Yua hơmâo tơlơi gir run djă pioh, pơđĭ tui gru grua hiam đưm, tơlơi hơdip ngă mơak pran jua mơ̆ng djop djuai ania ƀiă amăng tơring čar hơmâo gru grua hiam djă pioh jai hrơi lu laih anun gru grua anun yơh jing pran kơtang pơtrut pơđĭ kyar djop mơnuih ăt kah hăng  amăng plơi pla.

Sang hră đôm lăm kơnuk kơna čem rông čơđai sang hră djuai ania ƀiă tơring glông Tu Mrông, tơring čar Kon Tum hơmâo 327 čô čơđai sang hră, abih bang lêng kơ djuai ania Sedang.  Mơ̆ng lu thun hăng anai laih, khua mua sang hră ngă hrom ƀing atông čing, thâo atông čing glăi pơtô kơ čơđai sang hră. Ngă hrom grup atông čing sang hră adơi Y Khin, hrăm anih 11 brơi thâo:

“Ƀing gơmơi pioh mông mơmŏt hrăm atông čing. Klâo tlam mơmŏt hrăm. Pô thâo atông čing pơčrâo brơi gơmơi hrăm atông. Gơmơi mơak biă mă yua hơmâo hrăm atông čing suang arap hrom hơbit”.

Kiăng kơ čơđai sang thâo găn rơgao tơlơi thâo ặă pioh gru grua hiam đưm, khăp kơ gru grua djuai ania pô, Khua mua sang hră đôm lăm kơnuk kơna rông ba tơring glông Tu Mrông pơtrut pơsur čơđai sang hră pơplông ngui ngor atông čing, suang arap, laih dơ̆ng ngă gêh găl pioh kơ adơi đeh čơđai sang hră ƀuh hăng thâo krăn anih anom ngui ngor atông čing gru grua đưm djuai ania pô. Nai pơtô Văn Trọng Lưu, Khua sang hră lăi, boh tŭ yua hrăm atông čing suang arap ƀơi sang hră tui anai:

“Bruă pơtô atông čing kơ čơđai sang hră gêh găl mơ̆n yua kơ ƀing kơhnâo kơhnăk atông čing pơtô ba ană amôn gơñu pô mơtam, gơñu pơtô ba tui tơlơi hor kiăng hăng pơtô ba gru grua djuai ania anun tŭ yua biă mă. Atông čing-suang arap jing hĭ bruă mă na nao ƀơi sang hră kiăng dŏ djă pioh hăng pơđĭ tui gru grua čing hơgor, ngă anŏ phun ba hyu pơdah atông ngui ngor amăng tơring glông”.

Hăng anăp ngă bruă, pơtrut pơsur, tuh pơ alin mơ̆ng Kơnuk kơna hăng anom bruă gru grua, truh ră anai, mơnuih ƀôn sang djop djuai ƀiă tơring čar Kon Tum hơmâo djă pioh 2.500 ring čing; pok hơdôm rơtuh anih pơtô atông čing, tul tia čing; pơtô lu tơlơi atông čing hơđăp, djă pioh; rŭ glăi bruă pơdong sang rung; hyu hơduah ĕp, pơdong pơhrôp glăi 16 mơta tơlơi ngă yang đưm, tơlơi ngui ngor gru grua; lăi pơthâo, pôr hyu gru grua hiam, tơlơi phiăn djuai ƀiă amăng tơring čar laih anun hăng gơyut gơyâo gah rơngiao tơring čar, ƀơi anŏ hăng gơyut gơyâo jar kmar....

Lu bruă ngă anai pơphun mơ̆ng tơlơi hor, anŏ kiăng, pơpŭ djă pioh, pơ-ư ang djuai ania hăng jing pran jua pơtrut djă pioh hăng pơđĭ kyar tui mơ̆ng rĭm čô mơnuih laih anun amăng plơi pla. Ayong A Uôn, plơi Mô Bành 1, să Đak Na, tơring glông Tu Mrông brơi thâo:

“Ta hrăm tui hơdôm anŏ hiam klă, djă pioh gru ama grua amĭ djuai ania ta pô tơdơi anai kiăng pơtô glăi kơ ană tơčô ta ăt dŏ djă pioh gru grua tơlơi phiăn hiam djuai ania ta pô”.

