Ƀrô akŏ thun phrâo, prăp rơmet čơkă Tê̆t, ƀơi kual lŏn Dap Kơdư hơmâo lu tơơi ngă yang, ngui ngor mơak biă. Anai ăt jing hrơi ia iŏm gru hiam mơ̆ng eng ao djŏp djuai ania hơmâo buh, kiăo tui jua čing, yŭ ayun suang. Amai H’Blim ƀơi ƀon Ja Rah, să Nâm Nung, tơring čar Lâm Đồng hrŏm hăng rơkơi, ană bă ñu leng kơ buh eng ao Mnông nao lăng tơlơi ngă yang “Tăm Blang m’prang bon” lăi: “Djuai ania M’nông hơmâo eng ao mơñam hiam biă mă, hăng hơmâo jua čing, tơlơi suang hiam mơn, eng ao mơñam mă, čing lĕ ta hor hiư̆m pă ta pơtŏp mă, truh hrơi kiăng atông lĕ ta atông brơi neh wa lăng, ruah mă tơlơi čing hơget thơ djơ̆ hăng tơlơi suang, gru hiam anai kâo hor lăng biă, jak ba ană bă, rơkơi kâo nao lăng tom jing kâo mơak biă”.

Ia iŏm ƀơi eng ao mơñam ƀu kơnong eng ao či buh amăng hrơi jơnum ngui đôč ôh, ăt jing anŏ hiam amăng plơi pla djŏp djuai anjia ƀiă Dap Kơdư. Yă Ka Thu ƀơi să Hòa Ninh, tơring čar Lâm Đồng lăi, eng ao dŏ hrŏm hăng neh met wa K’ho mơ̆ng phrâo tơkeng truh kơ glăi pơ ơi yă dêh atâo: “Kâo pơtă na nao kơ ană kâo, mah hrơi anai ƀu kơƀah ôh eng ao hiam pơ sang čơ, samơ̆ hăng djuai ania ta lĕ eng ao mơñam mă khŏm djă pioh, ƀu dưi ngă rơngiă ôh, yua dah truh hrơi ta djai, tơdah ha blah abăn mơ̆ ƀu hơmâo lơi jing mlâo biă kơ arăng, mlâo kơ ơi yă đưm. Khŏm hơmâo eng ao yơh či glăi pơ ơi yă ta, khŏm hơmâo yơh”.

Mơ̆ng tơlơi kiăng či yua, ră anai ƀơi plang ngui internet, mơ̆ng plang ngui hơjăn truh pơ anih pơkra gơnam, anom ngă ƀong hrŏm...ăt hyơ hyơr eng ao hiam mơñam mă mơ̆ng neh met wa lŏn dap Kơdư. Phrâo anai, ƀơi Anom ngă ƀong hrŏm Mơñam eng ao Tơng Bông, Jơnum min mơnuih ƀôn sang phương Ea Kao, tơring čar Dak Lăk ăt pơphun pơdah livestream anăn “Buôn Tơng Jŭ - Ea Kao kơkuh kơ abih bang”, pơdah đĭ amăng facebook, zalo OA, TikTok.

Jơlan hơdră kiăng pơƀuh eng ao mơñam hăng pơƀuh bruă čơkă tuai hyu ngui amăng plơi Tơng Jŭ, hăng gơnam hmư̆ hing kah hăng eng ao đah kơmơi, đah rơkơi djuai ania Êđê, eng ao čơđai, ao dai, eng rip mơñam hăng mrai, cà vạt, khăn lang kơƀang hăng eng ao mơñam samơ̆ tơčoh tui rơnuk phrâo. Mơ̆ng bruă livestream, phương pơƀuh hyu anih anom, plơi pla hiam, anih dŏ hơdip mơda mơ̆ng phương Ea Kao pơlir hăng tơlơi hơdip mơda, jik bruă ngă hmua mơ̆ng Mơnuih ƀôn sang, biă ñu lĕ  mơnuih djuai ania ƀiă.

Pơ Gia Lai hơmâo lu anih čuă ngui pơhưč tuai rơnguai kah hăng Plei Ơp (phường Pleiku), Plơi tuai čuă ngui Ia Mơ Nông, să Ya Ly, ƀudah homestay Đinh A Ngưi ƀơi să Tơ Tung...djuai ania Jarai hăng Bahnar leng kơ brơi sem lăng gru grua hiam đưm hlâo, sem lăng bruă mơñam mrai, hmư̆ čing, pel ĕp tơlơi ngă yang, tơlơi ngui ngor, mơnong ƀong huă hăng tơlơi hơdip mơda, bơwih ƀong huă mut hrŏm hơbit hăng djă pioh răk lui gru grua hiam mơ̆ng đưm./.