Hơmâo sa anih amăng hrơi huă pơsat Pơtao Hùng lơ 10 blan 3 blan ta lĕ pra yang sang čua Tháp Kỳ Quang, ƀơi să Đăk Mar, tơring glông Đăk Hà, tơring čar Kon Tum. Neh met wa djuai ania Sêdang, Bahnar amăng kual dik dak păp rơmet. Hrŏm hăng djru grup pơphun bơwih brơi, čơkă tuai, lu hlăk ai gum pơplông bơkjăp drơi jăn dong kah hăng pơtul gai trul, pơdui hrĕ, đĭ gong pik ia pơbor...Amăng hrơi huă pơsat ơi pơtao, hrŏm hăng dưm gơnam ngă yang, gơnam hiam, jơman yua sit tơngan pô pơkra mă, kah hăng asơi điơ̆ ƀâo phu, kơphê, boh troh....pơyơr kơ djŏp rơnuk Pơtao Hùng, neh met wa ăt atông čing ayun suang dong kiăng mơ-ak hrŏm hăng pơdah pran jua pơpŭ yôm kơ djŏp rơnuk Pơtao Hùng hăng ƀing ơi yă rơgơi mơbruă nao hlâo djru akŏ pơjing lŏn ia.

Ayong A Thiếk, dŏ ƀơi plơi Kon Klốc, să Đăk Mar, tơring glông Đăk Hà, brơi thâo:“Rim thun, truh hrơi huă pơsat Pơtao Hùng, plơi Kon Klốc gơmơi juăt iâu pơthưr ƀing tha, hlăk ai atông čing, adoh suang hơdor kơ hrơi huă pơsat Ơi Pơtao. Bruă anai ƀu kơnong kiăng pơbưp nao rai đôč ôh mơ̆ yôm hloh lĕ kiăng gum pơgôp abih bang ană plơi. Rim wơ̆t amăng plơi hơmâo tơlơi ngui ngor ngă yang, ƀudah amăng hrơi jơnum prong mơ̆ng lŏn ia lĕ ƀu kơƀah ôh jua čing mơñi, tơlơi adoh ayun suang. Hơdor glăi hrơi huă pơsat Pơtao Hùng, gơmơi ƀu kơnong pơphun amăng sa boh plơi đôč ôh mơ̆ wơ̆t hăng hơdôm boh plơi pla pơkŏn ăt ngă hnun mơn, pơbưp nao rai kiăng pơtă pơtăn kơ hlăk ai, ană amon thâo hluh gru grua “Mơñum ia hơdor kơ pô klơi”, hơdor kơ djŏp rơnuk Pơtao Hùng akŏ pơjing lŏn ia, yua hnun mơn ƀing ta mơ̆ng dưi hơmâo tơlơi hơdip trơi pơđao yâo mơ-ak tui ră anai”.