VOV4.Jarai - Tơring čar Lâm Đồng glăk ječ ameč prap lui pơphun Festival bơnga Đà Lạt tal 9 thun 2022. Anai lĕ hrơi ngui pơphun prong biă mă dong mơng đưm hlâo hăng amra sui amăng 2 blan. Hăng anăn “Đà Lạt - plơi prong bơnga bluh hiam amăng djop bơyan”, Festival bơnga Đà Lạt tal 9 thun 2022 pơphun amăng 2 blan, dong mơng lơ 1/11 truh abih lơ 31/12. Laih dong 10 jơlan hơdră pơphun ƀơi plơi prong Đà Lạt, Festival bơnga Đà Lạt tal 9 ăt hơmâo 41 jơlan hơdră pơphun ƀơi 2 boh plơi pla Đà Lạt, Bảo Lộc hăng ƀơi hơdôm tơring glông.

Festival bơnga Đà Lạt tal 9 pơphun sui 2 blan

Tui hăng ơi Ngô Văn Ninh, Khua anom bruă, pô pơtruh hiăp mơng Jơnum min mơnuih ƀon sang tơring čar Lâm Đồng, Festival bơnga Đà Lạt lĕ hrơi ngui ngor kiăng pơtrut hăng hrưn đĭ rơnoh yôm mơng anăn apăn hmư̆ hing “Đà Lạt - plơi prong Festival bơnga”, lăi pơthâo rup rap tuai čuă ngui Đà Lạt - Lâm Đồng, “Đà Lạt - anŏ yôm mơng lŏn hiam”, pơlir hăng hơdôm bruă bơwih brơi tuai čuă ngui ƀơi đang hmua hăng gơnam đang hmua hiam hơdjă mơng ƀon lan. Ră anai bruă prap lui glăk hơmâo hơdôm anom bruă amăng tơring čar pok pơhai ječ ameč.

VOV Tây Nguyên/Siu Đoan: Pơblang