Bruă ngă yang pơdah rai pran jua pơpŭ bơni abih pran jua, tơlơi pơmin hiam “Mơñum ia hơdor kơ pô klơi” mơ̆ng ană mơnuih glăk hơdip ƀơi kual lŏn Gia Lai hăng djŏp rơnuk Pơtao Hùng amăng hrơi ngă yang yôm pơphăn anai. Hăng djuai ania Jarai ƀơi Gia Lai, hrŏm hăng pơpŭ bơni tơlơi gum djru mơ̆ng djŏp rơnuk Pơtao Hùng, neh met wa ăt ngă yang rơbang, hăng tơlơi pơmin “djŏp mơta amăng lŏn tơnah anai lêng kơ hơmâo yang”, anun lĕ yang čư̆, yang ia, yang glai...

Tha pơi Rơ Ô Phung - dŏ ƀơi ƀôn Gum Gốp, să Ea Rmok, tơring glông Krông Pa brơi thâo, amăng blan 4 rim thun, djuai ania Jarai juăt pơphun ngă yang Pơtao apui kiăng hơmâo hơjan klă angin hiam, pơdơi kơtor mơboh jor:“Hăng djuai ania Jarai, mơ̆ng đưm hlâo laih, neh met wa thâo pơpŭ kơ ơi pơtao, amăng anun hơmâo Pơtao Apui. Yua anai lĕ mơnuih lăng ba tơlơi hơdip ană plơi, čang rơmang ană plơi hơmâo tơlơi hơdip trơi pơđao, yâo mơ-ak, ayuh hyiăng lŏn adai lăp tơphă, biă ñu amăng bơyan glăk không phang kơtang, jing anai lĕ mơnuih pơ ala brơi ană plơi ngă yang hơduah ia hơjan, anai ăt jing hrơi kiăng neh met wa pơdah rai pran jua gum pơgôp, thâo djru nao rai tơdruă, găn rơgao hrơi blan kơƀah, tơnap tap. Ră anai gong gai plơi pla ăt lăng ba biă kiăng ƀing gơmơi dưi pơphun glăi tơlơi ngă yang Pơtao Apui, laih anun kiăng neh met wa mơ̆ng ataih hmư̆ hing kơ tơlơi ngă yang hơduah ia hơjan anai, wơ̆t hăng djă pioh, pơtrut tui gru grua hiam mơ̆ng Jarai hơbai gơmơi”.