Hăng bruă ngă khut khăt djă pioh, pơđĭ tui rơnoh hiam gru grua hiam đưm mơ̆ng mơnuih ƀôn sang djuai ƀiă ba yua amăng bruă mă, tơlơi dŏ dong ƀong huă rĭm hrơi, hrom hăng ngă tui Kơčăo bruă djă pioh yua kơnuk kơna pơtrun, lu gru grua hiam phara jing hĭ gơnam tuai hyu ngui ĕp lăng, hơduah tơña, găn rơgao ngui ngor hrom amăng plơi pla sit tuai nao pơ Kon Tum. Anăp mă bruă pơđĭ kyar tŭ jum tuai hyu amăng plơi pla pơgang anŏ mơtah mơda hơđong kjăp hăng ba tuai hyu ngui ĕp lăng gru grua đưm Kon Tum hơdôm thun giăm anai, đing nao ba tuai hyu ngui amăng plơi pla.

Lu tuor tuai hyu ngui ĕp lăng atông čing suang arap hrom, lăng bruă rơwơi mơñam mrai đưm, tơlơi ngă yang ngui ngor amăng plơi pla kah hăng ƀơi plơi Kon Kơtu, plơi prong Kon Tum; Kon Pring, tơring glông Kon Plong; Măng Ri, tơring glông Tu Mrông....jing laih bruă čơkă tuai sit nik. Ơi Phan Văn Hoàng, Kơ-iăng Khua Gơnong bruă Gru grua, Pơrơguăt drơi jăn hăng Tuai čuă ngui tơring čar Kon Tum, brơi thâo, bruă djă pioh gru grua hiam djop djuai ania jing sa bruă mă tui tơhnal pơtrun hăng anăp đing nao:

“Mơ̆ng tơlơi khăp hăng hor djă pioh rơnoh yôm gru grua hiam đưm mơ̆ng ta, ƀing mơnuih kơhnăk atông čing yơh pơtô glăi gru grua hiam kơ rơnuk tơdơi, pơjing rai tơlơi mơak pran jua hor, khăp kơ gru grua hiam djuai ania ta pô. Hrom hăng anun, amăng hơdră ngă bruă pơ anăp adih pơđĭ kyar bruă tuai čuă ngui amăng tơring čar đing nao bruă ngă pơdah gru grua hiam đưm djuai ƀiă sa bruă khom ngă lăi pơthâo, pôr hyu kơ tuai amăng dêh čar hăng tač rơngiao mơ̆ng anun dưi pơđĭ kyar bruă tuai hyu ngui”.

Hăng gru grua hiam phara biă mă mơ̆ng 7 djuai ania adơi ayong, thun 2022, tơring čar Kon Tum tŭ jum rơbêh 1 klăk 100 rơbâo wơ̆t tuai hyu ngui, lu hloh 3 wơ̆t pơkă hăng thun 2021. Rŭ glăi bruă tuai čuă ngui kơtang biă mă tơdơi kơ thun Covid 19, prăk pơhrui glăi mơ̆ng bruă bơwih ƀong huă mơtah mơda tơring čar Kon Tum truh 265 klai prăk, đĭ hloh 3 wơ̆t pơkă hăng thun hlâo. Ngă hrom bruă sĭ mơdrô gơnam tuai hyu ngui, pơhrui glăi hơđong kơ lu mơnuih hăng plơi pla ƀơi Kon Tum, kah hăng sa bruă mă pơtrut, pơsur prong biă mă amăng bruă djă pioh, pơđĭ tui rơnoh yôm gru grua hiam đưm djuai ƀiă pơ anai.