Amăng grŭp 14 čô mơnuih nao pơ̆ Hàn Quốc tal anai, Rčom Bus, tơkeng thun 2002, ƀơi Plei Ku Roh, jơlan Yên Đổ, plơi prong Plei Ku lĕ mơnuih hlăk ai hloh. Ñu brơi thâo, ñu amra gum hrŏm kah hăng abih bang 7 mơta tơlơi atông čing hơgor sui 40 mơnit. Anun lĕ 2 mơta tơlơi atông čing hơgor, hăng hơdôm tơlơi atông pĕ ting ning, uă kơni, ayup đing djrao, adôh tơlơi adôh đưm.

Rčom Bus brơi thâo, hơdôm tơlơi adôh suang pĕ gông atông brô̆ leng kơ hmâo er mơ-ak, lăi pơthâo kơ gơyut gơyâu pơ̆ dêh čar tač rơngiao thâo kơ gru pha ra mơ̆ng gông brô̆ đưm hăng tơlơi hơdip mơda mơ̆ng djuai ania ƀiă Dap Kơdư. Jơnum ngui thun anai amra pok phun amăng lơ 15/9, truh abih lơ 24/9 ƀơi Anom pơdah tơlơi adôh suang Sori, tơring čar Jeonbuk, Hàn Quốc. Anai amra lĕ tal blung a djop mơta gông brô̆ hăng er adôh đưm mơ̆ng djuai ania Jarai dưi lăi pơthâo ƀơi anih pơdah adôh suang dêh čar Hàn Quốc./.