huă, phao kơtuang kơ tơhan hơkrŭ; djru brơi Khul apăn bruă yua prăk kăk phao kơtuang tơring čar Dak Lak pơblih hăng hơdôm rơtuh tơn gơnam tam pioh pơgiăng nao pơ anih ngă hơkrŭ tơring čar dŏ amăng glai klô.

Mơ̆ng thun 2018, Blôk đang hmua Rossi dưi hơmâo Jơnum min mơnuih ƀôn sang tơring čar Dak Lak  čih anăn pơđĭ anih anom gru grua gưl dêh čar wai lăng. Ră anai, anih anai dŏ sang dŏ hăng anih mă bruă mơ̆ng khua Blôk pô hmua, ia bơmun wơi, sang apui, sang hơjai dưm gơnam, sang dưm tơlô̆ pler rơ-ot, gong ia pruih ăt dŏ hơnơ̆ng đôč. Kiăng ming pơkra glăi, djă pioh rơnoh yom gru grua anih ngă hmua Blôk Rossi  pioh kơ ƀing tuai nao ĕp lăng, nai prin tha Lương Thanh Sơn, khua hơđăp sang bruă djă pioh gơnam đưm tơring čar Dak Lak lăi lĕ, kiăng ĕp lăng pơtong glăi abih bang anih anom gru grua anai. Yă Lương Thanh Sơn lăi lĕ, kiăng lăng glăi abih bang amăng anih anom anai, ñu lăi:

“Ƀing ta kiah đing nao sang dŏ mơ̆ng pô hmua Blôk đôč, aka ƀu đing nao ôh sang glông đưm mơ̆ng djuai ania Êđê pơ anai. Jum dar jing ƀing ngă bruă apah, ƀong prăk blan ta juăt lăi ƀing kông ñơn jing ƀing mă bruă apah dŏkrah adai pơ-iă hlim hơjan pla kơphê ƀơi Blôk hmua anai. Jĕ giăm Blôk Rossi hơmâo plơi pla, ƀôn arăng mơ̆n, dŏ glăi hơdôm boh sang đưm, anun lĕ sa črăn kơ Blôk, ƀu djơ̆ lăi tual mă đơ anih ngă bruă mơ̆ng pô Blôk đôč ôh, yua hơgĕt ta ƀu pơlir hrŏm hăng gru grua anun pioh kơ tuai hơmâo anih hyu ĕp lăng čuă ngui”.

Tơ tă anai, gong gai kơnuk kơna plơi prong hlăk ĕp hơdră ming pơkra glăi, pơhrôp hiam sang đang hmua Blôk Rossi laih dơ̆ng pôr pơthâo brơi arăng thâo krăn hmư̆ hing anih či nao ĕp lăng, čuă ngui.....Y Čing Mlô, Kơ-iăng Khua Jơnum min mơnuih ƀôn sang plơi prong Ƀuôn Hô brơi thâo:

“Tơdơi kơ ming pơkra glăi giong lĕ, khua mua amăng plơi prong Ƀuôn Hô jak iâu hlơi hơmâo gơnam djă pioh anŏ ngă gru đưm ba pơdah, pioh prưng pơdă, lăi pơthâo kơ tuai ĕp lăng ngă hrŏm hăng lu anih tuai čuă ngui pơkn. Ăt rơkâo đĭ hăng tơring čar ba anih anom gru đưm anai jing sâmăng hơdôm anih pioh tuai čuă ngui. Ƀing gơmơi amra git gai lăi pơthâo djop anom bruă, biă mă ñu anom pơtô pơjuăt ruah mă anih anai pioh pơphun brơi čơđai sang hră tơbiă hyu ngui hơduah ĕp phun kơ bruă hơkrŭ, anih ngă hmua Blôk djru kơ bruă hơkrŭ, kiăng pơđĭ tui rơnoh yom gru grua đưm rơnuk hơkrŭ ƀơi lŏn ia ta”.